Hienierał ZŠA: «Ja ŭražany prafiesijanalizmam ministraŭ abarony i zamiežnych spraŭ Biełarusi»

«U Biełarusi ja naviedaŭ miesca pierapravy praz raku Biarezinu, dzie armija Napaleona sprabavała adstupać, dzie ich prykryvali polskija, litoŭskija i šviejcarskija vojski…» — raspaviadaje Biełsatu amierykanski hienierał-lejtenant u adstaŭcy Ben Hodžez.

Biełaruś źlikvidavała abmiežavańni na kolkaść amierykanskich dypłamataŭ u našaj krainie. Pierad hetym Miensk naviedali vysokapastaŭleny čynoŭnik Dziaržaŭnaha departamientu ZŠA Ŭes Mitčeł i hrupa ekśpiertaŭ u spravach biaśpieki. Siarod ich byŭ były kamandzir armii Złučanych Štataŭ u Jeŭropie hienierał-lejtenant Ben Hodžez. Što jon rabiŭ na bierazie Biareziny? Jakija ŭ jaho zastalisia ŭražańni ad spatkańniaŭ z Łukašenkam i ministrami zamiežnych spravaŭ dy abarony? Pra heta — u intervju Siarhieja Pielasy z byłym vajskoŭcam, a ciapier adnym z kiraŭnikoŭ vašynhtonskaha Centru analizu jeŭrapiejskaj palityki (CEPA).

Niekalki hadoŭ tamu Vaš Centr analizu jeŭrapiejskaj palityki byŭ adnym ź pieršym, dzie zaŭvažyli prablemu hetak zvanaha suvalskaha kalidoru. My razmaŭlajem u Vilni, za niekalki tuzinaŭ kiłamietraŭ ad hetaha miesca,klučavoha dla biaśpieki rehijonu. U nas z adnaho boku Rasieja, a z druhoha — Biełaruś. Vy naviedali Biełaruś niekalki miesiacaŭ tamu. Jakoju Vy bačycie našuju krainu jak susieda NATO ciapier, paśla vizitu? Ci jość niebiaśpieka ź biełaruskaha boku dla suvalskaha kalidoru i krainaŭ aljansu?

Ja vielmi ciešyŭsia, kali ŭpieršyniu atrymaŭ mahčymaść narešcie naviedać Biełaruś. U listapadzie ja pabačyŭ hetuju pryhožuju krainu, dzie sustrakaŭsia nie tolki ź dziaržaŭnymi dziejačami, ale i pryvatnymi asobami. Heta byŭ nasamreč cudoŭny dośvied, poŭny emocyjaŭ i vielmi karysny dla pašyreńnia majho dalahladu.

Mnie paščaściła być u kampanii inšych amierykanskich ekśpiertaŭ u biaśpiecy, my razmaŭlali z čynoŭnikami Ministerstva abarony, Ministerstva zamiežnych spravaŭ i, viadoma, mieli honar sustrecca z prezidentam Łukašenkam. Ja taksama skarystaŭsia mahčymaściu naviedać niekalki značnych dla mianie histaryčnych miescaŭ: heta miesca pierapravy praz raku Biarezinu, dzie armija Napaleona sprabavała adstupać, dzie ich prykryvali polskija, litoŭskija i šviejcarskija vojski…

Vielmi cikava, čamu Vy naviedali mienavita hetaje miesca, a nie niejkaje inšaje,źviazanaje z pytańniami biaśpieki ci z vajennaju historyjaj.

Ja ŭ peŭnym sensie fanat historyi. Mnie padabajecca znachodzić miescy, dzie žaŭniery abo kamandziry ździejśnili štości pryncypova novaje, pajšli na ryzyku, rabili toje, što patrabavała vialikaj mužnaści: naprykład, kali nievialikaja hrupa mianiała zychod boju.

Ja ŭziaŭ kamień z hetaha miesca, kab vykarystoŭvać jaho dla demanstracyi prykładu mužnaści dy inavacyjaŭ maim žaŭnieram.

I, viadoma, pra tuju znakamituju pierapravu tak šmat raspaviadajuć, što mnie chaciełasia pabačyć hetaje miesca na ŭłasnyja vočy.

Ja pierabiŭ Vas padčas adkazu na pytańnie pra ŭražańni ad vizitu ŭ Biełaruś.

Niama prablemy. Jašče adnoje miesca — novy muziej Vialikaj Ajčynnaj vajny. Ja byŭ pazityŭna ździŭleny ŭzroŭniem i jakaściu ekspanataŭ, asabliva na partyzanskuju tematyku — šmat mužčynaŭ i žančyn u Biełarusi zmahalisia za svaju svabodu. Heta natchniaje. Ja sapraŭdy atrymaŭ asałodu ad ekskursii.

Mianie mocna ŭraziła rašučaść Biełarusi navučycca być suvierennaj i samastojnaj dy praciahvać demanstravać heta.

Biełaruś nie musić rabić vybaru pamiž Zachadam i Rasiejaj. Ja maju na ŭvazie histaryčnyja, kulturnickija suviazi, nie tolki ekanamičnyja.

Nichto na Zachadzie nie robić sprobaŭ stvaryć taki padzieł, ničoha dobraha z hetaha nie vyjdzie. Mianie ŭraziła staŭleńnie da samastojnaści i suvierenitetu. Vy ŭzhadali suvalski kalidor. Toje, što Biełarusi ŭdałosia davieści da RF infarmacyju — my možam abaranić siabie samyja, nam nie patrebnyja rasiejskija vojski tut — vielmi važna, heta pamianšaje ryzyku ŭźniknieńnia kanfliktaŭ dla ŭsich. Da taho ž Biełaruś dapamahaje achoŭvać bolšuju častku miažy z Ukrainaju — tam prosta niama rasiejskich vojskaŭ.

Ministr abarony Biełarusi Andrej Raŭkoŭ u intervju rasiejskamu miedyja zajaviŭ, što nie treba reahavać na mahčymy fort Tramp u Polščy, i havorka nie idzie pra raźmiaščeńnie amierykanskaj dyvizii, ale pra bryhadnuju hrupu. Jon vałodaje najnoŭšaju zachodniaj analitykaju, miž inšym Vašaha centru — SEPA.

Nie treba ździŭlacca, što ministr abarony dobra infarmavany. Ja mieŭ honar sustrecca ź ministram abarony: jon vielmi dobra słužyć Biełarusi — jak i vašyja daśviedčanyja dypłamaty, i ministr zamiežnych spravaŭ.

Ministr abarony maje racyju: niama nieabchodnaści ŭ niejkaj reakcyi na prapanovu Polščy ŭ spravie fortu Tramp, jakuju ciapier vyvučaje ZŠA.

Polšča — naš dobry sajuźnik, ale vidavočna: toje, što NATO robić u Polščy ci Litvie, nie niasie anijakaj pahrozy Biełarusi. Siły NATO zaprasili, bo miascovyja žychary nie daviarajuć kiraŭnictvu Rasiejskaj Fiederacyi. Voś čamu jany tam, i padtrymlivańnie Biełaruśsiu svajho suvierenitetu dy samastojnaści vielmi dobraje dla stabilnaści i biaśpieki ŭva ŭsim rehijonie.

Bolšaść spatkańniaŭ u Miensku adbyvałasia za začynienymi dźviaryma. Ci mahli b Vy padzialicca nie źmiestam razmovaŭ, ale ŭražańniami, emocyjami, jakija zastalisia paśla spatkańniaŭ z Łukašenkam ci ź ministrami? Ci daviarajecie Vy im, kali jany kažuć pra biaśpieku? Što Vy adčuvali, kali razmaŭlali ź imi?

Ja źjazdžaŭ ź Biełarusi z vyraznym asensavańniem taho, nakolki vialiki stratehičny vyklik ciapier staić pierad jaje ŭradam. Mianie ŭrazili šmatlikija dekłaracyi, što «my suvierennyja i samastojnyja, nam nie patrebnyja tut rasiejskija vojski, kab abaraniać nas». I znoŭ ža, ja nie byŭ ździŭleny, ale ŭražany ŭzroŭniem prafiesijanalizmu i talenavitaści ministraŭ zamiežnych spravaŭ dy abarony.

• 0
• 0
• 0
• 0
• 0
• 0
• 0
• 0