Muzyku było 45 hadoŭ.
Ranicaj 30 kastryčnika śviet pakinuŭ biełaruski muzykant Maksim Kot-Kuźma — bas-histaryst hurtoŭ Pukstband, True Litwin Beat, WZ-orkiestra sa Źmitrom Vajciuškievičam, Pomidor/OFF, «Diližans-jazz» dy inšych prajektaŭ, piša Reform.by.
Pra sychod siabra dy paplečnika paviedamiŭ u sacsietkach muzyka Siarhiej Pukst.
«…Syšoŭ Maksim Kot-Kuźma. Heta čałaviek zusim vydatny, jaki vielmi šmat razumieŭ, vielmi šmat davaŭ jak čałaviek, i, mnie zdajecca, jon byŭ biaskonca dobry da mianie, ale potym ja zrazumieŭ, što byŭ dobry da ŭsich. My apošnim časam redka bačylisia (ja pamiataju, my paru razoŭ vielmi ciopła, pa-čałaviečy stelefanoŭvalisia) i ja nie mahu pavieryć, što bolš nikoli jaho nie ŭbaču…»
Adhuknuŭsia na śmierć kalehi i muzyka Alaksandr Pamidoraŭ.
«Los biaźlitasny… dy nam taksama vychodzić pić hety kubak… žachlivaja i nievynosnaja navina… hety śviet pakinuŭ adzin z najlepšych, dobrych, čułych i čullivych ludziej. cudoŭny muzyka, basist «mister Red Stringzzz» dy kantrabasist, cudoŭny fatohraf, prahramist, dyzajnier, muž, baćka, sapraŭdny siabra, vialiki čałaviek va ŭsich sensach, Maksim Kot-Kuźma…
vielmi zaŭčasna… dy nie tolki tamu pusta iznoŭ i ŭ hałavie, i ŭ dušy… strašnaja strata… ščyryja spačuvańni siamji, žoncy Natašy Kot-Kuźma, dačce i starejšamu synu ad mianie ŭłasna, i ad siabroŭ-paplečnikaŭ z našaj hrupy Pomidor/OFF…»
Maksim Kot-Kuźma mieŭ techničnuju adukacyju: jon zakončyŭ Minski technałahičny technikum pa kłasie fatahrafii. Ale viadomaść jamu pryniesła muzyka — jak bas-hitaryst, kantrabasist tvorca supracoŭničaŭ z roznymi kalektyvami: džaz-kvartetam Jaŭhiena Uładzimirava, kleźmierskim ansamblem «Mierkava», uzhadanymi vyšej WZ-orkiestra, Pukstband, True Litwin Beat dy inšymi prajektami.
U šlubie z aktrysaj Biełaruskaha dziaržaŭnaha teatra lalek Natallaj Kot-Kuźma. U muzyki zastalisia dačka i syn.
Raźvitańnie adbudziecca 1 listapada ab 11:00 hadzinie ŭ Raŭbičach u Chramie abraza Božaj Maci. Pachavańnie płanujecca paśla adpiavańnia, na mohiłkach Lasnyja (Mahiloŭskaja trasa). Paminki — u Minsku, na Kastryčnickaj, 16.
Kamientary