Statystyčny pakazčyk kaža, što biełarusy ŭžo bahaciejšyja za palakaŭ i navat italjancaŭ. Jak takoje mahčyma?
Biełarusy nibyta mohuć kupić na svoj siaredni zarobak bolš, čym pałova Jeŭropy. Ale jość niekalki niuansaŭ pry padlikach.
Nastupnyja za Bielhijaj
Składana znajści adzin univiersalny pakazčyk, kab padličyć, žychary jakoj krainy bahaciejšyja, a jakoj — biadniejšyja. U kožnaj ź mietodyk jość svaje plusy, ale jość i niedachopy.
Adno z papularnych (ale taksama nieidealnych) rašeńniaŭ — paraŭnoŭvać zarobki na ruki, ale ź pieralikam na «mižnarodny dalar» (PPP) pa parytecie kupčaj zdolnaści. U takim razie ŭličvajecca, što za adzin dalar u Biełarusi možna kupić bolš, čym va ŭmoŭnaj Šviejcaryi.
U anhłamoŭnaj viersii artykuła «Śpis jeŭrapiejskich krain pa siaredniaj zarabotnaj płacie» pa hetym pakazčyku Biełaruś znachodzicca na 19‑m miescy siarod 48 krain Jeŭropy — u pieršaj pałovie.
Uśled za Biełaruśsiu iduć Italija, źviestki pra jakuju nie abnaŭlalisia z 2023 hoda, Polšča, u jakoj raźliki robiacca pa stanie na lipień 2026 hoda, jak i ŭ našaj krainie. Jašče dalej — Rasija, Charvatyja i Słavienija.
Hledziačy na tyja ličby, možna pryjści da vysnovy, što siaredniestatystyčny biełarus žyvie krychu lepš, čym siaredniestatystyčny palak i rasijanin, bo na svoj zarobak nibyta moža dazvolić sabie bolš.
Ci sapraŭdy heta tak?
Ekśpiert BEROC Nastaśsia Łuzhina padobny padychod da acenki dabrabytu nasielnictva nazyvaje nie zusim dakładnym.
Dla ŭzroŭniu acenki ekanamičnaha raźvićcia i ŭzroŭniu materyjalnaha dabrabytu lepš vykarystoŭvać VUP krainy pa parytecie kupčaj zdolnaści na dušu nasielnictva, a nie siarednija zarpłaty.
Jak minimum z pryčyny taho, što ŭ realnym žyćci ludzi traciać hrošy nie tolki na tavary miascovaj vytvorčaści, transpart abo ŽKH, jakija ŭ Biełarusi, naprykład, subsidujucca dziaržavaj, adznačaje ekanamist.
A voś da ŭsiaho transhraničnaha (luby impart, pajezdki, nabyćcio valuty) mižnarodny dalar (PPP) nie maje dačynieńnia — tam dziejničaje naminał: Biełaruś €758 čystymi suprać €1539 u Polščy i €2017 u Italii.
Ale kali paraŭnoŭvać prosta ličby siarednich zarobkaŭ u pieravodzie ŭ dalary ci jeŭra, to karcina atrymajecca taksama skažonaj, jak i ŭ vypadku pieraliku zarpłaty ŭ mižnarodny dalar.
To-bok toj fakt, što siaredni zarobak u Finlandyi ŭ čatyry razy vyšejšy, čym u Biełarusi, nie kaža, što ŭ siarednim finy žyvuć u čatyry razy bahaciej za biełarusaŭ.
Idealnaha mietadu nie isnuje
«Tamu dadzienyja VUP pa parytecie kupčaj zdolnaści na dušu nasielnictva buduć bolš abjektyŭna apisvać karcinu. I kali my budziem paraŭnoŭvać Polšču i Biełaruś pa hetym pakazčyku, to pieravaha ŭžo budzie iści nie na karyść našaj krainy», — tłumačyć Łuzhina.
Tak, pa mietodycy MVF, u 2026 hodzie (prahnazavany) VUP pa parytecie kupčaj zdolnaści na dušu nasielnictva ŭ Polščy składaje amal 59 792 mižnarodnych dalaraŭ. U Biełarusi ž hety pakazčyk MVF aceńvaje na ŭzroŭni 35 616 mižnarodnych dalaraŭ.
«Heta značyć, što palaki, pavodle takoha padliku, u siarednim u 1,68 razu majuć bolš vysoki ŭzrovień materyjalnaha dabrabytu ŭ paraŭnańni ź biełarusami. Taki mietad taksama nie na 100% dakładny, ale najbolš relevantny.
Dla bolš poŭnaj acenki varta taksama paraŭnać, naprykład, faktyčnaje indyvidualnaje spažyvańnie. Pry hetym VUP pa parytecie kupčaj zdolnaści na dušu nasielnictva taksama pakazvaje dynamiku, što razryŭ u ekanamičnym raźvićci pamiž krainami pavialičvajecca: dziesiać hadoŭ tamu, u 2016 hodzie, VUP pa parytecie kupčaj zdolnaści na dušu nasielnictva ŭ Polščy byŭ u 1,56 razu bolš, čym u Biełarusi».
U SIZA KDB adšukaŭsia padpałkoŭnik Zara, jakoha siłaviki ličać analitykam Sachaščyka. Jak jon apynuŭsia ŭ Biełarusi — nieviadoma12
Kamientary
Ahulnaviadomy ž fakt. Dziaržaŭnaja statystyka časta złaŭžyvaje hetaj "siaredniaj".