«Tančyk! Kładzisia! My ŭ akružeńni, pa nas ja****ć tankami!» — Režysior Siancoŭ pakazaŭ videa boju pad Aŭdziejeŭkaj
Ukrainski režysior i vajskoviec Aleh Siancoŭ pakazaŭ videa akopnych bajoŭ pablizu Aŭdziejeŭki — kadry źniatyja na GoPro kamiery bajcoŭ, jany pakazvajuć ciažki i praciahły boj, paranienych i, narešcie, adychod razam z vyratavanym paranienym, piša «Ukrainskaja praŭda».
Videa doŭžycca krychu bolš za 30 chvilin, na im pakazany boj ukrainskich abaroncaŭ, jakija znachodziacca ŭ akopach, z rasiejcami, jakija sprabujuć šturmavać pazicyju.
Jak čuvać z zapisu, vajskoŭcy kažuć, što rasiejcy cisnuć z usich bakoŭ i znachodziacca ŭžo zusim pobač − u pryvatnaści, z adnaho boku tolki za 15 mietraŭ. Pa ŭkrainskich abaroncach bjuć z hranatamiota, kidajuć hranaty i stralajuć z tankaŭ.
Troje ŭkrainskich voinaŭ z 13, jakija trymali źniatuju na videa častku abarony, u tym liku i Siancoŭ, atrymlivajuć ranieńni.
Razmovy ŭ akopach, razmovy pa racyi adbyvajucca pad huki pastajannych strełaŭ — nie sucichajuć jany navat na niekalki siekundaŭ.
«Tut paranieny. Treba miesca, kab ja jaho ahledzieła. U jaho nohi ŭ kryvi… Tančyk, kładzisia, kładzisia! My ŭ akružeńni, pa nas ja****ć tankami», — usklikaje žančyna-vajennaja i pry hetym akazvaje dapamohu paranienamu.
Dalej čuvać, jak Siancoŭ, pazyŭny «Hrunt», pieradaje pa racyi: «Mima nas prajechali 4 tanki, jany stralali, ale pajechali dalej na žalaziaku. Jak pryniaŭ?».
Paśla hrupa prymaje rašeńnie adychodzić: pieršyja šaściora z paranienym, astatnija siamiora prykryvajuć adychod i tady adychodziać sami. Na videa kažuć, što treba iści da miesca, dzie vysadžvalisia, heta za 50 mietraŭ, ale papiaredžvajuć, što rasiejcy buduć stralać z usich bakoŭ.
«Nie, mužyki, vy bieź mianie pojdziecie, ja zastajusia, bo heta niesurjozna. Ja nie vyjdu, Maks», — kaža adzin z bajcoŭ.
«My ciabie paniasiom… my ciabie vyniesiem… kulamiot kidajem, aŭtamat ja hety zabiaru… ty ciahnieš Alkaidu (paranienaha) dźviuma rukami. Trymaj, jak by jon ni kryčaŭ. Ciahnieš jaho za ruki, nie kidaješ», — kaža Siancoŭ.
Videa zakančvajecca tym, što bajcy razam ź ciažkim paranienym adychodziać, vyjazdžajuć z pola boju i pieradajuć paranienaha miedykam, jakija ŭžo čakajuć ich na darozie.
U hetym kankretnym bai ŭsie ŭkrainskija abaroncy zastalisia žyvyja.
Ciapier čytajuć
Biełarus palacieŭ u Nicu praz Stambuł — ciapier jon u komie ŭ francuzskaj balnicy. Miascovyja miedyki rajać adklučać jaho8
Biełarus palacieŭ u Nicu praz Stambuł — ciapier jon u komie ŭ francuzskaj balnicy. Miascovyja miedyki rajać adklučać jaho
«U mianie tolki adna mara — viarnuć svajho Dzimku». Maci byłoha palitviaźnia Dźmitryja Hopty raskazvaje pra novuju biadu syna. I prosić zamaŭlać u jaje bolš tortaŭ, kab spravicca1010
Kamientary