Na svabodzie Pavieł Biełavus, zasnavalnik kultavaj kramy Symbal.by
Kulturnicki mieniedžar nie vyjazdžaŭ ź Biełarusi paśla pačatku masavych represij. Pa jaho pryjšli ŭ kancy 2021 hoda. Paŭłu Biełavusu prysudzili 13 hadoŭ źniavoleńnia. Siońnia jon vyjšaŭ na volu.
Kulturnicki mieniedžar trapiŭ u hrupu palitviaźniaŭ, vyzvalenych 16 vieraśnia paśla pryjezdu amierykanskaj delehacyi ŭ Minsk.
Biełavusa zatrymali 15 listapada 2021‑ha paśla vykliku ŭ milicyju. Paśla hetaha aktyvist trojčy trapiŭ na sutki — u sumie naźbirałasia 35 dzion. Dalej jaho pieraviali ŭ SIZA, dzie vystavili kryminalnaje abvinavačvańnie.
Paŭła asudzili pa čatyroch kryminalnych artykułach: art. 342 (udzieł u pratestach), art. 361 (zakliki da sankcyj), art. 361‑1 (stvareńnie ci ŭdzieł u ekstremisckim farmavańni) i art. 356 (zdrada dziaržavie). Vynikovy prysud — 13 hadoŭ źniavoleńnia.
Biełavus adbyvaŭ svoj termin u škłoŭskaj kałonii №17.
Na voli jaho čakali žonka i dvoje dziaciej.
Pavieł Biełavus naradziŭsia ŭ Lidzie ŭ 1987 hodzie. Skončyŭ hieafak u Bresckim dziaržuniviersitecie, jašče ŭ junactvie zacikaviŭsia žurnalistykaj i aktyvizmam.
U pačatku 2010‑ch jon supracoŭničaŭ jak žurnalist z «Radyjo Svaboda». Taksama Biełavus — adzin z arhanizataraŭ śviatkavańnia 100‑hodździa BNR u 2018-m, zasnavalnik i były dyrektar tvorčaj placoŭki «Art Siadziba».
U 2014‑m Biełavus zasnavaŭ kramu nacyjanalnaj simvoliki Symbal.by, jakaja nabyła asablivuju viadomaść letam 2020-ha. Tady ŭ kramie pradavalisia cišotki i nalepki z nadpisam «PSICHOZ%» — adsyłka da vykazvańniaŭ Łukašenki pra «karanavirusny psichoz» i idei pra rejtynh Łukašenki ŭ 3%.
Ułady pačali cisnuć na Symbal.by, i kramu daviałosia začynić. Dziasiatki biełarusaŭ pryjšli padtrymać kramu ŭ apošni dzień pracy — tady čarhu žorstka razahnali siłaviki.
«Naša Niva» — bastyjon biełaruščyny
PADTRYMAĆ
Kamientary