Ukrainskija pamiežniki acanili, kolki vahnieraŭcaŭ prybyło ŭ Biełaruś
Pa źviestkach Dziaržaŭnaj pamiežnaj słužby Ukrainy, pa stanie na 22 lipienia ŭ Biełarusi znachodzicca prykładna piać tysiač rasijskich najmitaŭ PVK «Vahnier». Pra heta paviedamiŭ śpikier DPSU pałkoŭnik Andrej Dziemčanka ŭ kamientary «Ukrainskaj praŭdzie».
«Dziaržaŭnaja pamiežnaja słužba Ukrainy praciahvaje ŭvažliva nazirać za situacyjaj adnosna prybyćcia i znachodžańnia ŭ Biełarusi rasijskich najmitaŭ. Adznaču, što abstanoŭka pa linii miažy zastajecca całkam kantralavanaj pahraničnymi i inšymi padraździaleńniami Sił abarony našaj dziaržavy. Usie jany papiaredžanyja ab dalejšaj ryzycy, što moža iści z terytoryi Biełarusi, jakaja, na žal, znachodzicca pad upłyvam Rasii i akazvaje joj padtrymku ŭ vajnie, raźviazanaj suprać Ukrainy», — paviedamiŭ Dziemčanka.
Jon zaznačyŭ, što spačatku, kali hrupy rasijskich najmitaŭ pačali zachodzić u Biełaruś, ich kolkaść aceńvałasia ŭ sotniach. Adnak ciapier, uličvajučy najaŭnuju infarmacyju pra hrupy pradstaŭnikoŭ pryvatnych vajskovych kampanij, ich kolkaść, viadoma, inšaja i moža siahać piaci tysiač čałaviek.
Dziemčanka padkreślivaje: takaja kolkaść dla Ukrainy niepasrednaj pahrozy nie ŭjaŭlaje, adnak Siły abarony pavinny być hatovyja da lubych situacyj, u tym liku i da niedapuščeńnia pravakacyj na miažy.
Raniej stała viadoma, što ŭ Biełaruś prybyło vosiem kałon vahnieraŭcaŭ. Jany instruktavali pad Asipovičami biełaruskich vajskoŭcaŭ, a taksama ŭdzielničali ŭ vučeńniach na palihonie Brescki. A Jaŭhien Pryhožyn zarehistravaŭ u Biełarusi kampaniju.
Ciapier čytajuć
Čamu ŭ biełaruskaj turmie tak mocna chudziejuć? Tłumačym8
Kamientary