Mnohija biełarusy, jakija pierajazdžajuć u Polšču, sutykajucca ź nieabchodnaściu vyvieźci z krainy bujnyja sumy hrošaj. Heta aščadžeńni ci srodki ad prodažu majomaści. «Most» sabraŭ historyi tych, chto niadaŭna vyrašaŭ takuju prablemu.
«Rabili pierakład usich damoŭ kupli-prodažu»
Hanna pradała ŭ Biełarusi dźvie kvatery: adnu ŭ kastryčniku minułaha hoda za 23 tys. dalaraŭ, a druhuju ŭ červieni za 65 tys. dalaraŭ. A jašče ŭ krasaviku hetaha hoda biełaruska pradała mašynu za 10 tysiač dalaraŭ.
«Vyvozili hrošy najaŭnymi. Dekłaravali na abiedźviuch miežach. Na ŭsialaki vypadak rabili pierakład usich damoŭ kupli-prodažu ŭ pierakładčyka.
Akramia taho, na mašynu była polskaja strachoŭka, tamu pierakład spatrebiŭsia, kab strachoŭku pakinuli novamu ŭładalniku. Heta było nieabchodna, kab kupiec moh vyjazdžać za miažu biez prablem, bo «Zialonaja karta» ŭžo nie pracuje. My, viadoma, nie abaviazanyja byli, ale vyrašyli zrabić pryjemnaje novamu ŭładalniku mašyny».
«Spytali, ci jość paćviardžeńnie pachodžańnia hrošaj»
Volha (imia źmieniena) taksama vyvoziła ź Biełarusi hrošy ad prodažu svajoj kvatery.
«Viezła hatoŭku ŭ dalarach praź litoŭskuju miažu. Pry sabie ŭ mianie była damova kupli-prodažu. Zapaŭniała dekłaracyju. U dekłaracyi treba z dakładnaściu da kapiejek paznačyć usiu sumu hrošaj, što jość pry sabie, va ŭsich valutach.
Pieraličvała hrošy sama rukami pad nahladam troch panienak na biełaruskaj miažy. Usia hetaja pracedura ciahnułasia dosyć doŭha — kala hadziny. Na litoŭskaj ža miažy ŭsio prajšło vielmi chutka: dekłaracyju zapoŭniła, a hrošy navat pakazać nie paprasili».
U Polščy Volha pakłała hrošy na rachunak u bank PKO. Tam u biełaruski spytali, ci jość paćviardžeńnie pachodžańnia hrošaj. Ale pakazać jaho nie prasili, udakładniŭšy, što jano moža spatrebicca ŭ vypadku, kali takoj vialikaj sumaj hrošaj zacikavicca padatkovaja.
«Na kanviersii straciła 1000 jeŭra»
Kaciaryna (imia źmieniena) pradała ŭ Biełarusi nieruchomuju majomaść za 70 tysiač dalaraŭ. Aformić ździełku biez asabistaj prysutnaści akazałasia vielmi składana, ale ŭsio ž taki mahčyma.
«My pryniali rašeńnie skarystacca pasłuhaj «biaśpiečny płaciež»: pakupnik pieravodzić nam apłatu ŭ dalarach, i my ŭ dalarach biez straty kursa zabirajem jaje sabie. Košt hetaj pasłuhi skłaŭ 500 biełaruskich rubloŭ».
Heta byli pieršyja i samyja niaznačnyja straty, jakija paniesła dziaŭčyna. Dla vyvadu hrošaj ź Biełarusi ŭ Polšču Kaciaryna razhladała pieravažna bankaŭski pieravod. Jana chacieła, kab hrošy ŭ Polščy byli aficyjna ŭličanyja i kab była mahčymaść skarystacca imi dla kupli novaj nieruchomaj majomaści ŭ Polščy.
«Dla pieravodu hrošaj ź Biełarusi ŭ Polšču vybrali Biełśvisbank. Tam nam skazali, što adziny bank u Polščy, na rachunak jakoha možna pieraličyć hrošy, — heta bank PKO. Akramia taho, pieravod byŭ dastupny tolki ŭ jeŭra, tamu 70 tysiač dalaraŭ nam daviałosia kanviertavać u jeŭra pa kursie».
Kaciaryna ŭspaminaje, što vynikovy kurs akazaŭsia niavyhadnym z-za dvajnoj kanviersii, a jašče dziaŭčyna-kasirka pieršapačatkova niešta pierabłytała i nazvała inšy kurs. U vyniku ŭ Kaciaryny atrymałasia na 1000 jeŭra mienš, čym jana čakała.
U banku PKO rachunku ŭ Kaciaryny na toj momant nie było, to joj spačatku pryjšłosia jaho adkryć. A tam joj spačatku admovili praz hramadzianstva Biełarusi. Pytańnie pryjšłosia vyrašać u kiraŭnictva ŭstanovy, ale rachunak u vyniku adkryli.
Pieravod pravodzili praź sistemu SWIFT. Nichto nie davaŭ harantyj, što ŭ kančatkovym vyniku jon budzie zrobleny: hrošy na praciahu dvuch miesiacaŭ mahli viarnucca nazad na biełaruski rachunak. Z-za hetaha Kaciaryna vielmi pieražyvała. Tym nie mienš hrošy pryjšli na nastupnuju ranicu. Kamisija za ŭsie apieracyi skłała kala 550 jeŭra.
«U vyniku z 70 tysiač dalaraŭ na polski rachunak mnie pryjšła suma 63 875 jeŭra».
Dalej usio prajšło lohka.
«Nijakaj składanaści nie było pa kursie pieravieści hrošy z rachunku ŭ jeŭra na rachunak u złotych i raźličycca za nieruchomuju majomaść. My kuplajem [ziamielny] ŭčastak, i nam nieabchodna było ŭnieści zadatak».
Na vypadak, kali b ź pieravodam ź Biełarusi ničoha nie vyjšła, u Kaciaryny byli zapasnyja varyjanty. Jana navat dapuskała, što paprosić kahości pieravieźci hrošy najaŭnymi praź miažu.
«Schadziŭ muž pa pradukty na 20 jeŭra, to-bok ja jamu vinnaja 10 jeŭra». Biełaruska raskazała, jak moža być uładkavany siamiejny biudžet
Biudžet volnaha mužčyny: na što i jak traciać hrošy biełaruskija chałaściaki
«Nie vy admaŭlajeciesia ad Radzimy, a jana ad vas». Śpiecyjalist praanalizavała psichałahičnaje vymiareńnie ŭkaza №278
Ciapier čytajuć
Stała viadoma, chto lotaŭ na Šry-Łanku razam z Anžalikaj Mielnikavaj i jaje ahientam13
Kamientary