«Ciapier mnie čužaja sama kancepcyja ŭžyć niešta, čaho ty nie viedaješ». Vialikaja hutarka ź Ivanam Šyłam pra biznes, zarablańnie z dapamohaj ŠI, žančyn i botaks
Dla adnych Ivan Šyła zastajecca ŭ pamiaci jarkim salihorskim maładafrontaŭcam, dla druhich — staličnym śvieckim lvom i biznesoŭcam, trecija zhadajuć jaho hučnaje zvalnieńnie z «Biełsata» za žart na adras prezidenta Polščy. A čym jon žyvie siońnia?
Pahutaryli ź Ivanam Šyłam pra samaje asabistaje — u tym liku pra admovu ad ałkaholu, pra žyćcio biełaruskim nie ŭ Biełarusi, pra niaŭdałyja i apraŭdanyja inviestycyi, a taksama płany ich siamiejnaj klininhavaj kampanii «Čysty kit» (Clean Whale) pa zachopie śvietu.
«Sindrom deficytu ŭvahi i hipieraktyŭnaści prynosiŭ mnie vialikija pakuty»
«Naša Niva»: Čym siońnia žyvie Ivan Šyła?
Ivan Šyła: Ja zajmajusia biznesam, boŭłderynham i hulaju ŭ futboł. Možna skazać, što majo žyćcio zbolšaha składajecca ź dźviuch rečaŭ — sport i biznes.
I ja mahu zaraz skazać, što žyvu ščaślivaje žyćcio. Ja pierastaŭ zmahacca z saboj. U pieršuju čarhu, ja maju na ŭvazie SDUH (sindrom deficytu ŭvahi i hipieraktyŭnaści), jaki prynosiŭ mnie vialikija pakuty ŭ minułym. Ja nie moh narmalna pracavać. Mnie zdavałasia, kali ja nie mahu skancentravacca na niejkaj adnoj zadačy, to ŭ mianie takaja rysa charaktaru kiepskaja, ci što ja lanivy.
Ale siońnia ja liču, što SDUH — heta maja pieravaha. Ja mahu dumać pra 20 rečaŭ adnačasova i šmat rabić paralelna. Heta zasłuha i štučnaha intelektu ŭ toj formie, u jakoj jon pradstaŭleny siońnia, i ŭžyvańnia antydepresantaŭ.
Ja doŭha dumaŭ, što žyć z tryvohaj, biadoj, niaščaściem — heta narmalna, što tak žyvuć usie vakoł. Kštałtu ja hladžu na ludziej i ŭpeŭnieny, što dzieści ŭnutry ŭ ich pavinna być toje samaje, što i ŭ mianie: dumki pra śmierć kožny dzień, što ja nikomu nie patrebny, ničoha nie ŭmieju i hetak dalej. Akazałasia, što možna inakš.
Pieršapačatkova mnie paraili pić antydepresanty (AD), kab ja lepš spaŭ. Lepiej spać ja nie staŭ, ale atrymać samo razumieńnie, što žyćcio moža być inšym — heta kardynalnaja źmiena. Ja ciapier mahu prosta iści pa vulicy i dumać: «Vaŭ, jak pryhoža!». Takoha raniej nie było.
«NN»: Kolki ŭ tvaim vypadku spatrebiłasia pić miedykamienty dla takoha efiektu?
IŠ: Ja pačaŭ pić AD u studzieni. Dadatkovy efiekt: u mianie ciapier mienš złości na inšych. Ja pierastaŭ pisać hadkija kamientary ŭ fejsbuku. Raniej ja niaredka moh vykazvać niepryjemnyja rečy ludziam, tamu što, napeŭna, u mianie było šmat niepryjemnych pačućciaŭ, i heta byŭ adzin sa sposabaŭ žyć.
«NN»: Ty taksama admoviŭsia ad ałkaholu. Niadaŭna adznačaŭ 110 dzion biez. Heta niejki marafon?
IŠ: Ja nie nastolki skancentravany na tym, što nie pju — prosta ja bolš zusim nie ŭžyvaju ałkahol. Admoviŭsia jašče da antydepresantaŭ, tamu što mnie 35 hadoŭ i ja dastatkova šmat času pravioŭ sa svaim ciełam i zrazumieŭ, što treba krychu jaho šanavać. Bo, naprykład,
kali ŭ 20 hadoŭ ja sprabavaŭ narkotyki, to navat nie dumaŭ, što heta moža drenna skončycca. Prosta chaciełasia pravieryć, na što zdolny moj arhanizm. Ciapier mnie čužaja sama kancepcyja ŭžyć niešta, čaho ty nie viedaješ. Niejkuju tabletku, jakaja zroblena nieviadoma dzie i nieviadoma jak.
Ałkahol ja caniu bolš i liču, što jon časam patrebny jak srodak sacyjalnych niejkich znosin. Ale ŭ maim vypadku heta prostaja aryfmietyka: nastupstvy ałkaholu ŭžo pierakryvajuć jaho plusy. Ja moh adčuvać siabie bolš raźniavolena niedzie, ale nastupnyja niekalki dzion byli vykinutyja z žyćcia.
Ja kaliści ličyŭ, što ałkahol adkryvaje bolš mahčymaściaŭ dla karysnych znajomstvaŭ. Ale pa fakcie ja vypivaŭ šmat, moh da samaj ranicy, ale niešta ałkahol mnie z kantaktami nie dapamoh i pracu nie prynios.
U mianie była vydatnaja vypivackaja karjera, ja byŭ dobrym kamandnym hulcom. Ale karjera skončanaja — ja bolš nie budu pić ałkahol.
«NN»: Možna skazać, što Ivan Šyła siońnia — ZŁŽnik pa ŭsich frantach, ci ŭsio ž zastajucca «hraški»?
IŠ: Ja sapraŭdy ciapier ZŁŽnik. Daŭno kinuŭ palić, nie pju ałkahol, nie jem škodnuju ježu. Ale ja kiepska splu i tamu pju snatvornaje. Možna skazać, što takaja zaležnaść u mianie jość.
Dzieści dźvie hadziny na dzień u mianie idzie na sport (zbolšaha — boŭłderynh, a jašče bieh i futboł). 30 chvilin — na niamieckuju movu i ŭsio astatniaje na pracu.
«NN»: Niamieckuju movu praciahvaješ vučyć dla kamunikacyj pa pracy ci jość dumki pra pierajezd?
IŠ: Ja žyvu ŭ Varšavie, i niamiecki pašpart atrymlivać dakładna nie źbirajusia. Niamieckuju vuču ŭžo čatyry hady. Heta prosta praces, jaki mnie padabajecca.
«Ja hłybiej u biełaruskim kantekście, čym, napeŭna, 99% emihrantaŭ»
«NN»: Palityka zaŭsiody zajmała vialikuju častku tvajho žyćcia, jaki kavałak ad jaje zastaŭsia?
IŠ: Ja žyvu ŭ biełaruskim kantekście. Ja nie pačynaju dzień z čytańnia polskich navin, dapuścim. Ja, kaniečnie, minimalna ŭ kursie, što adbyvajecca ŭ polskaj palitycy, ale čaściej čytaju «Našu Nivu» — tak skłałasia histaryčna.
Časam ja adčuvaju siabie kiepska praz svaju zahłyblenaść u biełaruski kantekst. U tym płanie, što vialikaja kolkaść ludziej z majho atačeńnia ŭžo im nie žyvuć i nie razumiejuć, čamu mnie cikava, umoŭna kažučy, što tam Pavieł Łatuška napisaŭ pra Sabalenka.
Ja hłybiej u biełaruskim kantekście, čym, napeŭna, 99% emihrantaŭ.
Ja nie staŭ častkaj polskaha hramadstva i nie chaču hvałtoŭna źmianiać svaju identyčnaść. Ja adčuvaju siabie častkaj biełaruskaj supolnaści — adpaviedna, mnie bolš cikava, što adbyvajecca ź biełaruskim hramadstvam.
Akramia taho, majučy žurnaliscki bekhraŭnd, ja stvaraju prabiełaruskija prajekty. Naprykład, karotkija videa pra Biełaruś 1000belarus — u jaho ŭžo pa piać miljonaŭ prahladaŭ štomiesiac, pry hetym jon amal całkam robicca štučnym intelektam.
Takija ž prajekty ŭ mianie jość pra Polšču, futboł. Budzie jašče pra biełaruskuju muzyku. Adnak pra Polšču ja našmat horš rablu kantent, bo horš aryjentujusia.
«NN»: Chto ŭ biełaruskaj palitycy ciabie siońnia najbolš razdražniaje, a kamu ty reśpiektuješ?
IŠ: Ja nie budu kazać, chto mianie razdražniaje, bo niama sensu. Ja ŭvohule nie baču sensu siońnia zajmacca palitykaj, bo jaje jak by niama i ty, chutčej za ŭsio, prajhraješ.
Možna zajmacca kulturaj. U hetym sensie Ryhor Astapienia (darečy, moj adnakłaśnik) i Paša Macukievič u miežach inicyjatyvy «Maldzis» robiać krutyja rečy. I ja adzin ź ich miecenataŭ, ja rehularna achviaruju hrošy na nabyćcio niejkich biełaruskich kulturnych kaštoŭnaściaŭ.
Mnie padabajecca, što vynik hetaj dziejnaści bačny adrazu i zrazumieły na budučyniu.
«Pry dapamozie ŠI ja mahu ŭsio»
«NN»: Akramia ŭsiaho, što my tut zhadali, ty jašče i prahramuješ. Adkul stolki enierhii? Heta jakraz nastupstvy SDUHšnaha składu?
IŠ: U tym liku. Plus mianie ščyra zachaplaje toje, što siońnia adbyvajecca sa štučnym intelektam. Prytym što my tolki ŭ pačatku hrandyjoznych pieramien.
Ja hetym cikaŭlusia čaćviorty hod i vielmi mocna prasunuŭsia. Pry dapamozie ŠI ja mahu ŭsio: zapuskać biznesy, stvarać dadatki, vieści svaje 60 kanałaŭ u instahramie. I ja taksama chutka mahu tut pabačyć vynik.
Raniej, dapuścim, kab stvaryć dadatak, ja musiŭ vydatkavać šmat hrošaj, sabrać kamandu… Ciapier ad idei da pačatku realizacyi moža minuć dźvie hadziny. Košt raspracoŭki faktyčna staŭ nulavym.
Ja nie chaču hučać jak niejki trenier-matyvatar, ale, dziakujučy tamu, što ja avałodaŭ kodynham i ŠI, ja štomiesiac mahu zarablać dadatkovyja 3‑4 tysiačy dalaraŭ na niejkich pabočnych prajektach, tamu što ja ich mahu rabić vielmi chutka. Viadoma, što na starcie ja byŭ u bolš vyhadnaj i kamfortnaj pazicyi, čym umoŭny taksist, jaki vymušana pracuje pa 12 hadzin, kab apłacić arendu. Ale toje, što ja maju — taksama vynik majoj pracy. U mianie nikoli nie było adpačynku i amal nikoli niama vychodnych. Ja pracuju ŭvieś čas.
Plus ciapier praca prynosić mnie zadavalnieńnie, tamu što ja mahu sam zrabić usio, što prydumaju. Heta nievierahodnaja reč.
Ja stary čałaviek u tym sensie, što pamiataju, jak źjaŭlaŭsia internet. Jak ja rabiŭ u pačatku nulavych pieršyja sajty — na narod.ru, sajt salihorskaha «Maładoha frontu» i ŭsiakaje inšaje, i ŭ mianie prosta vybuchała ŭ hałavie ad asensavańnia, što ja mahu niešta stvaryć u internecie i ludzi mohuć tudy zajści. Zaraz hetaha «vaŭ» u sotni razoŭ bolš.
«NN»: Z takim hrafikam nibyta nie zastajecca miesca asabistamu žyćciu…
IŠ: Ja ciapier nie ŭ adnosinach. Žyvu adzin, i mnie padabajecca. Ja zaŭsiody albo zdymaŭ kvateru z kimści, albo žyŭ z baćkami. A ciapier u mianie ŭpieršyniu źjaviłasia mahčymaść pažyć adnamu, i mnie kamfortna.
«NN»: Na šlachu da samaŭdaskanalvańnia ci źviartaješsia ty jašče pa pasłuhi kaśmietołahaŭ, naprykład? Dla lepšych efiektaŭ.
IŠ: Tak, ja chadžu da kaśmietołahaŭ, rablu ŭkoły i roznyja banalnyja pracedury. Botaks — top. Ja nie admoŭlusia ad jaho nikoli. U mianie ŭsio žyćcio byli zmorščyny, ciapier ich niama, i mnie heta padabajecca.
«Praca ŭ Ńju-Jorku pakul u minus»
«NN»: U lutym vaša kampanija Clean Whale zrabiła pieršy testavy zakaz u ZŠA. Niahledziačy na raniejšy dośvied z adkryćciom 15+ klininhaŭ u roznych jeŭrapiejskich krainach vy pryznalisia, što tam usio pajšło (i idzie) vielmi składana. U čym hałoŭnaja pryčyna?
IŠ: Amierykancy inšyja, ź inšaj kulturaj spažyvańnia. I naša razumieńnie taho, jak pracujuć roznyja servisy, było bližejšym da polskaha rynku, čym da amierykanskaha.
Nie mahu skazać, što my da kanca zrazumieli, jak pracavać u ZŠA. My pracujem, u nas časam byvaje pa 20‑25 zamovaŭ u dzień, płacim padatki, ale heta praca ŭ minus. Pakul nie mahu skazać, ci skončym my bitvu ŭ Ńju-Jorku pieramohaj.
«NN»: Chto kiruje novym amierykanskim kirunkam?
IŠ: U nas tam zarehistravanaja firma, z farmalnym dyrektaram, jakomu płacicca zarobak. Ale realna biznes kirujecca z Varšavy. U nas niama mety adkryć šmat fizičnych ofisaŭ. My imkniomsia da taho, kab stać vialikim markiet-płejsam chatnich pasłuh. My chočam ich pracesiravać i zabiaśpiečvać biaśpieku tranzakcyj.
CleanWhale — dosyć kampaktny biznes. Siońnia ŭ nas 35 supracoŭnikaŭ. I my płanujem, što ŭ budučyni pavialičym abjomy pracy ŭ 10 razoŭ, pry hetym asabliva nie pašyrajučy kamandu. Siońnia adzin čałaviek zakryvaje adzin horad i tysiaču zamovaŭ, a zmoža zakryvać ceły rehijon i 15 tysiač.
My vielmi mocna źmianili biznes za apošni čas u płanie ŭžyvańnia ałharytmaŭ. U płanie prymianieńnia sučasnych technałohij u toj ža Jeŭropie prosta niama ničoha takoha blizka ŭ klininhu.
U Varšavie i Bierlinie my vyjhravali kankurencyju ŭ vielmi vialikich kampanij. Ź dziasiatkami miljonaŭ inviestycyj. I jany vychodzili z rynku, prapanoŭvajučy nam nabyć ich łakalny biznes. Ale dla nas tam nie było ničoha cikavaha technałahična.
Darečy, mnie raniej było soramna, što ŭ nas nie internacyjanalny biznes u tym sensie, što ŭ nas niama mieniedžaraŭ-palakaŭ u Polščy, naprykład. Albo tamu, što ŭ jeŭrapiejskaj kampanii razmaŭlajuć pa-rusku. Ale madel pracujučaja ž, tamu ja vyrašyŭ, što nie varta pierabudoŭvać siabie tolki tamu, što tak skazali inviestary ci niedzie tak napisana. U nas svoj šlach.
«NN»: Kolki hrošaj vy ŭžo ŭkłali ŭ amierykanskaje adhalinavańnie?
IŠ: Kab prosta adkryć klininh u Ńju-Jorku, treba nul hrošaj nasamreč. Naniaŭ ludziej, zapuściŭ instahram i pajšoŭ šukać klijentaŭ. Ale kab zrabić mienavita biznes, treba minimum 150 tysiač dalaraŭ inviestycyj (tym bolš dla našaj madeli, bo my sprabujem zavajavać značnuju častku rynku i rabić šmat pryborak i inšych zakazaŭ). Ty musiš raźvitacca z takoj sumaj i čakać, kali jana vierniecca.
Dla paraŭnańnia, kab zapuścić kampaniju ŭ Varšavie, Šyły vydatkavali kala 15 tysiač jeŭra, u Krakavie — kala 4 tysiač jeŭra.
U Štatach vielmi darahaja rekłama, chočacca adznačyć. Asabliva ŭ Ńju-Jorku.
«NN»: Asnoŭny prybytak vam siońnia prynosić polski rynak?
IŠ: Polšča vyjhraje pa maštabach, bo tut my pakryli šmat haradoŭ. Kali havaryć pra maržynalnaść biznesu, to ŭ lidarach u pryncypie moža być i Čechija.
«NN»: Kolki «Čysty Kit» apracoŭvaje zakazaŭ u miesiac?
IŠ: Kala 10‑15 tysiač.
U nas zaraz šmat pasłuh, nie tolki pryborka. Možna zamović navat čystku kanalizacyi — pryjedzie vialiki aŭtamabil sa śpiecabstalavańniem. My pradajom «lidy»: heta i drobny ramont kštałtu farbavańnia ścien, i ramont techniki, i navat łandšaftnyja pasłuhi. Naša meta — prapanoŭvać usio, što tak ci inakš źviazana z domam. Ale pryborka zastajecca bazaj.
«Klijent zaŭždy maje racyju» — heta ź niejkich padručnikaŭ pa biznesie, mała źviazanych z realnaściu»
«NN»: Usio vyhladaje supier, ale voś adzin z realnych kiejsaŭ: vašy kliniery pryjechali na pryborku paśla ramontu ŭ śviežuju kvateru i padrapali vokny, a taksama novuju vannu. Jak takoje mahčyma ŭ kampanii — lidara rynku?
IŠ: Heta jašče nie horšaje, što mahło zdarycca. Heta asablivaść spažyvieckaha biznesu. Takoje budzie zdaracca, bo ludziej niemahčyma kantralavać. Moža, źjaviacca robaty i vypraviać situacyju. Ale pakul tut pracujuć ludzi, jany buduć spaźniacca, psavać rečy, užyvać ałkahol (jak robiać, naprykład, kiroŭcy taksi i inšyja).
Pytańnie tolki ŭ kolkaści takich prablemnych situacyj i ŭ tym, nakolki my možam na heta reahavać. U nas isnuje staronka, dzie bačnyja ŭsie našy adznaki ŭ biahučym časie (dublujucca jany i ŭ sacsietki). I vy možacie pahladzieć, ź jakoj vierahodnaściu vam sapsujuć vannu. Vierahodnaść kiepskaj pryborki ŭ nas składaje 3,7%. Na 100 pryborak čatyry projduć kiepska. Jašče niekalki zusim nie adbuducca, tamu što da klijentaŭ nichto nie pryjedzie. Heta častka masavaha servisu.
Viadoma, kali b my rabili maleńkuju kampaniju siamiejnaha typu, dzie my z bratam by jašče i prybirali, to, napeŭna, u 100% vypadkaŭ usio było b vydatna. Ale ŭ našym maštabie ja nie mahu takoje paabiacać klijentam.
I kali vy voźmiecie vodhuki luboj inšaj klininhavaj kampanii ci markietpłejsa i pačniacie vyvučać kiepskija vodhuki, jany ŭsie buduć adnolkavyja. Niešta sapsavali, kuryli na zamovie, byli hrubyja, nie pryjechali, spaźnilisia, niefiksavany košt. Nivodnuju z hetych prablem nichto nie ŭ stanie vyrašyć da kanca. Ale my sprabujem zrabić, naprykład, lepšy metčynh klinieraŭ i klijentaŭ — zamacoŭvać kankretnych ludziej za kankretnym domam.
«NN»: Jak vy pracujecie ź vidavočnymi pravałami klinieraŭ?
IŠ: Klijent atrymlivaje prapanovu niejkaj razumnaj z našaha punktu hledžańnia kampiensacyi. Jość taksama strachoŭka, kali niešta, umoŭna, zharyć.
Kali ty chočaš vialiki biznes, u ciabie dakładna buduć kiepskija situacyi. Adzinaje, što skažu: my ź vierahodnaściu ŭ 90% nie zhubim kiepski vodhuk, dzie b jon ni byŭ napisany. I my jaho adrasujem vykanaŭcam. Vialikaje pytańnie, što budzie dalej. Heta zaležyć ad mnohich faktaraŭ. Navat samaja kiepskaja adznaka nie aznačaje aŭtamatyčna, što čałaviek nie budzie dalej vykonvać zamovy. My nie zaŭždy prymajem bok klijentaŭ. «Klijent zaŭždy maje racyju» — heta ź niejkich padručnikaŭ pa biznesie, mała źviazanych z realnaściu.
«NN»: Jaki ŭ vas miesiačny abarot na siońnia?
IŠ: Ja b nie chacieŭ nazyvać kankretnyja ličby. Havorka idzie pra miljony złotych (bolš za $250 tysiač), ale ŭ prastory jeŭrapiejskich hihantaŭ my ŭsio jašče «mały biznes». Nas navat niama ŭ topie-100 kampanij Polščy ź biełaruskimi karaniami. Tak, siarod klininh-kampanij u Polščy mienavita ŭ našaj śfiery (praca z pryvatnymi klijentami ŭ ich damach i kvaterach) my ŭžo numar adzin. Ale heta śviedčyć tolki pra toje, što hara, na jakuju my leźli, nie takaja vysokaja. Pry hetym «źnizu» praciahvajuć paŭźci i sprabavać śpichnuć ciabie z hetaha miesca šmat inšych kampanij i pryvatnych vykanaŭcaŭ.
«NN»: Asnoŭnyja mety ŭ vas dalej na pašyreńnie hieahrafii i kolkaści zakazaŭ?
IŠ: U nas płan raści chutka, mocna i technałahična ŭ pieršuju čarhu. Ź bližejšaha — achapić jašče 20‑30 haradoŭ svaimi pasłuhami.
Jak tolki my pabačym, što biznes u Ńju-Jorku pačaŭ prynosić hrošy, my adrazu dadamo 20‑30 haradoŭ u ZŠA.
Niaprošanaja parada, jakuju ja sam dla siabie kaliści sfarmulavaŭ: biznes — heta ličby i heta nie chobi. Ty možaš pierachacieć hetym zajmacca, ale i biez hetaha sapraŭdny biznes pavinien praciahvać isnavać.
Hod tamu ja jašče dumaŭ: «Nam treba najmać dadatkovych ludziej nie z našaha asiarodździa, kab prynieści niejkuju inšuju kulturu kiravańnia biznesam». Ale paŭhoda tamu ja zrazumieŭ, što biznesam budzie kiravać štučny intelekt. I mnie nie treba najmać dadatkovaha dyrektara. Kaniečnie, soft-skiły časta važnyja. Ale ŭ nas nie publičnaja kampanija, kab pierad inviestarami spravazdačycca i im imknucca spadabacca.
«Amal štohod ja hublaju hrošy jak inviestar»
«NN»: Raskažy pra svoj dośvied inviestycyj. U 2024 ty ŭkłaŭ hrošy ŭ try bary — dva ŭ Varšavie i adzin u Bierlinie, ale nie vyhareła. Čamu?
IŠ: Heta nie adziny biznes, na jaki ja davaŭ hrošy i jaki mnie asabliva ničoha nie prynosiŭ. Amal štohod ja stračvaju hrošy jak inviestar. Vielmi redka ŭ mianie niešta atrymlivajecca.
Jość takaja kazka pra toje, što treba ŭkłaścisia ŭ dziesiać biznesaŭ, bo niešta ź ich abaviazkovy vyharyć i pryniasie płady. Ale Alaksandr Knyrovič paćvierdzić vam, što heta niapraŭda (biznesmien ukłaŭ u startapy sotni tysiač dalaraŭ — nie streliŭ nivodzin. — NN).
Z barami byŭ taki momant, što my z bratam pačali krychu zarablać hrošy i było pamknieńnie kudyści ich skiroŭvać. Zdavałasia, što biełarusy jak cudoŭnyja majstry — jany paŭsiul svoj biznes mohuć zrabić jašče bolš paśpiachovym, čym u Biełarusi. Ale z barami nie tak. Tam miljon niuansaŭ.
Praŭda ŭ tym, što hastrabiznes — heta apošni biznes, u jaki treba iści, kali ty raźličvaješ na prybytak. Tak ci inakš, my atrymali nieacenny dośvied, tak by mović. Stali inšymi (paśmichajecca).
«NN»: Kolki hrošaj vy pachavali ŭ hetym prajekcie — try bary ŭ adnym?
IŠ: Moža, sumu adnapakajovaj kvatery ŭ Minsku. Častka hrošaj nam viarnułasia. A jašče ja atrymaŭ tam vialikuju źnižku na ałkahol. Škada, što ŭžo tady ja redka piŭ (paśmichajecca).
«NN»: Z čaho paraiš pačać tym, chto chacieŭ by taksama pačać zarablać pry dapamozie ŠI? Ci płanuje aŭtamatyzavać častku isnych pracesaŭ u kampanii dla lepšaj efiektyŭnaści.
IŠ: Sens płanaŭ «pajdu pavučusia na kursach» siońnia amal straciŭsia. Mnie kazali: «Ty pavinien razumieć architekturu prajektaŭ, bo, kaniečnie, kod — heta top, ale ty ž nie zmožaš zrabić składanyja rečy». Ja zaraz rablu supierskładanyja rečy. Ale važniej nie prosta navučycca pisać niejki prajekt, varta padumać, jak jaho paśla raspaŭsiudžvać, prasoŭvać. Čamu hetaja ideja budzie suhučnaja inšym ludziam.
Jak z kantentam: jość ža dobry AI-kantent, cikavy i virusny, a jość niajakasny. Treba dumać, jak rabić dobra. Instrumientaŭ stanovicca šmat, jany va ŭsich, ale ź ich najaŭnaściu samoj pa sabie ty nie stanieš kankurentnym, tamu što ŭsio adno heta śviet šansaŭ.
Čytajcie knižki, vučycie movy, zajmajciesia sportam, nie hrebujcie antydepresantami pry patrebie — takija voś supierparady.
«Zarablajem 20—25 tysiač jeŭra za miesiac». Jak Ivan Šyła adkryŭ paśpiachovy biznes za miažoj
Dzie lažyć vykupleny Statut VKŁ? Pavieł Macukievič — pra toje, što biełarusy musiać sabie viarnuć
Astapienia nazvaŭ try pamyłki biełaruskaj apazicyi
Biełaruski šachcior pajšoŭ u IT. A paśla kinuŭ pracu i stvaraje svoj brend karamieli
Ciapier čytajuć
«Ciapier mnie čužaja sama kancepcyja ŭžyć niešta, čaho ty nie viedaješ». Vialikaja hutarka ź Ivanam Šyłam pra biznes, zarablańnie z dapamohaj ŠI, žančyn i botaks6
Kamientary