Biełarusy Biełastoččyny zdoleli adstajać biełaruskamoŭny dziciačy sadok. Ułady chacieli abjadnać jaho sa škołaj

Na pres-kanfierencyi prezident Biełastoka Tadevuš Truskalaski zajaviŭ, što horad admoviŭsia pieršapačatkovych płanaŭ abjadnańnia biełaruskamoŭnaha dziciačaha sadka №14 i pačatkovaj škoły №4. Heta stała vynikam pratestu biełaruskaj mienšaści i dalejšych pieramoŭ ź miascovaj uładaj.

Truskalaski adznačyŭ, što biełaruskaja supolnaść niapravilna interpretavała fakty. Ułady chacieli abjadnać ustanovy, a nie likvidavać adnu ź ich. Prezident Biełastoka padkreśliŭ, što da temy abjadnańnia ŭsio roŭna možna budzie viarnucca, ale nieviadoma, praź jaki pramiežak času.

Tadevuš Truskalaski adznačyŭ, što z-za admieny abjadnańnia nie atrymajecca sekanomić biudžetnyja srodki. Na padtrymańnie abiedźviuch ustanoŭ idzie štohod kala 300 tysiač złotych. 

Sutnaść kanfliktu była ŭ tym, što biełaruski sadok №14 — ustanova, u jakoj biełaruskaja mova — nie dadatkovaja mova vykładańnia, a bazavaja. Ułady Biełastoka vyrašyli abjadnać jaho z pačatkovaj škołaj №4, dzie taksama biełaruskaja mova vyvučaje častkaj dziaciej, ale ŭžo jak dadatkovaja.

U baćkoŭ i dyjaspary hetyja płany vyklikali zaniepakojenaść. Była zapuščanaja pietycyja ŭ abaronu sadka, jakuju padpisali amal 700 čałaviek. Vystupili suprać abjadnańnia navučalnych ustanoŭ i biełaruskija arhanizacyi rehijona.

Asnoŭnuju sutnaść pretenzij i zaściaroh biełarusaŭ Padlašša niadaŭna papularna vykłaŭ u Fejsbuku adzin ź viadomych dziejačaŭ miascovaj biełaruskaj supolnaści, stvaralnik sajta kamunikat.org Jarasłaŭ Ivaniuk: 

«Čamu suprać hetaha pratestujuć biełaruskija arhanizacyi? Sprava ŭ tym, što ciapier dziciačy sadok (pradškolle) heta ŭstanova z polskaj i biełaruskaj movami navučańnia. U škole — tolki achvotnyja dadatkova mohuć vyvučać biełaruskuju movu. Abjadnańnie ich u adzin kompleks pahražaje tym, što taksama i ŭ pradškolli biełaruskaja mova budzie tolki dadatkovaj i dla achvotnych».

Pakolki ŭ Polščy ad hramadskaj dumki niemahčyma prosta admachnucca, jak heta robicca ŭ Biełarusi, to ŭłady musili prymać pad uvahu hołas biełaruskaj hramadskaści. Upieršyniu prajekt abjadnańnia škoły i sadka pavinny byli razhladać na pasiedžańni Biełastockaj haradskoj rady jašče miesiac tamu, 17 studzienia. Ale paśla źjaŭleńnia pietycyi prezident Biełastoka Tadevuš Truskalaski tady vykraśliŭ hety prajekt z paradku dnia siesii.

A ciapier voś ad papiarednich płanaŭ uvohule admovilisia. Prynamsi pakul.

Praŭda, jość u spravie biełaruskaj adukacyi na Biełastoččynie i jašče adzin niuans, jaki taksama zakranaŭ u svaim dopisie Jarasłaŭ Ivaniuk:

«Vielmi balučaj spravaj źjaŭlajecca taksama i toje, što ŭ škole dzieci biełaruskich emihrantaŭ, u jakich niama polskaha hramadzianstva, nie mohuć vyvučać biełaruskuju movu razam ź dziećmi biełaruskaj mienšaści. Vice-prezident horada Biełastok Rafał Rudnicki nie adzin raz u aficyjnych listach da biełaruskich arhanizacyj pisaŭ, što ŭ hetaj spravie biełarusy pavinny źviartacca ŭ dypłamatyčnyja pradstaŭnictvy Respubliki Biełaruś».

• 0
• 0
• 0
• 0
• 0
• 0
• 0
• 0