Emihranty ciapier buduć płacić kamunałku pa poŭnaj. Ale nie ŭsie
U «darmajedski» dekret unieśli źmieny. Ciapier apłačvać kamunalnaja pasłuhi ŭ poŭnym pamiery pavinny buduć i tyja, chto źjechaŭ za miažu. Tłumačym, jak budzie pracavać miechanizm i kaho zakranuć novaŭviadzieńni. Spojler: heta tyčycca nie ŭsich krain i jość adna łaziejka.
Zhodna sa źmienami ŭ zakon, da liku hramadzian, jakija nie ŭdzielničajuć u finansavańni dziaržaŭnych vydatkaŭ, dadalisia emihranty, u tym liku pracoŭnyja, jakija znachodziacca nie ŭ Biełarusi bolš za 30 dzion zapar. Raniej sa śpisu «darmajedaŭ» vyklučali tych, chto moh paćvierdzić fakt pracy za miažoj. Pryčym nie mieła značeńnia, dzie vy pracavali.
«Ciapier, kali čałaviek prosta znachodzicca za miažoj, nie važna, pracuje jon tam ci vučycca, to jon budzie apłačvać pa poŭnym košcie. Vyklučeńnie tyčycca tolki krain, što ŭvachodziać u JEAES.
Kali vy pajechali na pracu ŭmoŭna ŭ Rasiju, usio budzie jak i raniej. Vy paćviardžajecie, što tam pracujecie, dasyłajecie damovu kamisii i jana nie ŭklučaje vas u śpisy płacielščykaŭ. Kali vy pajechali ŭ Polšču, to nie maje značeńnia, čym vy zajmajeciesia, kali adsutničajecie bolš za 30 dzion», — patłumačyli na haračaj linii Minpracy i sacabarony.
Niahledziačy na toje, što sama pastanova była pryniataja 25 sakavika, ulik hramadzian, jakija traplajuć pad dziejańnie abnoŭlenaha zakona, viadziecca ŭžo z 1 sakavika.
Vychodzić, što kali biełarus (ułaśnik žylla) źjechaŭ u krainu, jakaja nie ŭvachodzić u JEAES, i znachodzicca tam bolš za 30 dzion zapar, to niezaležna ad taho, čym jon tam zajmajecca, jon patrapić u śpisy.
«Kali mienš za 30 dzion — naprykład, viernieciesia, pabudziecie i nazad źjedziecie, — u takim vypadku nijakich pretenzij da vas nie budzie», — udakładnili na haračaj linii.
Padačaj źviestak pra hramadzian, što vyjechali za miežy Biełarusi, budzie zajmacca Dziaržaŭny pahraničny kamitet. Jon musić pieradavać infarmacyju ŭ Ministerstva pracy i sacabarony štomiesiac.
Kamunałku pa poŭnaj nie buduć spahaniać, kali hramadzianin vyjechaŭ z pastajannaha miesca žycharstva na termin bolš za 10 dzion, naprykład, na lačeńnie. Kab skarystacca takoj «źnižkaj», vam nieabchodna zahadzia papiaredzić słužby ŽKH pra svaje namiery zatrymacca za miažoj.
Šrajbman z kalehami prapanavali pakrokavy płan deeskałacyi adnosin Biełarusi i ES53
Kamientary