Pažarny papiaredziŭ ludziej pra źniaćcie ściaha. Jaho zvolnili i vysialajuć razam ź ciažarnaj žonkaj

9 vieraśnia z pažarnaj avaryjna-vyratavalnaj častki №2 Frunzienskaha rajona zvolnili Maksima Stašulonka. Pracy i słužbovaha žylla kamandziru adździaleńnia faktyčna kaštavała adno paviedamleńnie ŭ čacie «Strana dla žiźni»: pažarny papiaredziŭ žycharoŭ kvartała «Kaskad», što MNS płanuje źniać vyviešany pamiž damami vialiki bieł-čyrvona-bieły ściah, piša «Jeŭraradyjo».

Maksim raskazaŭ, čamu vyrašyŭ napisać takoje paviedamleńnie i što płanuje rabić paśla.

— Vośmaha vieraśnia ja pačuŭ u častcy, što pažarnyja płanujuć zdymać ściah, i napisaŭ pra heta ŭ kanale «Strana dla žiźni». Płanavaŭ adpravić paviedamleńnie administrataru, ale napisaŭ u čat u adkrytym dostupie.

Majo paviedamleńnie zaŭvažyŭ chtości z načalstva. Ja napisaŭ heta ab 11 hadzinie, a ŭ 16 mianie ŭžo vyklikali na razmovu nakont zvalnieńnia, — raskazvaje Maksim Stašulonak.

Pažarnaha abvinavacili ŭ parušeńni prysiahi, dvuch punktaŭ pracoŭnaha kantrakta i padpiski ab nievydavańni. Maksim byŭ niazhodny, staŭ spračacca i źviarnuŭsia da jurystaŭ. 9 vieraśnia ranicaj jaho znoŭ vyklikali da načalstva — hetym razam kab padpisać zajavu ab zvalnieńni. Z usich pieraličanych napiaredadni pryčyn tam było paznačana tolki parušeńnie kantrakta.

Zvolnili Maksima pa artykule 172.6 — spynieńnie słužby ŭ suviazi sa ździajśnieńniem pravinnaści, praduhledžanaj kantraktam ab słužbie ŭ jakaści padstavy dla jaho daterminovaha skasavańnia abo spynieńnia jaho dziejańnia. Da zajavy prykłali skrynšot paviedamleńnia z čata «Strana dla žiźni».

Pavialičyć

— Mnie kazali zvalniacca pa ŭłasnym žadańni, ale ja admoviŭsia. Ja chaču praciahvać pracavać u MNS. Ja pracuju ŭ častcy bolš za vosiem hadoŭ. Nadzieja maleńkaja, ale ja ŭsio ž chaču damahčysia spraviadlivaści i viarnucca na słužbu. Zaŭtra sustrakajusia z advakatam, jakoha mnie dapamoh znajści vałancior. Maje siabry źviarnulisia pa dapamohu ŭ ŚMI, — praciahvaje Maksim.

Akramia taho, što Stašulonak za adzin dzień pazbaviŭsia lubimaj pracy, jaho jašče i vysialajuć sa słužbovaj kvatery. A ŭ chłopca ciažarnaja žonka i trochhadovaje dzicia. Siamja pavinna sabrać rečy na praciahu troch dzion.

— Učora padtrymać mianie pad vokny padyšli čałaviek tryccać pažarnych. Choć adkrytaj padtrymki ad kaleh pakul niama, ja trochi navat rasstroiŭsia z hetaj nahody. Razumieju, što vielmi mnohija prosta bajacca. Na kuchni abmiarkoŭvajuć, ale ničoha nie robiać, — dzielicca pažarny.

— A jak vy naohuł staviciesia da taho, što pažarnych adpraŭlajuć zdymać ściahi?

— Dy jasnaja reč, jak ja staŭlusia! Inakš by nie pisaŭ toje paviedamleńnie. I bolšaść supracoŭnikaŭ MNS padzialajuć moj punkt hledžańnia.

Pavialičyć

8 vieraśnia pažarnyja sapraŭdy vyjechali ŭ «Kaskad», kab prybrać ściah. Ale zdymać užo nie było čaho — pra heta zahadzia pakłapacilisia žychary.

Viadomy taksama vypadak, kali supracoŭnik MNS, padniaty ŭ kałyscy da ściaha pamiž damami na praśpiekcie Dziaržynskaha, nie staŭ zdymać jaho, a tolki raspraviŭ — i spuściŭsia na ziamlu. Ściah tady ŭsio ž taki źniali supracoŭniki milicyi ŭ cyvilnym, jakija padnialisia da jaho zamiest pažarnaha.

U sacyjalnych sietkach była infarmacyja, što i hety supracoŭnik MNS zastaŭsia biez pracy, ale pakul što jana zastałasia biez paćviardžeńnia.

• 0
• 0
• 0
• 0
• 0
• 0
• 0
• 0