Dla fitnes-trenieraŭ uvodziać akredytacyju. Tych, kaho zatrymlivali za palityku, mohuć pazbavić prava pracavać
Śledam za advakatami i ekskursavodami «narmalizujuć» navat takuju apalityčnuju śfieru, jak fitnes. Kab pracavać fitnes-trenieram, patrebnaja budzie akredytacyja, spartovaja adukacyja, a pad katrynku i adsutnaść palityčnych sudzimaściaŭ.
Pastanova Savieta Ministraŭ, jakaja rehłamientuje prachodžańnie dziaržaŭnaj akredytacyi dla fitnes-trenieraŭ, pačała dziejničać 1 lipienia. Śpiecyjalisty majuć paŭhoda na toje, kab padrychtavacca da akredytacyi i prajści jaje.
Chto ž budzie dapuščany da pracy? Adznačym niekatoryja kryteryi.
Pierš za ŭsio treniery musiać mieć siaredniuju śpiecyjalnuju ci vyšejšuju spartovuju adukacyju abo dypłom ab pierapadrychtoŭcy pa adpaviednych śpiecyjalnaściach. Minsportu vykazvaje hatoŭnaść u vyklučnych vypadkach akredytavać trenieraŭ biez takoj adukacyi, ale pakul nieviadoma, što majecca na ŭvazie i chto moža atrymać taki šans.
Kab atrymać akredytacyju, treniery i kiraŭnictva fitnes-kłubaŭ musiać nie być pryciahnutymi da adkaznaści za «niepavažlivaje staŭleńnie da dziaržaŭnych i hramadskich instytutaŭ, u tym liku da dziaržaŭnych simvałaŭ Respubliki Biełaruś i kanstytucyjnaha ładu».
Taksama dziaržava patrabuje ad fitnes-trenieraŭ i ich kiraŭnictva nie być pryciahnutymi da adkaznaści za «ździajśnieńnie supraćpraŭnych dziejańniaŭ suprać paradku kiravańnia, hramadskaha paradku i hramadskaj maralnaści».
Pavodle zakona «Ab fizičnaj kultury i sporcie», pracavać trenierami nie mohuć i tyja biełarusy, chto pazbaŭleny prava zajmacca piedahahičnaj dziejnaściu ŭ śfiery fizičnaj kultury i sportu, u kaho jość niepahašanaja sudzimaść abo sudzimaść, jakaja nie źniataja; chto pryznany niedziejazdolnym ci abmiežavana dziejazdolnym. Spartoŭcaŭ, dyskvalifikavanych za dopinh, adchilajuć ad trenierstva na čas dyskvalifikacyi.
Astatnija patrabavańni zbolšaha datyčać abstalavańnia fitnes-centraŭ, trenažornych załaŭ i spartovych škoł, a taksama vykanańnia ŭ ich sanitarna-epidemijałahičnych normaŭ.
Praŭda, siarod abstalavańnia ŭ takich miescach pavinny prysutničać dziaržaŭnyja simvały Biełarusi.
Na prachodžańnie akredytacyi trenieram i ŭładalnikam fitnes-centraŭ dali paŭhoda. Hetaha času moža chapić, kab vyrašyć prablemy z abstalavańniem załaŭ, ale ž adukacyja trenieraŭ zojmie našmat bolš času. Na siaredniuju śpiecyjalnuju ci vyšejšuju spartovuju adukacyju treba 3—5 hadoŭ, na prachodžańnie pierapadrychtoŭki — kala paŭtara hoda, a časam i bolš.
Adzin ź biełaruskich fitnes-trenieraŭ prakamientavaŭ «Našaj Nivie» novuju pastanovu na ŭmovach ananimnaści. Mužčyna adznačaje, što sama ideja akredytacyi niebłahaja, bo tak u industryi źjaviacca standarty jakaści i jaje možna budzie vyčyścić ad niadobrasumlennych trenieraŭ. Ale da realizacyja idei jość pytańni.
«Treniery, u jakich niama takoj adukacyi, pry ŭsim žadańni nie zmohuć atrymać jaje za paŭhoda. Kali jany ciapier zapišucca ŭ Instytut pavyšeńnia kvalifikacyi pry BDUFK, [patrebnaja] adukacyja ŭ ich budzie tolki praz 18 miesiacaŭ.
Pakul čynoŭniki nie razhladajuć mahčymaści taho, kab u hety čas studenty mahli prajści akredytacyju, tamu pracavać jany zmohuć tolki praz paŭtara hoda.
U ludziej vybar: abo pakinuć industryju, abo pajści ŭ cień i pracavać biez akredytacyi. Pry druhim varyjancie im pryjdziecca zakryć IP, bo jany nie zmohuć pracavać lehalna. Takim čynam industryja sama siabie krychu padkosić.
U Biełarusi šmat nielehalnych trenieraŭ, heta nie sakret, tamu, naadvarot, varta ich prastymulavać pracavać lehalna ŭ tych standartach jakaści, jakija možna vykanać. A atrymlivajecca naadvarot: dobryja śpiecyjalisty, jakija pracujuć lehalna, mohuć pajści ŭ cień», — kaža spartoviec.
Surazmoŭca kaža, što ŭ rasijskim fitnesie takaja akredytacyja ŭžo isnuje, ale pracuje krychu inakš: tam pryvatnyja škoły trenieraŭ mohuć vydavać dypłomy ab pierapadrychtoŭcy. Ale ž u Rasii prava vydavać dypłomy atrymlivajuć «usie zapar», tamu adukacyja trenieraŭ, jak kaža surazmoŭca, tam pieratvaryłasia ŭ fikcyju.
Jość pahadnieńnie pamiž Biełaruśsiu i Rasijaj ab uzajemnym pryznańni dypłomaŭ, tamu jość šans, što rasijskija dypłomy padyduć dla akredytacyi biełaruskich trenieraŭ. Kali tak i budzie, to, pradkazvaje trenier, biełarusy prosta buduć vysyłać u Rasiju pa 200 dalaraŭ, kab atrymać dypłom i prajści akredytacyju.
Naš surazmoŭca bačyć prablemu i ŭ tym, što novaja pastanova zaciahvaje fitnes u sport, chacia nasamreč heta zusim roznyja rečy:
«Fitnes-trenieru nie treba viedać, jak vyraścić čempijona i jakija praviły ŭ spartovych dyscyplinach. Jamu treba viedać, jak pracavać ź ciełam čałavieka dziela zdaroŭja.
U sporcie cieła — instrumient dla dasiahnieńnia mety, jaho možna vykarystoŭvać jak zaŭhodna, tolki b dasiahnuć lepšaha vyniku.
U fitnesie inšaja zadača i inšy padychod. My pracujem sa zvyčajnymi ludźmi, jakija chočuć być pryhožymi i zdarovymi, dla nas cieła — heta meta, a ruchi — heta srodak. Nahruzki ŭ fitnesie vybirajucca nie dla taho, kab pakazać lepšy vynik, a kab našamu ciełu, myšcam, sustavam stała lepš, kab muskuły stali bolš mocnymi i pruhkimi».
Biantežyć surazmoŭcu i toje, čamu vučać padčas dziaržaŭnaj pierapadrychtoŭki. Tam chapaje niepatrebnych pradmietaŭ nakštałt praviłaŭ spartovych dyscyplin ci dziaržaŭnaj ideałohii, jość i słušnyja rečy, ale tam studentam nie raskazvajuć, naprykład, jak pracavać z klijentami.
U toj ža čas punkt pra adsutnaść sudzimaściaŭ za parušeńnie hramadskaha paradku i niepavažlivaje staŭleńnie da dziaržaŭnych simvałaŭ daje padstavu łukašystam vykinuć z prafiesii ludziej, jakich sudzili za pratesty.
«Naša Niva» — bastyjon biełaruščyny
PADTRYMAĆ
Kamientary