Chto toj dyśpietčar, jaki zapisaŭ na telefon zahady śpiecsłužbista pra pasadku samalota Ryanair i pieradaŭ ich ICAO?

Dyśpietčar Aleh Halehaŭ pracavaŭ u «Biełaeranavihacyi» jak minimum z 2010 hoda. Na pačatku lipienia jon pavinien byŭ paśla adpačynku vyjści na źmienu, jaho proźvišča stajała ŭ raskładzie dziažurstvaŭ, ale na pracu jon tak i nie pryjšoŭ. 

Kalehi viedali, što heta Aleh byŭ dziažurnym dyśpietčaram 23 maja 2021 hoda, kali ŭ Minsku pasadzili rejs kampanii Ryanair, i tamu adrazu zatryvožylisia. Pry režymie ludzi źnikajuć pa-roznamu. Chtości znachodzicca ŭ śledčym izalatary, a kahości, jak Viktara Hančara ci Źmitra Zavadskaha, bolš nikoli nie znachodziać.

«Asabista ja nie bačyŭ Aleha daŭno, — skazaŭ «Našaj Nivie» ŭ lipieni 2021 hoda jaho kaleha. — Chodziać čutki, što jon źnik. Kalehi nie mohuć ź im źviazacca i chvalujucca: da jaho niemahčyma dazvanicca, jon pavydalaŭ svaje sacyjalnyja sietki. Načalstva aficyjna ničoha nam nie tłumačyła».

Aleh Halehaŭ žyŭ u Minsku razam ź siamjoj, ciaham niekalkich dzion nam nie ŭdałosia dazvanicca da ich pa chatnim telefonie. Heta dało padstavy dumać, što Halehaŭ nie źnik, a vyjechaŭ razam z rodnymi.

Namieśnik hiendyrektara «Biełaeranavihacyi» Ivan Hierłoŭski spačatku skazaŭ, što Halehaŭ z červienia ŭ adpačynku, i jon ničoha nie viedaje pra jaho źniknieńnie ci zvalnieńnie. Paśla pytańnia, čamu ŭ arhanizacyi takija doŭhija adpačynki, Hierłoŭski ŭdakładniŭ:

— Tak, my, kali ščyra kazać, zvanili, pytalisia, dzie jon znachodzicca, jak jon tam [nierazborliva].

— Vy jamu zvanili? 

— Nu zvanili dzie jon žyvie, u cieščy… Hetym adździeł kadraŭ zajmaŭsia. 

Aleh Halehaŭ — vychadziec z Hruzii. Jon pierajechaŭ u Biełaruś užo ŭ śviadomym uzroście, paznajomiŭsia ź biełaruskaj Hannaj, jakaja była ŭ jaho krajach u kamandziroŭcy. 

«Dumaju, jon źjechaŭ da svajakoŭ u Hruziju», — skazaŭ «NN» jašče adzin kaleha dyśpietčara. 

My sprabavali źviazacca z Aleham i jaho žonkaj, ale mabilnyja nie adkazvali, sacyjalnyja byli sietki vyčyščanyja. Zastavaŭsia tolki Instahram, dzie byŭ całkam źmienieny niknejm, vydalenyja amal usie fałoviery, a ŭ zakrytaha profilu nie było zastavačnaha fota. Anałahičnaja situacyja z žonkaj: tolki niadaŭna, atrymaŭšy novyja siertyfikaty hieštalt-terapieŭta (prafiesija, jakaja zvyčajna praduhledžvaje aktyŭnuju prysutnaść u sacsietkach), jana zakryła ŭsie svaje profili. 

Pieršaje paćviardžeńnie infarmacyi pra toje, što avijadyśpietčar źbieh ź Biełarusi ŭ Polšču i raskazaŭ pra pasadku Ryanair, źjaviłasia tolki praz šeść miesiacaŭ, na pačatku studzienia.

New York Times napisała, što były avijadyśpietčar raskazaŭ polskim śledčym usio, što jamu viadoma pra pasadku samalota z Pratasievičam.

Sa spasyłkaj na dyrektara Departamienta nacyjanalnaj biaśpieki Polščy Stanisłava Žaryna vydańnie pierakazała pakazańni śviedki pra toje, što supracoŭnik KDB u dzień pasadki samalota znachodziŭsia na dyśpietčarskaj vyšcy i kantralavaŭ dziejańni avijadyśpietčara. Na praciahu ŭsiaho incydentu aficer KDB padtrymlivaŭ pastajannuju telefonnuju suviaź z kiraŭnictvam.

«Pierabiežčyk ciapier dapamahaje polskim prakuroram pabudavać jurydyčnuju bazu suprać biełaruskich čynoŭnikaŭ na budučym sudzie», — pisała «Ńju-Ërk tajms».

Paviedamlałasia, što Halehaŭ pieršapačatkova źviazaŭsia z pasolstvam ZŠA ŭ Varšavie, ale amierykancy nakiravali jaho da polskich uładaŭ.

Tak razhortvałasia jašče adna historyja supraćstajańnia režymu i biełaruskaha naroda.

Kali vy, Aleh Halehaŭ, čytajecie nas, źviažyciesia z nami praz naš biaśpiečny @Nasa_Niva_Bot u Telehramie abo praz [email protected].

• 281
• 0
• 60
• 27
• 136
• 35
• 84
• 0