Siamja ajcišnicy i dalnabojščyka pierajechała ź dziećmi ź Minska ŭ polskuju viosku — jak im?

Pra plusy i minusy žyćcia ŭ polskaj vioscy devby.io raskazała byłaja minčanka Lera (imia źmieniena) — śpiecyjalistka-pačatkoviec pa Frontend-raspracoŭcy.

— My z mužam žyli ŭ Minsku z samaha naradžeńnia. Rełakavalisia ŭ Polšču, u sielskuju miascovaść za 20 km ad Poznani. Zrešty, vioskaj heta nazvać nielha, tut usio vielmi kamfortna i cyvilna, choć «sapraŭdnaja» vioska, dzie śmiardzić fiermaj, usiaho za 10 chvilin pieššu. I navokał pali, pali, pali… Dla kahości heta načny kašmar, a nam vielmi padabajecca — užo čaćviorty hod, palot narmalny.

Naša łakacyja — Tarnova-Padhurne. Heta vioska (ale ja b jaje nazvała pasiołkam haradskoha typu) u Poznańskim paviecie Vielikapolskaha vajavodstva. Centr adnoj z najbahaciejšych hmin u Polščy, jakaja chutka raźvivajecca.

Čamu?

My pajechali mienavita ŭ navakolli Poznani, bo muž tut byŭ raniej pa pracy i zrazumieŭ, što nam tut spadabajecca. Mienavita ŭ hetaje miastečka my trapili vypadkova: znajšli adpaviednaje žyllo mienavita tut. Chacieli pryharad, kab było mienš ludziej i mašyn, a bolš pryrody. U vyniku tak i atrymałasia, prosta supierskaje miesca dla siamji z maleńkimi dziećmi.

Kryteryi pry vybary miesca, jakija my ŭličvali, — u pieršuju čarhu cana arendy 3‑pakajovaha žylla, pobač pavinny byli być škoła i sadok dla dziaciej, adpaviednaja infrastruktura. U nas troje dziaciej, zaraz užo ŭsie školnicy.

Praca

Ja pracuju ŭ IT. Muž byŭ dalnabojščykam, zaraz sprabuje pierajści ŭ ajcišku, ale pakul nie atrymlivajecca. Treba znoŭ iści hrošy zarablać, ciažka, kali tolki adzin u siamji pracuje. Dy i lehalizavacca nie atrymajecca, patrebny vysoki dachod, bo ŭ nas vialikaja siamja.

Ja pracuju addalena, i nievialikaje Tarnova-Padhurne mianie zadavalniaje amal całkam. Raniej było ŭvohule idealna. Ale za try hady ŭžo ŭsie navakolli ŭzdoŭž i ŭpopierak vyvučyli, chočacca čahości novaha. Zaraz trochi nie chapaje mierapryjemstvaŭ, kulturnaj prahramy. Pa ŭsio cikavaje treba jechać chvilin 30—40 na mašynie.

Infrastruktura

Plusy našaha miastečka-vioski: tut čysta, biaśpiečna (vielmi ciešyć amal poŭnaja adsutnaść ałkašoŭ i biazdomnych), dobryja darohi, pastajanna štości budujuć i adkryvajuć novaje dla ludziej. Vielizarny plus — blizkaść da pryrody. U Minsku pastajanna chaciełasia vyjechać na Isłač, na Minskaje mora. A tut 10 chvilin na rovary — i ty na voziery abo ŭ lesie. Jość navat holf-pole. Kłasnaja sietka vieładarožak, jakaja pačynajecca prosta ad doma.

Kožny hod prachodzić vielmi kłasny prabieh Bieg Lwa (leŭ — simvał Tarnova). Atmaśfiera krutaja, uvieś dzień prachodzić vystava z kučaj zabaŭ i biaspłatnaściej dla dziaciej ad miascovych firm. [Krama] Lidl razdaje sadavinu i harodninu. U hetym hodzie było bieźlimitnaje biaspłatnaje maroziva ad dźviuch kampanij. Dla dziaciej pravodziać Bieg Lwiątek [»Bieh ilvianiat»]. Kožny hod vakoł hetych prabiehaŭ ažyjataž, usie chočuć udzielničać.

U Tarnovie dźvie pačatkovyja škoły. Pabudavali novy licej z absiervatoryjaj, sadki taksama jość. Kali małodšaja była maleńkaja, nam udałosia trapić u dziaržaŭny sadok pobač z domam. Płacili kala 470 złotych na miesiac (kala 130 dalaraŭ. — NN). Zaraz u centry abnaŭlajuć dziciačuju placoŭku i park pa kłasnym sučasnym prajekcie z fantanami.

Budujecca šmat novaha žylla, jość z čaho vybrać dla kupli svajho. Praŭda, ceny na žyllo tut usio ž davoli vysokija.

Jość kłasny vialiki akvapark Tarnowskie Termy. Jość technikum. Jość vialikaja Biedronka, Lidl, Dino, Delikatesy, Sklep Polski, Żabki. Jość niekalki kaviarań, kandytarskija, apteki, šmat bankaŭ (PKO, Pekao, Erste).

U kancy vieraśnia adkryjuć handlovy centr z roznymi tannymi kramami typu CCC, Pepco, Sinsay i h.d. Taksama zdorava, mnie nie chapaje tut narmalnych vialikich kram. Jašče zastałasia ŭ mianie zvyčka ŭsio kuplać u kramach, choć para b užo pryvykać da Allegro.

Jašče adzin vialiki plus — blizkaść da mnohich cikavych łakacyj. Kala troch hadzin na mašynie adździalajuć nas ad Bierlina, Urocłava, mora i hor. Pobač jość aeraport. Važnyja trasy A2 i 92 pryvablivajuć siudy šmat łahistyki i biznesu, a za košt padatkaŭ ad firm bahataja i sama hmina.

Ź minusaŭ — dalekavata jeździć u Poznań na hramadskim transparcie, da centra vychodzić kala hadziny ź pierasadkami. Pakul dajedzieš, užo ničoha nie chočacca, akramia jak pajeści i palažać u łožku. A potym ža jašče nazad stolki ž jechać! Na mašynie, kaniešnie, dabiracca praściej.

U FB-pablikach čytała, što miascovym palakam u Tarnavie nie chapaje tramvaja ci elektryčki da Poznani, restaranaŭ.

Miedycyna

Pra achovu zdaroŭja: tut jość paliklinika, kudy my źviartalisia pa terminovych pytańniach. Ź inšymi pytańniami jeździm u Poznań abo susiedniaje miastečka da stamatołaha.

Intehracyja

Ludzi tut vielmi dobryja, pryvietlivyja. Mnohija nas užo viedajuć, bo viedajuć našych dziaciej praz škołu abo biehavy kłub. Jašče my biehajem z palakami ŭ miascovym biehavym kłubie, što vielmi kruta dapamahaje intehravacca ŭ hramadstva.

Z tryma dziećmi dla nas vielmi važnaja biaśpieka. Jany sami mohuć chadzić u škołu i nazad, hulać na placoŭcy kala doma, bo ŭsiudy kuča znajomych, mała mašyn, jakija zaŭsiody sastupajuć darohu. Tut niama lichačoŭ i dziŭnych pjanych kampanij.

Za čatyry hady ni razu nam ci dzieciam nie skazali «śpierdalać» (vymietacca) adsiul. Naadvarot, my paznajomilisia sa šmatlikimi kłasnymi siemjami. Dzieci zastajucca z načoŭkaj u siabroŭ-palakaŭ. Ja dumaju, što ŭ maleńkim miastečku značna praściej z adaptacyjaj i intehracyjaj u miascovaje hramadstva, čym u vialikim horadzie. I heta kruta.

Jašče adzin plus: u maleńkim horadzie nie tak šmat imihrantaŭ, u tym liku ŭkraincaŭ, i tamu niama kłasaŭ u škole, u jakich sabrali b u kuču adnych zamiežnikaŭ. Maksimum u kłasie 3—4 zamiežniki, tamu našy dzieci chutka i spakojna intehravalisia i vyvučyli movu. Uzrovień adznak pa vypusknych ekzamienach paśla 8 kłasa ŭ miascovych škołach navat vyšejšy, čym u škołach Poznani. Zrešty, samyja rejtynhavyja licei, viadoma, u horadzie.

Tym nie mienš, biełarusaŭ tut vielmi šmat, u kožnym šmatkvaternym domie ŭ nas jość pa niekalki znajomych siemjaŭ. Usie taksama ź dziećmi, niekatoryja ŭžo kupili svajo žyllo.

Lehalizacyja

Vidavočnaja pieravaha dla mihrantaŭ — nie samyja vialikija čerhi na DNŽ. A padavacca možna nie tolki ŭ Poznani, ale i ŭ Kališy ci ŭ Lešnie, dzie jašče mienš ludziej.

• 4
• 2
• 0
• 1
• 0
• 0
• 0
• 0