Turysty kupili tur u Ryhu, praviali 36 hadzin u aŭtobusie, ale navat nie trapili ŭ Jeŭrasajuz

Poŭnuju chroniku pryhod čytajcie na sajcie «Anłajniera». My pryvodzim jaje ŭ skaračeńni.

Čytačka vydańnia atrymała vizu i vyrašyła kupić tur vychadnoha dnia. Taki jana znajšła na sajcie apieratara Bytravel.by — jon prapanoŭvaŭ pajezdku ŭ Ryhu i Jurmału.

Pavialičyć

Z ukazanaha na sajcie koštu ekskursii — €70 plus 100 rubloŭ turpasłuhi — žančyna zapłaciła tolki sumu ŭ biełaruskich rublach. Astatak u jeŭra treba było apłočvać užo ŭ Łatvii. 

Pa raskładzie, turysty pavinny byli vyjechać ź Minska ŭ 16 hadziny suboty i prajści hranicu z Łatvijaj ŭ adzinym dziejnym punkcie «Hryharaŭščyna» na biełaruskaj miažy. U turfirmie zapeŭnivali, što ź pierachodam i čerhami prablem nie budzie. 

Adnak ad pačatku ŭsio pajšło nie pa płanie: aŭtobus spaźniŭsia na 40 chvilin, a za 70 kiłamietraŭ ad Minska ŭ jaho skončyłasia paliva. Kiroŭcy źjeździli pa bienzin, adnak paśla hetaha transpart nie zavioŭsia, tamu daviałosia čakać ramontnuju bryhadu. Na hetym etapie niekalki čałaviek admovilisia praciahvać pajezdku.

Pavialičyć

Aŭtobus zmoh vyjechać ŭ bok Połacka tolki kala dziasiataj hadziny viečara. Paśla taho, jak tam padabrali inšych pasažyraŭ, turystam abviaścili, što maršrut tura mianiajecca, i zamiest punkta propusku «Hryharaŭščyna» było vyrašana jechać na rasijska-łatvijskuju hranicu ŭ punkt «Burački», bo tam byli mienšyja čerhi. 

Dvoje turystaŭ z ukrainskimi pašpartami jechać u Rasiju admovilisia. Hadzinu jany razmaŭlali pa telefonie z dyrektaram firmy, jaki prasiŭ ich vyjści z aŭtobusa i napisać zajavu na viartańnie hrošaj. U vyniku a pieršaj hadzinie nočy ŭkraincaŭ vysadzili, i aŭtobus pajechaŭ dalej. 

Paśla ŭjezdu ŭ Rasiju na šlachu akazaŭsia ŭčastak płatnaj darohi, jaki daviałosia apłočvać adnoj z pasažyrak, u jakoj była kartka płaciežnaj sistemy «Mir». U «Buračkach» aŭtobus niekalki hadzin prastajaŭ pierad šłahbaumam biez ruchu. Ludzi siadzieli bieź ježy i vady, a taksama ničoha nie mahli nabyć, bo ŭ ich nie było rasijskich hrošaj. 

Rasijskija mytniki zładzili biełaruskim turystam pilnuju pravierku z asabistym nadhladam i pieralikam najaŭnych hrošaj. U vyniku pierachod hranicy z rasijskaha boku zaniaŭ 10 hadzin. 

Łatvijcy chutka praviali pašpartny kantrol turystaŭ, paśla ich pajšli kiroŭcy. Pa viartańni pasažyraŭ ahałomšyli navinoj: jany jeduć dadomu, bo kiroŭcam anulavali vizy.

Pa viersii turystaŭ, łatvijskamu boku nie chapiła patrebnych dakumientaŭ praź źmienu maršruta, tamu jany prastajali doŭha na miažy biez ruchu. Taksama pasažyry adznačajuć, što adzin z kiroŭcaŭ byŭ zanadta emacyjnym i spračaŭsia ź siłavikami. 

Turfirma ŭ svaich sacsietkach paćvierdziła, što vizy kiroŭcaŭ byli anulavanyja ŭ adkaz na abureńni marudnaj pracaj. Dziejańni pahraničnych słužb Łatvii ŭ dopisie nazvali palityzavanymi.

Pavialičyć

Paśla fijaska na miažy turysty raźviarnulisia i pajechali nazad u Minsk. Dadomu aŭtobus viarnuŭsia a piataj ranicy ŭ paniadziełak. Usiaho ŭ darozie pasažyry praviali 36 hadzin, adnak Jeŭropy tak i nie pabačyli.

U kampanii zajavili, što hatovyja viarnuć tolki pa 100 rubloŭ turpasłuhi. Pasažyry ciapier abmiarkoŭvajuć kalektyŭny pazoŭ na kampiensacyju maralnaj škody.

Žurnalistam «Anłajniera» ŭ turfirmie padrabiazna rastłumačyli situacyju. Tam adznačyli, što dla biełaruskich turfirm niama zabaron na vykarystańnie punktaŭ propusku na rasijska-łatvijskaj hranicy, i jany imi časta karystajucca. U toj ža čas anulavańnie viz kiroŭcaŭ było rastłumačana «skandalnymi pavodzinami pasažyraŭ, jakija pravakavali pahraničnikaŭ i palityzavali situacyju». 

Prablemy z palivam byli rastłumačanyja «techničnym momantam». Z-za tura, što nie adbyŭsia, kampanija paniesła vialikija straty, bo byli zabraniravanyja haścinicy i ekskursii. Pa słovach pradstaŭnika turfirmy, bolšaść turystaŭ pahadzilisia pieranieści pajezdku na bolš spakojny čas, a ŭkrainskija pasažyry atrymali kampiensacyju raschodaŭ na viartańnie ŭ Minsk.

• 1
• 3
• 15
• 25
• 1
• 3
• 2
• 0