Kitaj prysudziŭ aŭstralijskaha piśmieńnika da śmiarotnaha pakarańnia
Sud u Kitai pryhavaryŭ aŭstralijskaha piśmieńnika Jan Chencziunia da śmiarotnaha pakarańnia z adterminoŭkaj u dva hady. Piać hadoŭ tamu prademakratyčnaha błohiera aryštavali ŭ Kitai, a try hady tamu pryznali vinavatym u špijanažy, piša BBC.
Ministr zamiežnych spraŭ Aŭstralii skazała, što šakiravana pryhavoram. Ambasadara Kitaja ŭ Aŭstralii vyklikali ŭ aŭstralijski MZS dla tłumačeńniaŭ.
Chencziuń naradziŭsia ŭ Kitai, u jaho jość aŭstralijskaje hramadzianstva. Da aryštu ŭ 2019 hodzie jon pracavaŭ u Ńju-Jorku. Jaho zatrymali ŭ aeraporcie Huančžoŭ i abvinavacili ŭ špijanažy. Padrabiaznaści spravy kitajskija ŭłady nie raskryvali, nieviadomyja i detali abvinavačańnia.
Piśmieńnik abviarhaŭ abvinavačańni. Jaho siamja śćviardžaje, što za čas aryštu jahonaje zdaroŭje pahoršyłasia, i vinavaciła kitajskija ŭłady ŭ katavańniach.
Śmiarotny pryhavor z adterminoŭkaj aznačaje, što paśla dvuch hadoŭ pryhavor mohuć zamianić pažyćciovym źniavoleńniem biez prava daterminovaha vyzvaleńnia, kali na praciahu hetych dvuch hadoŭ padčas utrymańnia pad vartaj jon nie ŭčynić inšych złačynstvaŭ.
Navukoviec, błohier i piśmieńnik Jan Chencziuń krytykavaŭ kitajskija ŭłady za parušeńni pravoŭ čałavieka. Jon aŭtar niekalkich špijonskich ramanaŭ.
Pasoł Aŭstralii ŭ Kitai raniej abvinavačvaŭ Kitaj u advolnym zatrymańni piśmieńnika, a jaho prychilniki nazyvajuć heta «palityčna matyvavanym pieraśledam».
«Kitajski ŭrad karaje jaho za krytyku parušeńniaŭ pravoŭ čałavieka ŭ Kitai i za abaronu ŭniviersalnych kaštoŭnaściaŭ, takich jak pravy čałavieka, demakratyja i viaršenstva zakona», — skazaŭ jaho siabar, navukoviec ź Sidneja Fen Čonhi.
Prysud piśmieńniku abaviazkova astudzić adnosiny pamiž Aŭstralijaj i Kitajem, jakija ŭ apošni čas krychu palepšylisia.
Premjer-ministr Aŭstralii Entani Ałbaniz u listapadzie staŭ pieršym aŭstralijskim lidaram, jaki naviedaŭ Kitaj za siem hadoŭ, u nadziei palepšyć adnosiny pamiž asnoŭnymi handlovymi partniorami.
Da hetaha na praciahu niekalkich hadoŭ adnosiny pamiž Piekinam i Kanbieraj byli azmročanyja handlovymi sprečkami, abvinavačvańniami ŭ kibieratakach, a taksama patrabavańniami Aŭstralii pravieści mižnarodnaje rasśledavańnie abstavin zjaŭleńnia virusa Covid-19.
Kamientary