U Ispanii znajšli try nielehalnyja tytuniovyja fabryki, dzie pracavali ŭkraincy
Palicyja Ispanii ŭ niadzielu abviaściła, što nakryła try nielehalnyja tytuniovyja fabryki, na jakich u ciažkich umovach pracavali ŭkraincy — jak lehalnyja ŭciekačy, tak i nielehalnyja imihranty, paviedamlaje Bi-bi-si.
Padčas hetaj apieracyi ŭ roznych rehijonach Ispanii byli aryštavanyja adrazu 27 čałaviek, kanfiskavanyja 10 ton tytuniovaha liścia i 3,5 młn pačkaŭ cyharet na ahulnuju sumu 37,5 młn jeŭra.
Jak paviedamlaje palicyja, ukraincy, jakija pracavali na fabrykach, tulilisia ŭ bytoŭkach na ich terytoryi i bajalisia vychodzić za miežy. Siarod ich jość jak uciekačy ad vajny, jakija zajechali ŭ Ispaniju na zakonnych padstavach, tak i tyja, chto trapiŭ u krainu nielehalna.
Pavodle źviestak AAN, za čas vajny ŭ Jeŭropie byli zarehistravanyja amal vosiem miljonaŭ uciekačoŭ z Ukrainy, bolš za 160 tysiač ź ich dabralisia da Ispanii.
U apublikavanym u listapadzie dakładzie Jeŭraparłamienta havaryłasia, što ŭ Jeŭrasajuzie raście kolkaść vypadkaŭ nielehalnaj ekspłuatacyi ŭkrainskich biežancaŭ, jakija čaściakom z-za svajho harotnaha stanovišča i niaviedańnia movy vymušanyja bracca za lubuju pracu.
Ispanskaja palicyja ŭ niadzielu raspaviała, što vyjaŭlenyja joju try padpolnyja fabryki byli raźmieščanyja ŭ roznych kancach Ispanii: pad Sieviljaj na poŭdni, pad Valensijaj na ŭschodzie i ŭ rehijonie Ła Ryjocha na poŭnačy. Pieršaja była vyjaŭlenaja jašče ŭ kancy 2021 hoda, i dziakujučy hetamu palicyja ŭrešcie zmahła nakryć i dźvie inšyja.
Tytuń dla vytvorčaści cyharet, pa danych palicyi, uvoziŭsia kantrabandaj, i mahutnaści fabryk dazvalali vyrablać bolš za paŭmiljona pačkaŭ za dzień. Pradukcyju pradavali i ŭ Ispanii, i ŭ inšych krainach.
Akramia tytuniu i cyharet, palicyja aryštavała raskošnyja aŭtamabili, juvielirnyja vyraby i vialikija sumy najaŭnymi, znojdzienyja ŭ arhanizataraŭ hetaj sietki. Jak kažuć palicyjanty, tyja žyli raskošnym žyćciom u kurortnaj Marbielji.
Ciapier čytajuć
Novym śpikieram Kaardynacyjnaj rady, chutčej za ŭsio, stanie Arciom Bruchan6
Kamientary