«Nie atrymali ničoha, akramia 15 kasak». Kanflikt pamiž pałkom Kalinoŭskaha i Stryžakom — što zdaryłasia
Połk Kalinoŭskaha abvinavačvaje fond «Bajsoł» u tym, što nie atrymaŭ ad ich amal nijakaj dapamohi. Sa spravazdačy fondu vynikaje, što nie ŭsio tak adnaznačna.
Połk Kalinoŭskaha vypuściŭ videa, dzie kaža, što nie supracoŭničaje z «Bajsoł», a fotazdymki kalinoŭcaŭ toj u zborach nibyta vykarystoŭvaje biez dazvołu.
«Za ŭvieś čas praviadzieńnia takich zboraŭ połk Kalinoŭskaha nie atrymaŭ nijakaj dapamohi ad «Bajsoł», akramia 15 kasak», — zajaŭlajuć u pałku.
Niekatoryja biełaruskija bajcy inšych padraździaleńniaŭ, što vajujuć va Ukrainie, taksama śćviardžajuć, što nie atrymali abiacanaj dapamohi.
«My nie atrymlivali dapamohi i hrošaj ad Stryžaka, aproč Ford Ranger», — kamientuje ŭ hetym ža videa kamandzir internacyjanalnaha bataljona «Tytan» Ihar «Janki» Noman.
Narakańni jość u bajcoŭ antyaŭtarytarnaha atradu i byłoha adeskaha atradu imia Lićvina (z apošnim u kalinoŭcaŭ raniej byŭ kanflikt, taksama praz vałanciorskuju dapamohu).
Stryžak na hetyja abvinavačvańni adreahavaŭ u fejsbuku.
«Siabry, chiba ŭžo ŭsie bačyli zajavu pałka Kastusia Kalinoŭskaha, jakaja źjaviłasia na ich aficyjnym kanale. I ja chaču skazać, što ja zaprašaju pradstaŭnikoŭ pałka Kastusia Kalinoŭskaha da adkrytaj i ščyraj razmovy. Ja da hetaj razmovy hatovy. Čakajem na adkaz ad pradstaŭnikoŭ pałka Kalinoŭskaha», — byŭ łakaničny suzasnavalnik fonda «Bajsoł».
Fond rychtavaŭ pramiežkavuju spravazdaču pa 100 dniach vajny. Ź jaje bačna, što na padtrymku biełaruskich bajcoŭ va Ukrainie było sabrana 143,8 tysiačy jeŭra, ź ich vypłačana 62,8 tysiačy.
Sa spravazdačy vynikaje, što adeskamu atradu «Lićvin» pieradali Nissan Navara (za 8375 jeŭra). Na Ford Ranger dla bataljona Ihara «Janki» pajšło 15,5 tysiačy jeŭra. Dla hetaha ž bataljona zakupleny Mitsubishi Pajero IV za 10,8 tysiačy jeŭra (aŭto pakul u pracesie dastaŭki).
Za košt donarskaj i partniorskaj dapamohi dla pałka Kalinoŭskaha było zakuplena 100 turnikietaŭ, 15 taktyčnych zaplečnikaŭ, 20 kieŭłaravych šlemaŭ. Z hetych srodkaŭ taksama 2300 jeŭra materyjalnaj dapamohi vydatkavali atradu «Lićvin».
Aproč hetaha ŭ spravazdačy jość inšyja hrafy vydatkaŭ — na vałancioraŭ, miedykaŭ, połk «Pahonia».
Ciapier čytajuć
Ukraina ŭpieršyniu adkazała na rasijskija ataki na składy «Novaj pošty» simietryčnymi ŭdarami pa chabach «Vajłdbieryz». Padmaskoŭny zhareŭ daščentu1111
Kamientary