Padarožničać, zakuplacca, sustrakacca. Što my jašče budziem rabić u Mietasuśviecie?

Ahulnapryniataha aznačeńnia Mietasuśvietu nie isnuje. Ale praduhledžvajecca, što heta budzie šyrokaja sietka 3D-śvietaŭ i virtualnych simulacyj u režymie realnaha času. Pakul što nivodny z hetych virtualnych śvietaŭ ad roznych kampanij sam pa sabie nie jość paŭnavartasnym Mietasuśvietam — heta, chutčej, tolki pieršyja sproby stvareńnia.

Pajechać u luboje miesca, u lubuju epochu

Mietasuśviet budzie mieć kopii realnych vydatnych miaścin, jak sučasnych, tak i tych, što isnavali raniej. Usie jany buduć pradstaŭleny ŭ realistyčnym trochmiernym farmacie. Takija virtualnyja miescy zmoža naviedvać biaskoncaja kolkaść karystalnikaŭ adnačasova.

Naprykład, biez usialakaj čarhi, ź luboha punkta śvietu, možna budzie trapić u staražytny Połack ci Vilniu, albo Staražytny Rym. Možna budzie zajści ŭ zrujnavanuju balšavikami Faru Vitaŭta, dzie virtualny hid ci virtualny ksiondz adkažuć na vašyja pytańni. Viadoma, kali niechta voźmie na siabie adkaznaść u raspracoŭcy hetaha siehmienta Mietasuśvietu.

U Mietasuśviecie možna budzie sustreć histaryčnych asob, jakich ažyvić štučny intelekt. Naprykład, Kastusia Kalinoŭskaha. Stvaralniki i vizijaniery abiacajuć, što heta ŭsio budzie našmat bolš realistyčnym, čym ciapierašnija technałohii virtualnaj realnaści ŭ hulniach. Vy ź ciažkaściu zmožacie adroźnić virtualnuju sustreču ad fizičnaj.

Naviedvać kancerty i mitynhi

Praź Mietasuśviet možna budzie hladzieć tranślacyi realnych kancertaŭ i spartyŭnych mierapryjemstvaŭ. Prysutničać na ich virtualna, ale ŭsio budzie nastolki realistyčna, što roźnicy vy nie pabačycie. Pahladzieć padzieju možna budzie pad lubym zručnym kutom, adnoj pstryčkaj palca možna budzie adrazu znajści infarmacyju pra artystaŭ i spartoŭcaŭ, za jakimi my nazirajem na kancercie ci spabornictvie. Mahčyma, niechta pieraviadzie ŭ Mietasuśviet kancert Maksa Karža ci Alaksandra Saładuchi. Albo znakamity kancert hurtu Queen na stadyjonie Uembli.

Pavialičyć

Zavodzić virtualnych kocikaŭ

Karystalniki Mietasuśvietu buduć kuplać i pradavać virtualnych svojskich žyvioł — ad realistyčnych sabak i katoŭ da cmokaŭ i inšych fantastyčnych istot. Źjavicca rynak spadarožnych pasłuh, takich jak vyhuł svojskich žyvioł i dohlad za imi. 

Źviaroŭ možna budzie pryviazać da NFT, takim čynam jany buduć całkam unikalnyja, u vas budzie prava ŭłasnaści na ich.

Naviedvać virtualnyja viasielli i viačorki

Pastaŭščyki pasłuh u Mietasuśviecie buduć stvarać virtualnyja placoŭki i spahaniać płatu za arendu abo ŭvachod na viasielli i viačorki. Viadoma, hatoŭki tam nie budzie, za ŭdzieł u takich mierapryjemstvach treba budzie płacić kredytnymi kartkami albo kryptavalutaj.

Darečy, adna para ź Indyi ŭžo vyrašyła pravieści svajo viasielle ŭ Mietasuśviecie. Žanich pracuje z kryptatechnałohijami, heta była jahonaja ideja, a maładaja pahadziłasia.

Voś jak budzie prykładna vyhladać hetaje virtualnaje viasielle.

I feel so proud and blessed that I have seen and taken advantage of many great opportunities in this world before millions of people have seen them, Beginning of something big! India's first #metaverse marriage in Polygon blockchain collaborated with TardiVerse Metaverse startup. pic.twitter.com/jTivLSwjV4

— Dinesh Kshatriyan (@kshatriyan2811) January 11, 2022

Haściam zamiest viasielnych paštovak adpraviać rehistracyjnyja danyja dla ŭvachodu na virtualny partał, u ich budzie mahčymaść vybrać unikalny avatar. Na mierapryjemstvie hości zmohuć pavitać maładoha z maładoju i pahutaryć ź imi. Hości navat zmohuć daryć pary viasielnyja padarunki ŭ vyhladzie ličbavych padarunkavych siertyfikataŭ.

Pavialičyć

Va ŭmovach kavidu tradycyjnyja indyjskija viasielli ź vialikaj kolkaściu haściej stali niemahčymymi, a viasielle ŭ Mietasuśviecie dazvolić paźbiehnuć usich kavidnych abmiežavańniaŭ i paklikać šmat ludziej.

Taksama na virtualnym viasielli budzie prysutničać baćka niaviesty, jaki letaś pamior. Padčas cyrymonii jon dobrasłavić žanicha i niaviestu. 

Pavialičyć

Schadzić u kramu

U isnujučych internet-kramach ludzi mohuć čytać apisańnie tavaraŭ i zakuplacca. U Mietasuśviecie pakupniki zmohuć naviedvać virtualnyja handlovyja punkty i teściravać tavary ŭ 3D i ŭ poŭnym maštabie, pierš čym kupić. Naprykład, vysoki čałaviek zmoža pravieryć, ci zmoža jon znachodzicca ŭnutry pachodnaj pałatki, pierad tym, jak kupić jaje ŭ realnym śviecie i adpravicca ŭ realny pachod. 

Pavialičyć

Amierykanski handlovy hihant Walmart užo abviaściŭ, što budzie mieć svajo pradstaŭnictva ŭ Mietasuśviecie.

Ahienty pa nieruchomaści praź Mietasuśviet buduć demanstravać klijentam kvatery. Pierad tym, jak kupić realny dom, čałaviek zmoža virtualna chadzić pa pakojach i hladzieć na meblu.

Mahčyma, takija praktyčnyja aśpiekty Mietasuśvietu najchutčej znojduć svajo realnaje prymianieńnie. 

Vałodać virtualnaj majomaściu

Ale praź Mietasuśviet možna nie tolki chadzić na virtualnyja demanstracyi realnych kvater, ale i prosta vałodać virtualnaj majomaściu. 

I ŭžo jość vielizarnyja ŭhody — za 4,3 miljona dalaraŭ kupili ŭčastak u hulni The Sandbox. 

Pavialičyć

Pavialičyć

Kampanija Republic Realm zapuściła prajekt Fantasy Islands u žniŭni minułaha hoda z 100 vyspaŭ ź viłami, jakija kupcy mohuć «naviedać», rekanstrujavać, vykarystoŭvać dla demanstracyi svaich virtualnych tvoraŭ mastactva NFT i pryjomu siabroŭ. 

Pracavać

U pandemičnyja časy dystancyjnaja praca z płaniorkami ŭ Zumie ŭžo nie vyhladaje niejkaj fantastykaj. Ale ź Mietasuśvietam usio pojdzie jašče dalej. Źjavicca mahčymaść pracavać u virtualnych pracoŭnych pakojach, dzie vy možacie dałučycca da svajoj rabočaj kamandy ŭ virtualnym ofisie. Tudy možna budzie ŭziać z saboj svoj fizičny pracoŭny stoł.

Atrymać adukacyju

Adukacyjnyja płatformy buduć prapanoŭvać vielizarnuju interaktyŭnuju biblijateku navučalnych materyjałaŭ i kursaŭ pa roznych pradmietach. Adukacyjnyja prahramy buduć spałučać virtualnuju i dapoŭnienuju realnaść. 

Jak bačycie, Mietasuśviet abiacaje revalucyjnyja źmieny ŭ našaj kamunikacyi ź ludźmi, abychodžańni z rečami i sposabach pravodzić volny čas i rassłablacca.

• 0
• 0
• 0
• 0
• 0
• 0
• 0
• 0