Maci vyrašyła papravić zdaroŭje piacihadovaha syna — u vyniku jaho zabrała chutkaja
Chłopčyk trapiŭ u balnicu paśla dyjety i 19 BADaŭ, što davała maci.
Žančyna źviarnułasia da nutrycyjołaha paśla taho, jak jaje piacihadovy syn pieranios rotavirus. Kansultantka paraiła abmiežavać zvyčajnaje charčavańnie dziciaci i prymać 19 vidaŭ bijałahična aktyŭnych dabavak. Praź miesiac stan chłopčyka pahoršyŭsia, paviedamlaje ANT.
Pavodle maci, nutrycyjołah kansultavała jaje dystancyjna i zaklikała mienš daviarać daktaram.
«Treba terminova prymać BADy, adnaŭlać usie deficyty. Vy daviali tak dzicia. Vy što, nie razumiejecie? Treba terminova. Voś prosta ciapier kuplajcie, ja vam skinu ich u Telegram. 19 najmieńniaŭ», — pieradała žančyna słovy nutrycyjołaha.
Maci ciaham miesiaca vykonvała hetyja rekamiendacyi. Z racyjonu dziciaci prybrali pradukty z hlutenam, małočnyja pradukty i sałodkaje. Kali stan chłopčyka rezka pahoršyŭsia, daviałosia vyklikać chutkuju dapamohu. Jaho dastavili ŭ Minskuju haradskuju dziciačuju infiekcyjnuju kliničnuju balnicu.
«Jon byŭ vielmi słaby, navat nie moh mocna ścisnuć mnie ruku. U jaho nie było nijakaj infiekcyi. Było zrazumieła, što dzicia prosta niedaatrymała nieabchodnyja rečyvy. U jaho było vielmi biednaje charčavańnie i šmat abmiežavańniaŭ», — raskazała doktar-infiekcyjanist Alina Savienka.
Pavodle maci, navat paśla špitalizacyi nutrycyjołah sprabavała pierakanać žančynu admovicca ad pryznačanaha daktarami lačeńnia i praciahvać dyjetu z BADami.
Dla pracy nutrycyjołaham u Biełarusi miedycynskaja adukacyja nie patrabujecca. Takija kansultanty mohuć dapamahać karektavać racyjon, ale nie majuć prava dyjahnastavać chvaroby i pryznačać lačeńnie.
Kamientary