«Nabraŭ 10-12 kh, apuch, zapłyŭ». Były futbalist Arciom Mileŭski paśla pačatku vajny ŭpaŭ u depresiju
Viadomy ŭkrainski futbalist biełaruskaha pachodžańnia Arciom Mileŭski aficyjna zaviaršyŭ karjeru ŭ 2021 hodzie, paśla taho vioŭ aktyŭnaje śvieckaje žyćcio: vioŭ instahram, zdymaŭ videa dla svajho jutub-kanała «Mila», udzielničaŭ u roznych šou. Z pačatkam vajny heta ŭsio stała nieaktualnym, a ŭ novych realijach były hulec siabie pakul nie znajšoŭ, piša «Trybuna».
Padobna, u byłoha futbalista pačałasia depresija praz vajnu. Pra heta niadaŭna vykazali zdahadku ŭkrainskija žurnalisty Siarhiej Bałotnikaŭ i Andrej Sieńkiŭ u adnym z vypuskaŭ KDK.
«Jon ciapier znachodzicca ŭ Kijevie i praciahvaje adpačyvać. Ja tak razumieju, što jaho psichałahična padbiła vajna. Jon ničoha nie choča, zakinuŭ błoh — tam z pačatku vajny ničoha nie vychodzić. Jeździć na vajnu, vałancioryć, rabić ruchi jon nie choča, hulać za vieteranaŭ abo pravodzić niejkija dabračynnyja matčy jon nie choča, vučycca na treniera ci mieniedžara taksama nie choča. Heta ŭvohule nie jaho.
Nie viedaju, ci jość u jaho realnaja depresija, ale mnie padajecca, u jaho prafiesijnaja depresija. Jon nie moža siabie realizavać u takich umovach», — skazaŭ Bałotnikaŭ.
Sieńkiŭ sustreŭ Mileŭskaha ŭ adnym z baraŭ Kijeva i adznačaje źmieny ŭ źniešnaści byłoha futbalista:
«Vyhladaŭ jon nie tak, jak raniej. Vidać, što nabraŭ kiłahramaŭ 10-12, apuch, zapłyŭ. Jon, vidać, mieŭ schilnaść da lišniaj vahi», — skazaŭ žurnalist.
Mileŭskaha paraŭnoŭvajuć ź jaho siabram Alaksandram Alijevym. Paśla 24 lutaha hety ŭradženiec rasijskaha Chabaraŭska pieražyŭ kałasalnuju transfarmacyju i zmoh usich ździvić aktyŭnaj pazicyjaj. Jak kažuć, jon užo zmoh pierabudavać svajo žyćcio paśla zaviaršeńnia karjery hulca, a voś Mileŭski pakul nie.
«Kali pačałasia vajna, Alijeŭ byŭ poŭnaściu adaptavany da žyćcia paśla futboła. Jon znachodziŭsia pobač ź piśmiennymi ludźmi i razumieŭ, što budzie abaraniać krainu. Jon ciapier znachodzicca ŭ šerahach Uzbrojenych sił Ukrainy, pracuje.
U Arcioma situacyja zusim inšaja, bo jon tolki adychodziŭ ad zaviaršeńnia karjery. Heta vielmi ciažki praces, kali čałaviek znachodzicca ŭ pošuku siabie. Pačałasia vajna — i heta jašče bolš zaciahnuła ŭ depresiŭny stan, ź jakoha jon, jak ja baču, jašče nie vyjšaŭ. Mileŭskaha, na maju dumku, treba pasprabavać niejak padtrymać i intehravać u žyćcio…
Ja ź im razmaŭlaŭ. Na jaho mocna paŭpłyvała vajna, kali jon ubačyŭ, jak bamiać, jak pamirajuć ludzi. Jon kaža: «Ja nie razumieju, navošta heta ŭsio robicca».
Chaču, kab usie zrazumieli, što jon vielmi hłyboka prasiaknuŭsia ŭsimi padziejami i jamu nie abyjakava», — raspavioŭ ukrainski kamientatar i aŭtar jutub-kanała «Bambardzir» Raman Biebiech.
Apošniaje na hety momant intervju Mileŭski daŭ u traŭni minułaha hoda kanału «Futboł», jakoha bolš nie isnuje. Tam jon pryznaŭsia, što straciŭ žadańnie hulać u futboł, a zaadno adznačyŭ padtrymku Alijeva.
«Saša klikaŭ mianie ŭ terabaronu. Ale ja nie mahu stralać u ludziej. Chto b jany ni byli — Izrail tam, nie viedaju, Rasija. Jany, viadoma, končanyja. Toje, što jany narabili… Ja nie budu ni ŭ kaho stralać. U Sani svoj vybar i svoj šlach. Ja dapamahaju pa-inšamu.
To razhružajem što-niebudź, to kiefir, chleb kamuści pryniasiom na achovu. Chto čym. U kožnaha svoj vybar. I kožny dapamahaje pa-svojmu. Tak, moža, Saša byŭ i pakryŭdžany. Ale my ŭsio roŭna razam, my žyvyja», — skazaŭ Mileŭski.
Ukrainskaj «Trybunie» nie ŭdałosia źviazacca ź Mileŭskim — jon nie adkazaŭ na zvanki i paviedamleńni. Zrešty, niadaŭna instahram Arcioma ažyŭ — upieršyniu z 5 červienia 2022 hoda jon zapościŭ videa pra svoj hod u fota.
«365 days, z mnogimi poznakomilsia za etot god, vsem jmu ruku!!! vsem respect!!! bravo Ukraine!!», — dadaŭ podpis Arciom u svaim firmovym styli.
Mahčyma, heta sihnał, što Mileŭski vychodzić z kryzisu i pieraadoleŭ svaje mientalnyja prablemy. Ale heta nie dakładna.
Ciapier čytajuć
Chto z palitviaźniaŭ vyjšaŭ na svabodu 16 vieraśnia POŬNY ŚPIS18
Kamientary
vieteranaŭ abo pravodzić niejkija dabračynnyja matčy jon nie choča, vučycca na
treniera ci mieniedžara taksama nie choča. Heta ŭvohule nie jaho.
platkarki niejkija, a nie žurnalisty