Kiraŭnik Pamiežnaha kamiteta: My nikoli nie dumali, što Ukraina budzie siabie tak pavodzić
Biaśpieka dziaržaŭnych miežaŭ Biełarusi budzie harantavanaja lubym sposabam, siły i srodki dla hetaha majucca. Ab hetym zajaviŭ žurnalistam staršynia Dziaržaŭnaha pahraničnaha kamiteta Anatol Łapo paśla abmierkavańnia ŭ Łukašenki, piša BiełTA.
Kiraŭnik DPK źviarnuŭ uvahu na toje, što minuły hod byŭ dla pamiežnikaŭ asablivy, napružany. «Nikoli na našych miežach nie było takoj kancentracyi vojskaŭ sumiežnych dziaržaŭ», — rastłumačyŭ jon.
Naprykład, na polskim napramku niepasredna la biełaruskich miežaŭ znachodziacca 15 tysiač čałaviek — pradstaŭnikoŭ siłavoha błoka. Heta značyć, «na kožnyja 200 m prychodzicca pa 7-8 čałaviek». «Navošta heta? Napružanaść i raznastajnyja pravakacyi. Abstreł našych pamiežnych słupoŭ, źniščeńnie na polskim kirunku ščytkoŭ».
Napružanaj zastajecca abstanoŭka i na paŭdniovym kirunku. «My nikoli nie dumali, što naša paŭdniovaja susiedka budzie siabie tak pavodzić», — vykazaŭsia kiraŭnik DPK pra Ukrainu i zhadaŭ u jakaści prykładu niedružalubnyja pavodziny na vučeńni «Paleśsie».
Ciapier, vykarystoŭvajučy jak padstavu płany pa praviadzieńni sumiesnych biełaruska-rasijskich vučeńniaŭ «Sajuznaja rašučaść», ukrainski bok nahniataje isteryju, adznačyŭ Anatol Łapo.
«Pryciahvajucca dadatkovyja siły i srodki dla achovy miažy, choć ciapier pamiežnikaŭ Biełarusi i Ukrainy dla narmalnaj achovy miažy dastatkova pry ŭzajemavyhadnym supracoŭnictvie, — skazaŭ jon. — Ale da ich [va Ukrainu] pryjšli zusim inšyja haspadary, instruktary, jakija pastavili zusim inšyja zadačy. Abstanoŭka mianiajecca».
«Vy vydatna viedajecie, što kožny prymiežny kanflikt pačynajecca z drobiaziaŭ. Siońnia Łukašenku było dałožana ab niedapuščeńni pierarastańnia hetych drobiaziaŭ u poŭnamaštabny kanflikt, choć sumiežny bok nas na heta šturchaje. Ale my, pamiežniki, adekvatnyja ludzi, jak i ŭsie biełarusy. My zaŭsiody aceńvali, aceńvajem i budziem aceńvać abstanoŭku. Ale adrazu skažu ŭsim i ŭsia, što biaśpieka našych dziaržaŭnych miežaŭ budzie zabiaśpiečanaja lubym sposabam, siły i srodki ŭ nas dla hetaha jość», — padkreśliŭ staršynia Dziaržpamiežkamiteta.
Pavodle jaho słoŭ, u hetym hodzie asnoŭnyja namahańni ŭ achovie i abstalavańni dziaržaŭnaj miažy buduć skancentravanyja na ŭkrainskim kirunku i na tych napramkach, dzie buduć vyjaŭlenyja vykliki i pahrozy biaśpieki. Pry hetym ab pierakidcy sił i srodkaŭ havorki nie viadziecca. «Budzie ŭzmacnieńnie za košt reziervaŭ, — rastłumačyŭ Anatol Łapo, udakładniŭšy, što za košt źjaŭleńnia novaj sučasnaj techniki vyzvalajucca ludskija resursy. — Budzie manieŭr. Nidzie pasłableńnia nie budzie».
Kamientary