Ciažka ŭjavić, što «pašpart novaj Biełarusi» budzie chutka pryznany — jeŭradeputat
Niekatory čas tamu Śviatłana Cichanoŭskaja zajaviła ab pracy nad stvareńniem «pašparta novaj Biełarusi» dla tych, chto nie ryzyknie pajechać dadomu dla zamieny staroha dakumienta. Adnak, mohuć uźniknuć prablemy z pryznańniem novaha pašparta ŭ roznych krainach Jeŭrasajuza.
Jakim bačycca rašeńnie hetaj prablemy ŭ deputata Jeŭraparłamienta ad Litvy Piatrasa Aŭštravičusa, pacikaviŭsia «Hołas Amieryki».
«Ja ŭpeŭnieny, što ź jurydyčnaha punktu hledžańnia i ŭsich inšych faktaraŭ, jakija viaduć da pryznańnia taho ci inšaha pašparta, adsutničaje šmat roznych składnikaŭ, u tym liku — suvierenitet i terytaryjalnaść hetaha dakumienta», — ličyć litoŭski palityk.
Jon tłumačyć, što, kali asobnaja kraina Zachadu zachoča pryznać taki pašpart, jana pavinna budzie ŭličyć mnohija aśpiekty, jakija na hety momant nie prapracavanyja.
«Sama ideja mnie vielmi padabajecca, i ja chacieŭ by pryznać hety pašpart jašče ŭčora.
Ale tak jak niama vyraznaha adkazu nakont jaho suvierenitetu, vielmi ciažka ŭjavić, što ŭ chutkim časie možna spadziavacca na pryznańnie takoha pašparta. Ja sam havaryŭ z dypłamatami, z kiraŭnikami apazicyjnaha ruchu i dumaju, što treba iści pa bolš praktyčnym šlachu — vydačy dakumientaŭ dla prośbitaŭ palityčnaha prytułku», — padkreślivaje spadar Aŭštravičus.
Jon taksama zaklikaje biełarusaŭ bolš kankretna pryznać nastupnuju realnaść: «Mnohija, asabliva na prykładzie dakumientaŭ, jakija viartajucca ŭ Biełaruś dla adnaŭleńnia, jašče nie razumiejuć, u jakuju ryzykoŭnuju situacyju jany siabie staviać. Jany ryzykujuć svaim žyćciom, svaim zdaroŭjem i svajoj budučyniaj. Heta ž tatalitarny režym — sačeńnie za ŭsimi idzie kruhłasutačna, tamu takija ryzykoŭnyja pavodziny nie pavinny praciahvacca».
Pa słovach jeŭradeputata, biełarusy taksama pavinny pryznać, što hetaja prablema doŭhaterminovaja, stratehična niebiaśpiečnaja dla inšadumcaŭ i dla ŭsich, chto maje ŭłasnaje mierkavańnie.
«A nam na Zachadzie treba vydavać dakumienty biežancaŭ, i heta najbolš karotkaterminovaje vyrašeńnie prablemy, jakaja niesumnienna isnuje.
Sa skančeńniem dziejańnia paśviedčańnia asoby ŭźnikajuć całkam kankretnyja prablemy, ale ja ŭpeŭnieny, što mnohija krainy hatovyja ich vyrašać vielmi praktyčna», — padsumavaŭ Piatras Aŭštravičus.
Polšča na paŭhoda praciahnuła vydaču biełarusam prajaznoha dakumienta na sproščanych umovach
Z hetaha hodu zamiežnikaŭ prymajuć u biełaruskaje hramadzianstva «va ŭračystaj abstanoŭcy». Pahladzieli, jak heta adbyvajecca
U MUS adkazali, ci buduć pazbaŭlać hramadzianstva biełarusaŭ, u jakich jość dakumienty inšych dziaržaŭ
Sotni rubloŭ, kab efiektna daviedacca poł budučaha dziciaci: biełarusy robiać usio bolš maštabnyja hiendar-paci3
Kamientary