Ciapier palitviazień pa-za kameraj zaŭždy vymušany pierasoŭvacca ŭ kajdankach.
Žonka palitźniavolenaha Volha Sieviaryniec paviedamiła pra toje, što ŭ Mahilovie, dzie ŭtrymlivajuć Paŭła ciapier, jamu dali status «schilnaha da napadu na administracyju». A heta aznačaje, što ŭsie pierasoŭvańni pa turmie adbyvajucca vyklučna ŭ kajdankach, piša «Radyjo Svaboda».
Na minułym tydni Paŭła Sieviarynca pastavili na ŭlik jak «ekstremista», vystaŭlali jaho na kalidor z matracam, razam ź im na pazačarhovyja pravierki vystaŭlali i sukamernikaŭ. Na dumku Volhi, heta rabiłasia dziela taho, kab spravakavać varožaść da Sieviarynca z boku inšych siadzielcaŭ.
Užo 347 dzion palitviazień znachodzicca pad aryštam.
Adnaho z sustaršyniaŭ partyi Biełaruskaja chryścijanskaja demakratyja Paŭła Sieviarynca zatrymali 7 červienia 2020 hodu kala jahonaha doma nieŭzabavie paśla taho, jak jon pravioŭ na płoščy pierad staličnym Kamaroŭskim rynkam «narodny pikiet svabody i salidarnaści» pobač ź pikietami dla zboru podpisaŭ za vyłučeńnie alternatyŭnych Alaksandru Łukašenku kandydataŭ u prezydenty.
21 žniŭnia Sieviaryniec mieŭsia vyjści na volu paśla 75 dzion administracyjnaha aryštu. Adnak Śledčy kamitet paviedamiŭ, što na palityka zaviali spravu pavodle art. 108 Kryminalna-pracesualnaha kodeksu (zatrymańnie praź niepasredna ŭźnikłaje padazreńnie va ŭčynieńni złačynstva). Zatym stała viadoma, što palityku vystavili abvinavačańnie pavodle č. 2 art. 293 Kryminalnaha kodeksu (Udzieł u masavych biesparadkach), jaho pakinuli pad vartaj.
Sieviarynca 12 traŭnia pačali sudzić na zakrytym pracesie ŭ Mahiloŭskim abłasnym sudzie. Razam ź im na łavie padsudnych aktyvisty «Eŭrapiejskaj Biełarusi» Maksim Viniarski, Dźmitry Kazłoŭ, Andrej Vojnič, Pavał Juchnievič, Jaŭhien Afnahiel, Iryna Ščasnaja. Pavodle infarmacyi, jakaja pastupaje svajakam Paŭła Sieviarynca i inšych źniavolenych, zakryty praces prachodzić u nadzvyčaj chutkim tempie, čakajecca, što razhlad spravy budzie tryvać nia bolej za dva tydni.
Ciapier čytajuć
Na kanviercie Cichanoŭskaj napisana «Miedviediu O.V.» Što heta za čałaviek?16
Kamientary