Siońnia na naradzie ŭ Łukašenki abmierkavali pytańni biaśpieki na dziaržaŭnaj miažy.
Łukašenka, u pryvatnaści, adznačyŭ, što ŭ apazicyjnych ŚMI ŭvieś čas musirujuć temu biełaruska-rasijskich vučeńniaŭ, padličvajučy, kolki vajskoŭcaŭ z Rasii prybudzie ŭ Biełaruś, piša BiełTA.
Pryčym vučeńni časam nazyvajuć «płanam akupacyi». Z takoj farmuloŭkaj, naprykład, vystupiŭ Zianon Paźniak. Pavodle jaho zajavy, u Biełaruś prybuduć sotni vahonaŭ vajennaj techniki z Rasii i sto tysiač sałdat.
Łukašenka niečakana adkazaŭ na hetyja zajavy Paźniaka.
«Ja redka nazyvaju proźviščy, ale źviartajusia da słoŭ Zianona Stanisłavaviča nie tamu, što jon dla nas niejki ŭzor. Heta antypod našaj palityki. Ale ja jaho vielmi dobra viedaju, jak i jon mianie. Čałaviek nie durny, razumieje ŭsio, — adznačyŭ jon. — Słuchajcie, 200 čyhunačnych sastavaŭ — heta nikoli nie źmieścicca. Heta ž elemientarna paličyć, navat kali ty nie viedaješ, što takoje armija».
«Ale sprava nie ŭ hetym. Ja padumaŭ: dzie ž ty byŭ, zmahar za suvierenitet i niezaležnaść, u 2020 hodzie, kali nas voś-voś hatovyja byli akupavać? Čamu tady nie baraniŭ suvierenitet i niezaležnaść? Dzie ty byŭ?» — źviarnuŭsia Łukašenka z pytańniem da Paźniaka.
«I samaje hałoŭnaje, ja ŭžo źviartajusia da tych, chto, pračytaŭšy heta i pačuŭšy heta ŭ Biełarusi (a heta častka našaha hramadstva, častka dziaržavy, dzie ja źjaŭlajusia prezidentam), i dla Zianona chaču skazać: nikoli, nikoli, prynamsi pakul ja prezident i vy hienierały, my nie dapuścim akupacyi Biełarusi. Hetaha nie budzie nikoli ni ź jakoha boku. Ni źleva, ni sprava, ni z zachadu, ni z uschodu, ni z poŭnačy, ni poŭdnia. Nikoli. My pamrom, ale hetaha nie dapuścim. Tamu nie treba śpiekulavać na hetaj temie», — padkreśliŭ Łukašenka.
Jon nahadaŭ, što Biełaruś i Rasija daŭno abviaścili ab płanach pravieści sumiesnaje vučeńnie. Heta rehularnyja mierapryjemstvy dla armij abiedźviuch krain: u 2021 hodzie prajšło vučeńnie «Zachad», u hetym hodzie manieŭry projduć u tym liku na paŭdniovych miežach Biełarusi.
«Heta jašče dla nas važna, bo nam pryjdziecca tam razharnuć ceły kantynhient biełaruskaj armii. Pra heta i ŭ Łunincy kazali. I tut heta nie źviazana ni ź jakoj akupacyjaj. My prosta chočam abaranić našu paŭdniovuju miažu. A padobnym palitykam varta źviarnuć uvahu na kancentracyju vojskaŭ nie tolki na miažy Łatvii, Litvy, Polščy, ale i Ukrainy. Nie my pieršymi pačali źviartać uvahu na paŭdniovuju našu miažu. Ukraincy pačali ściahvać tudy vojski. Nie razumieju, navošta», — adznačyŭ Łukašenka.
Siońnia ž Łukašenka zaćvierdziŭ rašeńnie pa achovie miažy.
Jak raspaviali ŭ Dziaržaŭnym pamiežnym kamitecie, u 2022 hodzie asnoŭnyja namahańni pa achovie miažy buduć skancentravanyja na učastkach, dzie «mahčymaje ŭźniknieńnie novych źniešnich vyklikaŭ i pahroz pamiežnaj biaśpiecy, asabliva na ŭkrainskim kirunku».
«Pierad orhanami pahraničnaj słužby stajać vyraznyja zadačy. U liku asnoŭnych — pavyšeńnie efiektyŭnaści achovy dziaržaŭnaj miažy šlacham udaskanaleńnia inžyniernaha i techničnaha abstalavańnia miežaŭ. Dla vyjaŭleńnia prykmiet padrychtoŭki pravakacyj i apieratyŭnaha pryniaćcia mier pa ich spynieńni budzie vieścisia pastajanny manitorynh stanovišča ŭ pamiežnaj prastory», — padkreślili ŭ Dziaržpamiežkamitecie.
Zianon Paźniak: Zachad i NATA absalutna nie razumiejuć, što adbyvajecca
Ciapier čytajuć
Deputatka, jakaja rychtuje pryhažuń dla Łukašenki, vyjšła zamuž14
Kamientary