«Jon lehienda». Hrodziency šukali taho samaha dobraha kiroŭcu z aŭtobusa. Akazałasia, Leanida viedaje ŭvieś horad
Adny ŭspomnili, jak jon vinšuje sałon z Kaladami, Vialikadniem i 8 Sakavika. Inšyja — jak žartuje, čakaje tych, chto spaźniajecca, i padkazvaje, na jaki aŭtobus možna pierasieści.
Nahodaj stała historyja hrodzienki, apublikavanaja pierad Dniom horada. Kala 21:20 jana išła pa ciomnaj vulicy pad mocnym daždžom. Pobač spyniŭsia pusty aŭtobus, jaki jechaŭ u depo, i kiroŭca paklikaŭ dziaŭčynu ŭ sałon:
— Chutčej siadajcie, a to nohi pramoknuć i zachvarejecie!
Paźniej jana pierasieła ŭ inšy aŭtobus. Pakolki na nastupny dzień vulicu Lenina pavinny byli pierakryć, kiroŭca papiaredziŭ pasažyraŭ pra źmienu maršrutu. Ale zrabiŭ heta nie suchoj słužbovaj frazaj:
— Rabiatki, zaŭtra vulica Lenina budzie pierakrytaja, pajedziem inšym maršrutam. Tam dzietki buduć vystupać, abaviazkova prychodźcie!
«I tak na dušy ciopła stała», — napisała hrodzienka.
Dopis sabraŭ sotni padabajek i dziasiatki kamientaroŭ pra dobrazyčlivaha kiroŭcu:
«Nie pamiataju proźvišča. Pazityŭny dziadźka, zaŭsiody žartuje, kali maršrut spaźniajecca, z Kaladami i Vialikadniem vinšuje», — napisaŭ adzin z karystalnikaŭ.
«A jašče zaŭsiody prosić sastupić miesca małym, kab nie ŭpali», — dadała inšaja pasažyrka.
Jašče adna hrodzienka adznačyła, što kiroŭca papiaredžvaje ludziej, jaki transpart jedzie śledam, kali kamuści treba pierasieści. Adna z pasažyrak raskazała, jak jon paprasiŭ prabačeńnia za nievialikaje spaźnieńnie. Jana adkazała: «Dziakuj, što spaźnilisia», — bo inakš sama nie paśpieła b na aŭtobus.
Jašče ŭ krasaviku 2025 hoda ŭ instahramie źjaviłasia videa z «niejmavierna pazityŭnym kiroŭcam aŭtobusa №30».
«Jon znajomy z majoj mamaj jašče z 1990‑ch hadoŭ. Jeździć na roznych maršrutach, dziaciej rassadžvaje, sa śviatami vinšuje, lubić parazmaŭlać», — napisała adna z karystalnic.
«Mnie taksama pašancavała jechać z hetym kiroŭcam, a synu jašče i cukierka ad jaho dastałasia».
«Adzin na miljon!»
«A niadaŭna jon pracavaŭ na 34 maršrucie, i ŭ nas, miedykaŭ, paśla pracy adrazu padniaŭsia nastroj. Jašče raz vialiki dziakuj Vam vialiki za Vaš pazityŭny nastroj i kłopat».
«Jon lehienda», — tak pišuć pra jaho hrodziency.
U červieni 2025 hoda ŭ internecie źjaviłasia ŭžo cełaja «viasiołaja mini-pajezdka» na maršrucie №35.
Za styrnom kala 35 hadoŭ
Hety pazityŭny kiroŭca — Leanid Marmyš. Niadaŭna, 3 vieraśnia, jamu spoŭniŭsia 61 hod.
Leanid Marmyš naradziŭsia ŭ vioscy Vola-Krupicy Mastoŭskaha rajona. U 17 hadoŭ jon pastupiŭ u Hrodzienski dziaržaŭny aŭtavučebny kambinat. Paśla zakančeńnia navučańnia ŭ 1983 hodzie atrymaŭ pravy katehoryj B i C i pačaŭ pracavać u Słonimie, dzie razvoziŭ chleb. Praz hod jaho pryzvali ŭ vojska, słužbu jon prachodziŭ u Maskvie.
Paśla vojska Marmyš viarnuŭsia ŭ Hrodna i atrymaŭ pravy katehoryi D. U roznyja hady pracavaŭ kiroŭcam aŭtobusa ŭ Hrodnie, Minsku i Maskvie, a zatym znoŭ viarnuŭsia ŭ rodny horad. Jaho ahulny staž kiroŭcy składaje kala 35 hadoŭ.
U rozny čas pasažyry sustrakali jaho na maršrutach №2, №16, №30 i №35. Haradžanam jon zapomniŭsia najpierš manieraj razmaŭlać z pasažyrami.
Jašče ŭ śniežni 2022 hoda adna z pasažyrak pakinuła vodhuk na staroncy hrodzienskaha aŭtobusnaha parka:
«Vialikaja padziaka kiroŭcu Leanidu Michajłaviču Marmyšu, jaki pracavaŭ 16 śniežnia na druhim maršrucie. Vielmi pazityŭny. Vinšavaŭ z Novym hodam, padniaŭ nastroj usiamu sałonu. Bolš by takich».
Asabliva ŭvažliva Leanid Michajłavič stavicca da dziaciej. U jaho jość unučka Mija, jakoj ciapier kala šaści hadoŭ. Svaju asablivuju ciepłyniu da małych Marmyš tłumačyŭ prosta: jon chacieŭ by, kab i da jaho ŭnučki nieznajomyja ludzi stavilisia hetak ža ŭvažliva i pa-dobramu. Tamu pierad pačatkam ruchu jon praviaraje, ci trymajucca pasažyry za poručni i ci paśpieli dzieci sieści.
Kłopat Marmyša raspaŭsiudžvajecca i na žyvioł: padčas poźnich rejsaŭ jon nieadnarazova zaŭvažaŭ na prajeznaj častcy vožykaŭ, spyniaŭ aŭtobus i pieranosiŭ ich u biaśpiečnaje miesca.
Ciapier čytajuć
Deputat Kliševič staŭ kandydatam histaryčnych navuk z dysiertacyjaj pra razłažeńnie biełaruskaha kamsamoła ŭ časy «pierabudovy»5
Deputat Kliševič staŭ kandydatam histaryčnych navuk z dysiertacyjaj pra razłažeńnie biełaruskaha kamsamoła ŭ časy «pierabudovy»
Najbujniejšaj u śviecie fan-supolnaściu Łedzi Hahi kiruje chłopiec ź Minska, jaki adsiedzieŭ za pratesty. Rasijanie paśpiašalisia zapisać jaho ŭ svaje1616
Kamientary