10 najlepšych naturalnych antybijotykaŭ: što heta za raśliny i jak jany dziejničajuć?
Kali my chočam padmacavać imunnuju sistemu i dapamahčy arhanizmu ŭ baraćbie suprać infiekcyj, varta pašukać tak zvanyja naturalnyja antybijotyki. Heta raśliny z kampanientami, jakija zabivajuć šmat bakteryj i hrybkoŭ, pry hetym nie vyklikajuć nijakich pabočnych efiektaŭ, piša onet.pl.
Cikava, što takija raśliny mohuć navat źniščyć šmat takich mikraarhanizmaŭ, jakija ŭstojlivyja da zvykłych nam antybijotykaŭ u tabletkach. Ale majcie na ŭvazie, što pryrodnyja antybijotyki nie mohuć zamianić lačeńnie, rekamiendavanaje miedykami.
Časnok
Pieršy i duža papularny z takich pryrodnych lekaŭ — heta časnok. Zvyčajna jaho i anałahičnyja raśliny ŭžyvajuć pry sinusicie, bolach u horle, hrypie, prastudzie i kišečnych rasstrojstvach. Rehularnaje ŭžyvańnie časnaku palapšaje cyrkulacyju kryvi, źnižaje kryviany cisk i kolkaść «škodnaha» chalesterynu ŭ arhaniźmie. Alicyn — rečyva ŭ składzie časnaku — škodna ŭpłyvaje na šmat vidaŭ hryboŭ, u tym liku na tyja, što vyklikajuć ćvil i małočnicu.
Cybula
Jašče adna raślina, jakaja, padobna da časnaku, źmiaščaje ŭ siabie złučeńni siery, u tym liku i alicyn. Sok cybuli źniščaje bakteryi, što vyklikajuć infiekcyi skury, i paskaraje zažyŭleńnie ran, apiokaŭ i akne, a taksama dapamahaje pry chvarobach dychalnych šlachoŭ. Dakazana, što cybula praduchilaje ateraskleroz i źnižaje ŭzrovień cukru ŭ kryvi ŭ dyjabietykaŭ.
Kab stvaryć naturalnyja leki z cybuli, prosta razrežcie jaje na kavałki, dadajcie da jaje miod ci, mahčyma, limonny sok. Pakińcie sumieś na noč u ciopłym miescy, čas ad času pieramiešvajcie jaje, i potym pracadzicie.
Žuraviny
Taksama majuć mocnyja antybakteryjalnyja ŭłaścivaści, dy jašče im ułaścivy funhicydny efiekt — to-bok žuraviny škodna ŭpłyvajuć na hryby. Spažyvańnie hetych jahad dapamahaje pry lačeńni roznych infiekcyj, u tym liku vyklikanych bakteryjaj E. coli — u asnoŭnym heta infiekcyi mačavoha traktu. Hipuravaja kisłata, što ŭvachodzić u skład žuravin, praduchilaje rost bakteryj na ścienkach žoŭcievaha puzyra.
Inšyja składniki žuravinaŭ — fruktoza i pracyjanidziny — nie dajuć bakteryjam prylaplacca da kletak, tamu žuraviny praduchilajuć karyjes i paradantoz.
Prapolis
Jaho časam nazyvajuć antybijotykam 21-ha stahodździa. Jaho vykarystoŭvajuć pry infiekcyjach nakštałt hierpiesu i hrypu, pry chvarobach vierchnich dychalnych šlachoŭ i niekatorych stamatałahičnych i hastraentierałahičnych prablemach. Prapolis taksama zdolny palepšyć stan usiaho arhanizma adrazu: jon uzmacniaje imunitet, paskaraje zažyŭleńnie ran, palapšaje vyviadzieńnie škodnych mietałaŭ.
Čabor
Efirny alej čabaru maje supraćparazitarnyja i bakterycydnyja ŭłaścivaści, a taksama škodna ŭpłyvaje na hrybki. Hetamu aleju ŭłaścivy zaspakajalny i adcharkvalny efiekt. Nastojka čabaru, u svaju čarhu, dapamahaje pry prablemach z stravavańniem i moža vykarystoŭvacca dla dezynfiekcyi małych ran. Pry hetym alej čabaru maje šerah supraćpakazańniaŭ, tamu varta prakansultavacca z doktaram pierad tym, jak jaho vykarystoŭvać.
Arehana
Nielha nie ŭzhadać taki naturalny antybijotyk, jak arehana. Rečyvy tymoł i karvakroł u jaho składzie zabivajuć šmat bakteryj, navat znakamituju Helicobacter pylori, što vyklikaje chvaroby straŭnika i dvanaccacipiersnaj kiški. Jašče arehana ŭpłyvaje na małočnicu, salmanieloz, branchit, prablemy z kišečnikam i lamblijoz.
Pry źniešnim vykarystańni hetaja raśliny zdymaje bol ad reŭmatyzmu i mihreni.
Bazilik
Efirny alej baziliku — dobry srodak u baraćbie z zapaleńniami, bakteryjalnymi i parazitarnymi infiekcyjami. Nastojka liścia hetaj raśliny ratuje ad niastraŭnaści i niedachopu apietytu, dapamahaje pry mietearyźmie. Kampresy z takoj nastojkaj źnižajuć acioki i lečać mihreń. Bazilik nielha vykarystoŭvać zanadta doŭha, a niekatorym katehoryjam ludziej jon uvohule nie padychodzić. Maleńkim dzieciam, ciažarnym žančynam i kormiačym maci lepiej ustrymacca ad takoha antybijotyku.
Šałfiej
Jašče adzin pryrodny antybijotyk — heta šałfiej, efirny alej jakoha dapamahaje pry hrypie i bakteryjalnych infiekcyjach. Jon taksama palahčaje simptomy hinhivitu i tanzilitu, zdymaje vostry bol u horle. Nastojka šałfieju spryjaje stravavańniu, dapamahaje pry mietearyźmie i adryžcy, pry harmanalnych zbojach. Pry hetym treba pamiatać, što alej šałfieju nielha prymać unutr, bo jon škodny dla niervovaj sistemy. A voś liście hetaj raśliny absalutna biaśpiečnaje, kali tolki vy nie ŭžyvajecie jaho zanadta doŭha.
Karyca
Z karycy dabyvajuć efirny alej, jaki dapamahaje pry akne i małočnicy, lečyć hastraenterałahičnyja chvaroby. Karycu ŭžyvajuć, kab pazbavicca ad niastraŭnaści, mietearyzmu, dyjarei i młosnaści, jana źnižaje hipierkisłotnaść straŭnikavaha soka. Ale ž ciažarnym žančynam nielha ŭžyvać leki, zroblenyja z dapamohaj karycy, bo jana pavyšaje ryzyku niedanošvańnia.
Chvoja
Nielha pieraacanić kaštoŭnaść takoha pryrodnaha antybijotyku, jak chvojny alej. U dadatak da bakterycydnaha efiektu, chvoja dapamahaje suprać kašlu, tamu nastojku chvoi ŭžyvajuć pry chvarobach vierchnich dychalnych šlachoŭ. Inhalacyi z chvojnym alejem ratujuć ad prastudy, a škipinarny alej, vyrableny z chvojnaj smały, lečyć boli ad reŭmatyzmu i stymuluje cyrkulacyju kryvi.
Kamientary