Ceny na kvatery dasiahnuli piku i pojduć uniz? Voś što kažuć ryełtary
Siaredniaja cana kvadrata ŭ Minsku pa prapanovach amal dasiahnuła $2500. Spytali ŭ ryełtaraŭ, čaho čakać dalej.
Ceny na rekordnym uzroŭni
Za hod ceny ŭ stalicy vyraśli na 30%. Pa prapanovach košt kvadrata na siaredzinu vieraśnia ŭžo składaje $2499.
U paraŭnańni z 2022‑m — pačatkam 2023 hoda ceny na kvatery ŭ Minsku vyraśli pryblizna ŭ dva razy: z $1150—1250 da amal $2500.
Što da realnych ździełak, to mietr u Minsku dasiahnuŭ amal $2295.
I daražeje nieruchomaść nie tolki ŭ stalicy. U Breście, jaki źjaŭlajecca samym darahim abłasnym centram, za apošni hod ceny vyraśli na 27% — da $1378 pa prapanovach. U Hrodnie, lidary pa kolkaści ździełak siarod abłasnych centraŭ, — na 20%, da $1233. Navat u Viciebsku — samym tannym abłasnym centry — za mietr u siarednim prosiać užo $1047.
Ceny rastuć, a što sa ździełkami?
Pry hetym źnižajecca kolkaść ździełak, što samo pa sabie jašče nie abaviazkova aznačaje nabližeńnie pieryjadu źmianšeńnia cen.
Ale ryełtary, ź jakimi nam udałosia parazmaŭlać, adznačajuć, što rynak nie taki ŭžo aktyŭny, jak byŭ jašče adnosna niadaŭna.
Rynak u stahnacyi
«Miesiacy dva rynak znachodzicca ŭ stahnacyi, popyt adčuvalna prasieŭ, choć prodažy, kaniečnie, jość», — adznačyŭ adzin sa śpiecyjalistaŭ.
Ekśpiert adznačaje, što bolšaść ździełak adbyvajecca z vykarystańniem kredytaŭ. A popyt najbolš zaŭvažna źniziŭsia pa darahich abjektach.
I pakolki prasiadaje nie tolki biełaruski rubiel adnosna dalara i jeŭra, ale i rasijski rubiel, to i biez taho nievialiki popyt na kvatery z boku rasijan taksama źmienšyŭsia.
U cełym ža, na dumku ryełtara, kvadrat u Minsku ciapier znachodzicca na piku. Pryčyn, čamu ceny musiać praciahvać raści papiarednimi tempami, jon nie bačyć.
«U žniŭni popyt byŭ mienšy, čym u lipieni. Rubiel pačaŭ tańnieć, i adpaviedna častka pakupnikoŭ zataiłasia», — tłumačyć surazmoŭca.
Pry hetym abvału cen jon taksama nie prahnazuje. Maŭlaŭ, kali prasić za kvateru adekvatnuju rynačnuju canu, to za miesiac-dva možna znajści pakupnika. Naturalna, kali havorka idzie pra siaredni cenavy siehmient.
Ahułam ciapierašni čas jon nazyvaje dobrym dla tych, chto choča pradać kvateru, bo kvadrat kaštuje doraha, jak nikoli raniej, i ludzi hatovyja za jaho płacić. Što da prahnozaŭ, to ryełtar schilajecca da taho, što najbližejšym časam situacyja z cenami budzie zastavacca bolš-mienš stabilnaj.
Dva tydni na prycenku
Inšy śpiecyjalist ź Minska taksama adznačaje, što kali za kvateru prasić adekvatnyja hrošy, to pradać jaje možna davoli chutka.
«Inšaja sprava, što jość niamała ludziej, jakija, nazirajučy za rostam cen, pačynajuć vystaŭlać kvatery pa vidavočna zavyšanych cenach», — tłumačyć jon i dadaje, što ŭ takich vypadkach prapanuje klijentam vystavić kvateru tydni na dva pa ich canie, i kali budzie vidavočna, što popyt z takoj canoj nulavy, to pačynać ruchacca ŭ bok źnižeńnia.
Na dumku ryełtara, čakać, što ceny praciahnuć raści, jak heta było ŭ papiarednija hady, dakładna nie varta.
«Minułym i pazaminułym letam ździełak było bolš. I ŭžo ciapier jość peŭnaje dadatkovaje prasiadańnie popytu, bo ceny i biez taho vysokija, a ŭ dadatak troški padaražeŭ dalar, tamu ŭ rublach jany vyraśli jašče vyšej», — dadaje ekśpiert.
Pry hetym ryełtar nie vyklučaje, što niejkaje nievialikaje padaražeńnie moža praciahnucca.
«Ale dakładna nie budzie takoha rostu, jak byŭ letaś ci pazaletaś», — ličyć śpiecyjalist.
Što ŭ rehijonach?
Ryełtarka z Hrodna adznačyła, što situacyja, jakaja nazirajecca hetym letam, adroźnivajecca ad minułahodniaj.
«Kali letaś sa studzienia ceny pajšli imkliva raści, to mahło być tak, što paśla vystaŭleńnia kvatery davodziłasia padymać canu praz vysoki popyt. I ludzi niaredka pradavali kvatery prykmietna daražej, čym płanavałasia. Ciapier takoha niama. Chutčej naadvarot — časam davodzicca pieraaceńvać kvateru, bo jana nie pradajecca», — kaža śpiecyjalistka.
Standartnym ža terminam prodažu kvatery jana nazyvaje 1—3 miesiacy.
«Častka pradaŭcoŭ vystaŭlaje kvateru na prodaž z raźlikam: kali pa dobraj canie zabiaruć, to pradam, a kali nie — to nie. Zredku takoje vystrelvaje, ale heta chutčej vyklučeńnie. Sioleta my ŭžo nie nazirajem takoj situacyi, kali praź imklivy rost cen ludzi śpiašajucca nabyć kvateru chutka — bo aścierahajucca, što praź miesiac cana vyraście jašče bolš i zamiest dvuchpakajoŭki daviadziecca kuplać adnapakajoŭku», — kaža ryełtarka.
U Breście ŭsio stabilna?
Bresckaja ryełtarka śćviardžaje, što popyt na kvatery ŭ Breście stabilny, jak i ceny.
«Ceny ciapier vysokija, kvatery pradajucca, tamu čas dla prodažu ciapier dobry», — ličyć śpiecyjalistka.
Vystaŭlać ceny pa viersie rynku ryełtarka raić tolki tady, kali čałaviek nie śpiašajecca z prodažam.
«Kali kvatera ŭ dobrym miescy i jana doŭha nie pradajecca, to heta značyć, što cana zavysokaja, bo pa adekvatnym košcie kvatery pradajucca narmalna», — zapeŭniła ryełtarka.
Ciapier čytajuć
Masavyja aryšty aficeraŭ prajšli na avijabazie ŭ Mačuliščach — abvinavačvajuć u suviaziach z apazicyjaj42
Masavyja aryšty aficeraŭ prajšli na avijabazie ŭ Mačuliščach — abvinavačvajuć u suviaziach z apazicyjaj
Julijana Šamietaviec z «Kibierpartyzanaŭ» stała maci — raskazvaje pra dekretny adpačynak u ZŠA i toje, ci sapraŭdy možna sumiaščać pracu z maciarynstvam1818
Kamientary