Uchnaloŭ sa «Spraviadlivaha śvietu» raskrytykavaŭ «nacyjanalistyčny zapał» napiaredadni 100-hodździa BNR
Biełaruskaja partyja levych «Spraviadlivy śviet» suprać taho, kab adznačać 100-hodździe Biełaruskaj Narodnaj Respubliki na aficyjnym uzroŭni. Partyja miarkuje, što Biełaruś jak dziaržava kančatkova sfarmavałasia tolki dziakujučy kastryčnickaj revalucyi, paviedamlaje Radyjo Svaboda.
U artykule na «infarmacyjna-analityčnym» sajcie «Teleskop», jaki redahuje kolišni namieśnik dyrektara Infarmacyjna-analityčnaha centru pry Administracyi prezydenta Leŭ Kryštapovič, namieśnik staršyni partyi Valery Ŭchnaloŭ vykazaŭ ździŭleńnie, što čynoŭniki vysokaha ranhu zajavili pra hatoŭnaść udzielničać u śviatkavańni 100-hodździa BNR i adznačać datu na dziaržaŭnym uzroŭni.
«Zusim niadaŭna była inšaja kruhłaja data — 100-hodździe kastryčnickaj revalucyi, — piša jon. — I choć hety dzień źjaŭlajecca ahulnarespublikanskim śviatočnym i niepracoŭnym dniom, dziaržstruktury abmiežavalisia praviadzieńniem navukovaj kanferencyi ŭ Instytucie historyi Akademii navuk. A prapanovy Biełaruskaj partyi levych «Spraviadlivy śviet» pra mahčymy ŭdzieł struktur dziaržaŭnaj ułady ŭ śviatkavańni hetaj daty, nakiravanyja ŭ prezydenckuju administracyju i Saviet ministraŭ, byli tolki «pryniatyja da viedama».
U vyniku hetuju datu, praciahvaje jon, šyroka adznačyli tolki prychilniki palityčnych partyj i hramadzkich arhanizacyj kamunistyčnych pohladaŭ.
«Dyk niaŭžo data stvareńnia BNR nastolki važnaja dla Biełarusi? — zadajecca pytańniem Valery Ŭchnaloŭ. — Siońnia niama adnaznačnaj acenki hetaj padziei ŭ navukovaj supolnaści.
Dyskusijnym zastajecca pytańnie pra rolu BNR u historyi stanaŭleńnia biełaruskaj dziaržaŭnaści. Ideja poŭnaj niezaležnaści Biełarusi kančatkova aformiłasia ŭ asiarodździ biełaruskaha nacyjanalnaha ruchu tolki paśla kastryčnickaj revalucyi, u kancy 1917-ha — pačatku 1918 hadoŭ. Abviaščeńnie BNR nie pryviało da realizacyi hetaj idei».
Aŭtar miarkuje, što nielha abviaščać niezaležnaść na akupavanaj niemcami terytoryi, nie raźličvajučy na naŭprostavuju ci ŭskosnuju padtrymku zachopnikaŭ, na ich patranat i apieku, i robić vysnovu: dziaržaŭnaje ŭtvareńnie, stvoranaje padobnym čynam, nia moža adlustroŭvać nacyjanalnyja intaresy biełaruskaha narodu.
«Dla nas, palitykaŭ, važniej toje, što niama vyznačalnaj dumki pra BNR u biełaruskim hramadztvie — heta fakt, jak by my da jaho nia stavilisia. Dyk niaŭžo čynoŭniki hatovyja ŭdzielničać u sumnieŭnych mierapryjemstvach? U Biełarusi jość ludzi, dla jakich 100-hodździe BNR — śviata. Ale jość i tyja, chto nia ličać tuju datu śviatočnaj i majuć prava zastacca ad jaje ŭbaku. Heta i jość demakratyja i prava na svoj pohlad, jakoje treba pavažać, a nie nasadžvać u hramadztvie nacyjanalistyčny zapał, sprabujučy pryciahnuć da hetaha dziaržaŭnyja struktury. Biełarusy — mudryja ludzi i sami vyrašać, jakija daty dla ich źjaŭlajucca śviatam, a jakija — nie», — piša Valery Ŭchnaloŭ, namieśnik staršyni partyi levych «Spraviadlivy śviet», jakaja raniej nazyvałasia Partyjaj kamunistaŭ Biełarusi.
Kamientary