19‑hadovaja rasijanka zasvoiła biełaruskuju lepš za mnohich biełarusaŭ i ciapier maryć pra sini pašpart zamiest čyrvonaha
Jaŭhienii Šafarastavaj — 19 hadoŭ. Dziaŭčyna naradziłasia i vyrasła ŭ Tomsku, ale ŭ padletkavym uzroście pierajechała ŭ Brest z baćkami — tatu prapanavali tam pracu.
Za paru hadoŭ Ženia vyvučyła biełaruskuju movu na vydatna, i zdała CT pa joj usiaho z adnoj pamyłkaj. Akramia taho, rasijanka papularyzuje biełaruskuju movu ŭ svaim błohu i maryć atrymać biełaruskaje hramadzianstva.
«Vyrašyła stać sapraŭdnaj biełarusačkaj, bo ŭsie vakoł mnie kažuć, što ja bolš biełaruska, čym niekatoryja biełarusy pa naradžeńni», — kamientuje Jaŭhienija.
Užo ŭ škole Ženia pačała ciahnucca da biełaruščyny, chacia, jak raskazvaje jana, kłasnaja nastaŭnica ŭvieś čas nahadvała, što dziaŭčyna razmaŭlaje «niačysta».
«Kłasnaja kazała, što ŭ mianie jarka vyjaŭleny ruski akcent, i ja była ŭpeŭnienaja ŭ hetym z 8‑ha kłasa, chacia biełarusy i ŭkraincy, jakija hladziać maje videa zaraz, upeŭnivajuć mianie ŭ advarotnym».
U kancy navučalnaha hodu ŭ 10‑m kłasie, dziaŭčyna pieraviała sacsietki na biełaruskuju movu, kab jašče lepš padciahnuć svoj uzrovień.
«Ja mahła pościć pa 10 storys na dzień, i ŭsie — na biełaruskaj movie. Usio pisała sama, tolki kali zabyvała niejkaje słova, zachodziła ŭ internet», — zhadvaje Jaŭhienija. Takaja taktyka, pa jaje słovach, i dapamahła joj zdać CT pa biełaruskaj movie ŭsiaho z adnoj pamyłkaj.
Budučy školnicaj, Jaŭhienija zaniała treciaje miesca na respublikanskim konkursie z daśledčaj pracaj na biełaruskaj movie, pryśviečanaj murałam i ajdentycy chat Bresta i stryt-kultury horada.
«Hučańnie biełaruskaha maŭleńnia vielmi mianie supakojvaje i natchniaje adnačasova», — kaža dziaŭčyna.
Siońnia Jaŭhienija vučycca na budaŭničym fakultecie BNTU. Imkniecca być aktyŭnaj studentkaj. Tak, jana stała finalistkaj konkursu «Mis BNTU — 2025».
Taksama Ženia zajmajecca tancami — vystupaje ŭ kalektyvie «Buddens» na svaim ža fakultecie.
Pra toje, što Jaŭhienija — rasijanka, viedała abmiežavanaje koła znajomych, pakul jana padzialiłasia hetym u sacsietkach. U kamientarach mnohija vykazvali sumnievy, što rasijanka moža tak dobra razmaŭlać pa-biełarusku. Kab dakazać, Ženi pryjšłosia prademanstravać svoj pašpart.
Ženia i sama adčuvaje siabie bolš biełaruskaj, tamu vyrašyła źmianić hramadzianstva i atrymać biełaruski pašpart. U svaim ža błohu jana dzielicca svaimi znachodkami biełaruskich brendaŭ, zdymaje ahlady na biełaruskija kaviarni i raskazvaje pra stylovy ramont u internacie svaimi rukami.
«Takim novym biełarusam my radyja».
«Takich my sardečna zaprašajem u našu biełaruskuju siamju».
«Rasijanka razmaŭlaje pa-biełarusku! Navat biełarusy šmat jakija nie razmaŭlać, reśpiekt!» — nie chavajuć zachapleńnia kamientatary.
«Naša Niva» — bastyjon biełaruščyny
PADTRYMAĆ
Kamientary