U Minsku pačaŭsia sud pa «spravie SBNŠ». Pa im prachodziać čatyry čałavieki, adzin ź ich — niepaŭnaletni
U Minskim abłasnym sudzie 29 červienia pačaŭsia sud pa spravie «Sajuza biełaruskaha nacyjanalnaha ščyta» (SBNŠ). Pa joj prachodziać čatyry čałavieki, chacia siłaviki pieršapačatkova zajaŭlali pra zatrymańnie adrazu piaciarych udzielnikaŭ, a potym jašče adnaho, piša «Viasna».
Zatrymali šaściarych, a na łavie padsudnych — čaćviora
U pačatku listapada 2022 hoda MUS daŭ spravazdaču ab zatrymańni piaciarych udzielnikaŭ zakrytaha čata «Sajuz biełaruskaha nacyjanalnaha ščyta», jaki MUS pryznała ekstremisckim farmiravańniem tydniem raniej.
U viedamstvie raspaviali, što suprać zatrymanych raspačali kryminalnuju spravu pa artykule ab stvareńni ekstremisckaha farmavańnia. Pa skrynšotach videa vidać, što čat SBNŠ składajecca z 35-ci čałaviek.
«Ustanoŭlena, što fihuranty, troje ź jakich niepaŭnaletnija, pačynajučy z 2020 hoda administravali čatyry tyktok akaŭnty i dva telehram-kanały. Na nazvanych resursach drukavałasia infarmacyja, nakiravanaja na arhanizacyju i padrychtoŭku masavych biesparadkaŭ, supraciŭ supracoŭnikam pravaachoŭnych orhanaŭ z metaj zamachu na niezaležnaść, terytaryjalnuju cełasnaść, asnovy kanstytucyjnaha ładu Respubliki Biełaruś. Zatrymanyja abjadnalisia ŭ telehram-hrupie, jakaja ŭ pačatku listapada pryznanaja ekstremisckim farmiravańniem. Jany pavinny byli znachodzić vykanaŭcaŭ dla źniščeńnia abjektaŭ infrastruktury i arhanizacyi napadaŭ na pravaachoŭnikaŭ», — śćviardžała MUS.
Zatrymlivali chłopcaŭ supracoŭniki SACHRa, AMAPa i «Ałmaza».
U pačatku listapada siłaviki pisali, što arhanizataraŭ SNBŠ zatrymali ŭ poŭnym składzie, adnak praz tydzień paviedamili pra zatrymańnie jašče adnaho — šostaha, administratara, i apublikavali videa ź im.
Što viadoma pra abvinavačvanych?
Ciapier sudziać 17-hadovaha žychara Mahiloŭskaj vobłaści Aleha Dabrydnieva, 19-hadovych žycharoŭ Homielskaj i Bresckaj abłaściej Kiryła Bałachonava i Uładzisłava Jafimoviča, 27-hadovaha žychara Hrodzienskaj vobłaści Alaksandra Rukojcia. Los jašče dvaich zatrymanych — nieviadomy.
Paśla zatrymańnia ŭ listapadzie 2022 hoda z chłopcami zapisali videa. Tady jašče niepaŭnaletni Aleh Dabrydnieŭ z Kaściukovičaŭ raspaviadaŭ, što ŭ 2021 hodzie byŭ asudžany za «razukrašivanije musarok». Jon kaža, što zatrymany za administravańnie tyktok-akaŭnta oppositia_1_, dzie «publikavaŭ ekstremisckija materyjały i abražaŭ Łukašenku». Chłopiec dadaje, što byŭ administrataram i ŭ čacie SBNŠ, pościŭ instrukcyi pa vyrabie kaktejlaŭ Mołatava i raspaviadaŭ, jak puskać ciahniki pad adchon.
26-hadovaha žychara Smarhoni Alaksandra Rukojcia MUS nazyvaje «tak zvanym apazicyjnym aktyvistam». Pradstaŭnik viedamstva adznačaje, što zatrymany byŭ raniej sudzimy za kradziež. Na kamieru chłopiec kaža, što ŭdzielničaŭ u akcyjach pratestu z 2020 da 2021 hoda i administravaŭ kanał i čat SBNŠ, dzie abmiarkoŭvalisia «radykalnyja mietady procidziejańnia dziejnaj uładzie». U paviedamleńni MUS havaryłasia, što žychar Smarhoni «prytrymlivajecca nacyjanalistyčnych idej vielmi pravaha charaktaru». Jak by ŭ paćviardžeńnie hetamu ŭ kadry źjaŭlajecca fota ściany z namalavanym na joj słavianskim arnamientam «Koniehon», padobnym da svastyki.
U pres-relizie MUS paviedamlałasia, što adzin z zatrymanych — 18-hadovy žychar Buda-Kašalova Kirył Bałachonaŭ, jaki źbiraŭsia «pajechać va Ukrainu dla ŭdziełu ŭ bajavych dziejańniach u składzie nacyjanalistyčnaha bataljona».
Na videa vosieńniu 2022 hoda byŭ jašče adzin zatrymany — adziny, čyj tvar na rolikach MUS i «Svodak cientra» schavany. Jon kaža, što ŭstupiŭ u čat pa zaprašeńni znajomaha, a zadačaj hrupy była padrychtoŭka da «budučaj partyzanskaj vajny».
Jak ciapier hučyć abvinavačańnie?
Pavodle viersii abvinavačańnia, 17-hadovy žychar Mahiloŭskaj vobłaści Aleh Dabrydnieŭ, 19-hadovyja žychary Homielskaj i Bresckaj abłaściej Kirył Bałachonaŭ i Uładzisłaŭ Jafimovič, 27-hadovy žychar Hrodzienskaj vobłaści Alaksandr Rukojć letam 2022 hoda «ŭstupili ŭ destruktyŭnuju Telegram-hrupu, jakaja ŭ listapadzie 2022 hoda pryznanaja ekstremisckim farmavańniem, a jaje infarmacyjnaja pradukcyja — ekstremisckimi materyjałami». 1 listapada 2022 hoda «ekstremisckim farmavańniem» byŭ pryznany Telegram-kanał i TikTok SBNŠ («Sajuz biełaruskaha nacyjanalnaha ščyta»).
Dabrydnieŭ i Bałachonaŭ, staŭšy administratarami takoj Telegram-hrupy, «z metaj vykazvańnia niezakonnymi sposabami svaich hramadska-palityčnych pohladaŭ i pratestu, viadzieńnia destruktyŭnaj dziejnaści zachoŭvali i zamacoŭvali ŭ joj roznyja materyjały i piśmovyja teksty, u tym liku ŭklučanyja ŭ respublikanski śpis ekstremisckich materyjałaŭ».
Śćviardžajecca, što pa svaim źmieście nazvanyja materyjały dyskredytavali orhany dziaržaŭnaj ułady i kiravańnia, u ich mielisia, naprykład:
- instrukcyi pa viadzieńni dyviersijnaj dziejnaści, u tym liku razbureńnia i paškodžańnia šlachoŭ čyhunačnaj i inšaj suviazi, vyrabie, zachoŭvańni i prymianieńni zapalnaj sumiesi;
- zakliki da zboru infarmacyi ab adździełach unutranych spraŭ i vajskovych kamisaryjatach dla ažyćciaŭleńnia ekstremisckaj dziejnaści;
- zakliki da stvareńnia partyzanskich atradaŭ u metach ździajśnieńnia złačynstvaŭ ekstremisckaj nakiravanaści, udziełu ŭ niezakonnych uzbrojenych farmavańniach, vyrabie i raspaŭsiudžvańni ahitacyjnych ulotak dla stvareńnia ŭ hramadstvie łžyvaha ŭjaŭleńnia ab uciahvańni Respubliki Biełaruś u śpiecyjalnuju vajennuju apieracyju, jakaja pravodzicca Rasijskaj Fiederacyjaj na terytoryi Ukrainy;
- inšyja teksty, u jakich prasočvalisia namiery ździejśnić złačynstvy ekstremisckaj nakiravanaści.
Pavodle viersii abvinavačańnia, Jafimovič i Rukojć «naroŭni z administratarami hrupy brali aktyŭny ŭdzieł u dziejnaści ekstremisckaha farmavańnia». U pryvatnaści, jany raźmiaščali i zachoŭvali ŭ volnym dostupie instrukcyi pa ździajśnieńni dziejańniaŭ, nakiravanych na pryčynieńnie škody nacyjanalnaj biaśpiecy Respubliki Biełaruś, videafajł i infarmacyju ab pieramiaščeńni vajskovaj techniki na terytoryi Respubliki Biełaruś, aŭdyjazapis, źmiest jakoha nakiravany na raspalvańnie varožaści i varažniečy pa prykmiecie nacyjanalnaj prynaležnaści.
Dziejańni Dabrydnieva i Bałachonava kvalifikavali pavodle č. 1 art. 361-1 (stvareńnie ekstremisckaha farmavańnia albo ŭdzieł u im), č. 1 i č. 2 art. 361-4 (sadziejničańnie ekstremisckaj dziejnaści), Jafimoviča — pavodle č. 3 art. 361-1 (stvareńnie ekstremisckaha farmavańnia albo ŭdzieł u im), č. 1 i č. 2 art. 361-4 (sadziejničańnie ekstremisckaj dziejnaści), Rukojcia — pavodle č. 3 art. 361-1 (stvareńnie ekstremisckaha farmiravańnia) i č. 1 art. 130 Kryminalnaha kodeksa (raspalvańnie inšaj sacyjalnaj varožaści abo varažniečy).
Čaćviora chłopcaŭ utrymlivajecca pad vartaj.
Kamientary