ZŠA: vybuch pad Sievieradźvinskam adbyŭsia pry sprobie padniać rakietu «Buravieśnik»
Złučanyja Štaty pryjšli da vysnovy, što vybuch na palihonie ŭ Archanhielskaj vobłaści Rasiei, jaki pryvioŭ da vykidu radyjacyi i hibieli niekalkich čałaviek, adbyŭsia padčas aperacyi pa ŭzdymie z dna Biełaha mora rakiety «Buravieśnik» ź jadziernaj rakietnaj ustanoŭkaj, piša radyjo «Svaboda».
Heta vynikaje z tekstu vystupu supracoŭnika Dziarždepartamentu ZŠA ŭ adnym z kamitetaŭ AAN 10 kastryčnika.
«Vybuch… byŭ vynikam jadziernaj reakcyi, jakaja ŭźnikła padčas uzdymu rasiejskaj kryłataj rakiety ź jadziernaj ustanoŭkaj» — havorycca ŭ vystupie namieśnika pamočnika dziaržsakratara ZŠA Tomasa dy Nana.
«Rakieta lažała na dnie Biełaha mora paśla jaje niaŭdałaha vyprabavańnia raniej u hetym hodzie, niepadalok ad bujnoha nasielenaha punkta» — zajaviŭ dy Nana. Havorka idzie pra Sievieradźvinsk, pobač ź jakim raźmieščany palihon Nionaksa.
Vybuch pad Sievieradźvinskam adbyŭsia 8 žniŭnia. Rasiejskija ŭłady pryznali fakt vybuchu, karotkaterminovaha vykidu radyjacyi i hibieli ludziej — pieciarych supracoŭnikaŭ Rasatama i dvuch vajskoŭcaŭ.
U aficyjnych paviedamleńniach havaryłasia, što jon adbyŭsia pry vyprabavańni novaj techniki z «izatopnaj krynicaj siłkavańnia». Pra toje, jakaja heta technika, adnak, aficyjna nie paviedamlałasia. U roznych raśśledavańniach nazyvalisia roznyja versii — až da vybuchu samoj rakiety «Buravieśnik».
Ab rakiecie, paśla nazvanaj «Buravieśnik», kazaŭ prezydent Rasiei Ŭładzimir Pucin u pasłańni ŭ sakaviku 2018 hodu, śćviardžajučy, što heta zbroja, jakaja nia maje analahaŭ u śviecie i zdolnaja faktyčna nieabmiežavany čas znachodzicca ŭ pavietry i źmianiać trajektoryju palotu. Vyprabavańni hetaj rakiety zasakrečanyja. ŚMI, spasyłajučysia na dadzienyja vyviedak, pisali pra niekalki niaŭdałych vyprabavańniach «Buravieśnika» ŭ Rasiei, adnak hetyja paviedamleńni nie paćvierdžanyja.
-
Žančyna z Tenesi vyžyła paśla dźviuch śmiarotnych injekcyj padčas pakarańnia śmierciu i była dastaŭlena ŭ balnicu
-
Samalot Flydubai uratavali piłot-indyjec i try pasažyry, adzin ź jakich stamatołah. Druhoha piłota źviazali pravadami ad słuchavak i małankami
-
U Paŭdniovaj Karei 600 tysiač čałaviek pryjšli pahladzieć na akułu, jakaja zachrasła ŭ kanale
Kamientary