Valeryi Kaściuhovaj i Taćcianie Kuzinaj prysudzili pa 10 hadoŭ kałonii
Minski haradski sud 17 sakavika ahučyŭ vierdykt u spravie palitźniavolenych Valeryi Kaściuhovaj i Taćciany Kuzinaj. Jak i prapanoŭvaŭ raniej bok abvinavačańnia, mieniedžarak asudzili na 10 hadoŭ kałonii kožnuju.
Krychu bolš za miesiac spatrebiłasia daśviedčanaj u palityčnych pracesach sudździ Dzinie Kučuk, kab ahučyć prysud pa rezanansnaj spravie. 6 sakavika pradstaŭnik prakuratury paprasiŭ pakarać fihurantak 10 hadami źniavoleńnia, na što siońnia ŭ sudździ nie znajšłosia anijakich piarečańniaŭ.
Abvinavačvanym dadzieny čas na mahčymaść asprečvańnia surovaha prysudu, choć, jak pakazvaje praktyka «pravasudździa pa-biełarusku», usie apielacyi palitviaźniaŭ zastajucca biez zadavalnieńnia abo atrymlivajuć minimalnyja karektyvy.
Žurnalistka Valeryja Kaściuhova i mieniedžarka publičnaha administravańnia Taćciana Kuzina ŭžo bolš za paŭtara hoda praviali ŭ SIZA №1 Minska na padstavie vystaŭlenych im abvinavačańniaŭ pa troch kryminalnych artykułach za «złačynstvy suprać dziaržaŭnaha ładu».
Da razhladu abjadnanaj spravy Minski haradski sud prystupiŭ tolki 6 lutaha 2023 hoda. Pryčyna nadzvyčajnaj marudnaści na etapie śledstva tradycyjna nie nazyvajecca.
Valeryju Kaściuhovu zatrymali ŭ Minsku razam z mužam-analitykam i baćkam-invalidam 30 červienia 2021 hoda supracoŭniki Kamiteta dziaržbiaśpieki. U kvatery praviali pieratrus, zabrali nośbity infarmacyi.
Mužčyn paśla dopytu adpuścili, a žurnalistku źmiaścili ŭ izalatar na Akreścina. Paźniej jaje pieraviali ŭ staličny SIZA №1, dzie jana stała padazravanaj pa nastupnych kryminalnych artykułach:
— art. 357, č. 1 (zmova ci inšyja dziejańni, učynienyja z metaj zachopu dziaržaŭnaj ułady);
— art. 361-1, č. 3 (zakliki da dziejańniaŭ abmiežavalnaha charaktaru, nakiravanyja na pryčynieńnie škody nacyjanalnaj biaśpiecy);
— art. 130, č. 3 (raspalvańnie rasavaj, nacyjanalnaj, relihijnaj abo inšaj sacyjalnaj varožaści).
Taćcianu Kuzinu siłaviki zatrymali na sutki raniej, u noč na 29 červienia, u minskim aeraporcie, kali taja źbirałasia vylecieć u Hruziju. Jana suzasnavalnica škoły maładych mieniedžaraŭ publičnaha administravańnia Sympa, ekśpiertka daśledčaha prajekta Bipart. Abvinavačańni suprać jaje identyčnyja tym, što i ŭ Valeryi Kaściuhovaj.
Abiedźviuch ekśpiertak pravaabarončaja supolnaść pryznała palityčnymi źniavolenymi i patrabuje spynić ich pieraśled za hramadzianskuju pazicyju.
Ciapier čytajuć
Za zabojstva čałavieka ŭ IČU Barysava aryštavali dvuch zekaŭ-recydyvistaŭ i 26‑hadovaha milicyjaniera Klaščonka7
Za zabojstva čałavieka ŭ IČU Barysava aryštavali dvuch zekaŭ-recydyvistaŭ i 26‑hadovaha milicyjaniera Klaščonka
«Vyzvalali niemcaŭ ad fašyzmu, a sami zastavalisia ŭ tym ža dziarmie». Apublikavana treciaja častka ŭspaminaŭ Ryhora Biarozkina pra savieckija represii2929
Kamientary