Biełaruski dobraachvotnik «Leŭ» zatrymany va Ukrainie pa padazreńni ŭ zamoŭnym zabojstvie

Kastryčnicki rajonny sud Maryjupalu ŭziaŭ pad vartu da 19 krasavika biełaruskaha dobraachvotnika Ihara Klaŭko pavodle padazreńnia ŭ vykradańni i naŭmysnym zabojstvie.

Pavialičyć

Pavodle materyjałaŭ spravy, Ihar Klaŭko razam z dobraachvotnikami-ukraincami, prykładna ŭ druhoj pałovie kastryčnika 2014 hoda, atrymaŭ zakaz «ad asoby, jakuju zaraz namahajecca ŭstanavić śledztva, na vykradańnie, niezakonnaje pazbaŭleńnie voli i likvidacyju, to bok naŭmysnaje zabojstva» žychara adnaho z prylehłych da Maryjupalu pasieliščaŭ.

U sudovym rašeńni paviedamlajecca, što achviaru vyvieźli 2 listapada 2014 hoda ŭ lesapałasu, rasstralali z aŭtamata Kałašnikava ŭ śpinu i zakapali na miescy. Pavodle śledztva, vystrały zrabiŭ mienavita Ihar Klaŭko.

Na sudovym pasiadžeńni Ihar Klaŭko adznačyŭ, što abstaviny, pra jakija ŭzhadvajucca ŭ spravie, mahčyma i mieli miesca, adnak u ździajśnieńni hetaha złačynstva jaho abhavaryli. Jon prasiŭ sud nie zadavalniać chadajnictva śledčaha pra aryšt, spasyłajučysia na toje, što pa stanie zdaroŭja jon maje prachodzić kurs lačeńnia, a va ŭmovach SIZA heta niemahčyma.

Ale sud uchvaliŭ rašeńnie pra ŭziaćcie jaho pad vartu. Hetaje rašeńnie było matyvavanaje tym, što Ihar Klaŭko padazrajecca ŭ ździajśnieńni asabliva ciažkaha złačynstva, za jakoje praduhledžana pakarańnie ŭ vyhladzie pazbaŭleńnia voli bolš za dziesiać hadoŭ, a taksama toje, što jon nia maje pastajannaha miesca pražyvańnia i ŭstojlivych sacyjalnych suviaziaŭ va Ŭkrainie, i moža schavacca ad orhanaŭ dasudovaha raśśledavańnia.

Ihar Klaŭko, bolš viadomy pad pazyŭnym «Leŭ», razam z bataljonami «Danbas» i DUK «Pravy sektar» prajšoŭ amal usie haračyja kropki antyterarystyčnaj aperacyi na ŭschodzie Ŭkrainy: Arciomaŭsk, Papasnuju, Lisičansk, Iłavajsk i Pieski. Pad čas bajavych dziejańniaŭ u Pieskach atrymaŭ minna-vybuchovaje množnaje askołačnaje ranieńnie miakkich tkanin tvaru, levaj halonki, ahniastrelny askołačny pierałom levaj vialikabiarcovaj kostki, ahniastrelny pierałom levaj małabiarcovaj kostki.

U rašeńni Kastryčnickaha rajonnaha suda Maryjupalu adznačajecca, što Ihar Klaŭko jość uradžencam Maładziečna, maje biełaruskaje hramadzianstva i status uciekača ŭ Čechii. Paśla ŭdziełu ŭ dobraachvotnickich bataljonach jon pačaŭ słužbu va Ŭzbrojenych siłach Ukrainy pavodle kantraktu.

U bataljonie «Danbas» pakul sytuacyju z zatrymańniem Ihara Klaŭko nie kamentujuć.

• 0
• 0
• 0
• 0
• 0
• 0
• 0
• 0