Paŭdniovakarejskaja raźviedka: Kim Čen Yn haduje z 10-hadovaj dački pierajemnicu

Junaja dačka Kim Čen Yna, jakaja apošnim časam supravadžaje jaho paŭsiul, ad rakietnych vyprabavańniaŭ da vajskovych paradaŭ, pavodle źviestak paŭdniovakarejskaj raźviedki «chutčej za ŭsio» i stanie jahonaj pierajemnicaj, piša Bi-bi-si.

Zrešty, u Nacyjanalnaj słužbie raźviedki (NIS) padkreślivajuć, što pa-raniejšamu razhladajuć roznyja varyjanty płanaŭ Pchieńjana z nahody «pasada ŭ spadčynu» (krainaj kiruje ŭžo treciaje pakaleńnie Kimaŭ).

Kim Čžu E ŭpieršyniu źjaviłasia na publicy razam z baćkam u listapadzie 2022 hoda na vyprabavańniach novaj mižkantynientalnaj balistyčnaj rakiety «Chvason-17» i z tych časoŭ pastajanna prysutničaje na ŭsich važnych mierapryjemstvach.

Napeŭna, joj kala 10 hadoŭ, choć dakładnyja daty naradžeńnia ni Kima, ni jaho žonki, ni dziaciej aficyjna nie abjaŭlalisia.

«Hruntujučysia na hłybokim analizie jaje publičnaj dziejnaści i ŭzroŭni pavahi, ź jakoj da jaje staviacca z samaha pačatku jaje źjaŭleńnia na publicy, možna mierkavać, što Kim Čžu E źjaŭlajecca najbolš imaviernym pierajemnikam, — havorycca ŭ zajavie NIS. — Adnak my praciahvajem razhladać usie mahčymaści, pakolki Kim Čen Yn adnosna małady, U jaho niama asablivych prablem sa zdaroŭjem, i majecca mnostva źmiennych faktaraŭ».

Ministr uźjadnańnia Respubliki Kareja Kim Jon Cho jašče ŭ śniežni na pres-kanfierencyi daŭ takuju acenku situacyi ź pierajemnikam u Paŭnočnaj Karei.

«Pastajannuju ŭvahu da dački Kim Čen Yna možna razhladać jak śviedčańnie taho, što Paŭnočnaja Kareja śpiašajecca prademanstravać svaje namiery adnosna pierajemnaści ŭłady na fonie składanych unutranych abstavinaŭ», — skazaŭ jon.

Zamiežnyja naziralniki za Paŭnočnaj Karejaj, u svaju čarhu, adznačajuć, što miascovyja ŚMI, jakija spačatku aficyjna zvali Čžu E lubimaj dačkoj Kima, ciapier nazyvajuć jaje pavažanaj.

Heta samy hanarovy zvarot: samoha Kim Čen Yna stali nazyvać «pavažanym tavaryšam» tolki paśla taho, jak kančatkova vyznačyŭsia jahony status budučaha lidara krainy

Paŭnočnakarejskim hramadzianam z naradžeńnia pryščaplajuć dumku pra toje, što ŭ žyłach Kimaŭ ciače ledź nie boskaja kroŭ i kiravać krainaj im nakanavana źvierchu. Tak što možna nie sumniavacca, što Kim Čen Yn zachoča praciahnuć hetuju tradycyju, pierakanaŭšysia ŭ tym, što la styrna ŭstanie čaćviortaje pakaleńnie Kimaŭ.

A pakul što dačka nieadstupna idzie za baćkam. Zusim niadaŭna, u śniežni, jany razam prysutničali na vyprabavańniach najnoŭšaj mižkantynientalnaj balistyčnaj ćviordapaliŭnaj rakiety «Chvason-18».

Raniej, u listapadzie, jany razam nazirali za zapuskam na arbitu spadarožnika-špijona «Malihien-1», jaki, jak śćviardžajuć u Pchieńjanie, zmoh u detalach sfatahrafavać Bieły dom.

Na dumku analitykaŭ, pradstaviŭšy svaju dačku šyrokaj publicy ŭ takim rańnim uzroście, Kim Čen Yn raźličvaje, što da momantu, kali da jaje piarojdzie ŭsia paŭnata ŭłady, da jaje ŭžo ŭsio pryvyknuć, i jana zaćvierdzić za saboj stanovišča lidara.

Nie vyklučana taksama, što Kim spadziajecca takim čynam pieraadoleć hłyboka ŭkaraniełyja ŭ patryjarchalnym paŭnočnakarejskim hramadstvie praduziataści suprać žančyn na kirujučych pasadach.

• 0
• 0
• 3
• 4
• 0
• 2
• 4
• 0