Minski taksist tak choča ŭ IT, što paviesiŭ reziume ŭ sałonie mašyny

Zdymak drennaj jakaści, ale razabrać možna. «Frantend-raspracoŭščyk (developer, nie <div>eloper), z dośviedam raspracoŭki i vysokaj matyvacyjaj, jaki imkniecca pisać jasny, łakaničny, nadziejny kod.

Lublu stvarać pradukty z dastupnym kodam, jakija vyrašajuć realnyja prablemy ludziej». Stek: HTML, CSS, JS, TS, React, Git, GitHub, Figma. Plus kantakty, plus kiuar-kod, jaki viadzie na veb-staronku z reziume Jaŭhiena Nieściarenki.

U prahramie «Jandeks.Taksi» ŭ Jaŭhiena, miž inšym, adznaka «5». Žurnalisty napisali jamu z pytańniem, jak pośpiechi z pošukam pracy, i niečakana atrymali zajmalnuju historyju.

Pavialičyć

Turbiznes — taksi — IT

Jaŭhienu 28. Pa adukacyi jon vykładčyk hieahrafii, da pandemii pracavaŭ mieniedžaram pa turyźmie, a potym z turbiznesam pryjšłosia rasstacca. 

— U turystyčnym ahienctvie ja pracavaŭ da sakavika 2020 hoda, potym miežy zakrylisia i ŭsie turfirmy adpravilisia ŭ adpačynak. Ja vyrašyŭ časova sieści za rul taksi, ale vyjaviłasia, što niama ničoha bolš pastajannaha.

Praz paŭhoda ŭ taksi ja raspracavaŭ vaśmihadovy płan (kim chaču być «kali vyrastu» i što mnie dla hetaha treba) i vyrašyŭ uvajści ŭ śfieru IT. U škole mnie padabaŭsia Paskal, tamu ja zrabiŭ hety vybar.

Paŭhoda ja jeździŭ na arandavanaj mašynie i ŭ pramiežkach sprabavaŭ vučycca, ale pry takim hrafiku času na vučobu nie chapała. Arenda kaštavała doraha plus treba było płacić za zdym kvatery. Tamu ja zaniaŭ u siabroŭ hrošy, kupiŭ mašynu pad taksi i hod vydatkavaŭ na toje, kab jaje akupić. Tak ja atrymaŭ instrumient zarobku i bolš času na navučańnie. U vieraśni 2022 hoda ja prystupiŭ da vyvučeńnia Frontend, a ŭ kastryčniku trapiŭ na kursy ŭ IT-Incubator.

Praz paŭhoda ŭ mianie znajšli dabrajakasnuju puchlinu, na kaniec sakavika daktary pryznačyli apieracyju. Ja dumaŭ, što za dva tydni adnaŭlusia i pačnu pavolna šukać pracu, ale niešta pajšło nie tak. U časie apieracyi mnie paškodzili nierv, jaki adkazvaje za pravuju hałasavuju źviazku. Z tych časoŭ ja razmaŭlaju tolki šeptam abo jak terminatar, što stała aktualnym pry majoj novaj prafiesii:-)

Mnie spatrebiłasia čatyry miesiacy dla adnaŭleńnia — bolš psichałahičnaha, čym fizičnaha. Ale ź lipienia 2023 hoda ja adčuvaju siabie vydatna i poŭny sił. Jak pakazała praktyka, strata zvonkaści hołasu nie stvaraje nijakich prablem. Dobry mikrafon dapamahaje mnie być samym vyraznym na sazvonach z kamandaj.

U ciapierašni čas ja pracuju nad ułasnym prajektam. Heta interaktyŭnaja karta śvietu, dzie budzie sabrana šyrokaja baza histaryčnych padziej. Karystalniki zmohuć chutka i intuityŭna zrazumieć, jak mianialisia miežy dziaržaŭ u śviecie, daviedacca, što tam adbyłosia, i pahłybicca ŭ cikavuju dla ich temu. 

Ja ŭžo hutaryŭ z aśpirantami i nastaŭnikami škoł nakont hetaj patreby. U vyniku jana budzie manietyzavanaja, ale ciapier u mianie niama praduktovaha vopytu, kab razharnuć paŭnavartasny startap. Da MVP płanuju davieści prajekt samastojna: tolki dyzajniera niadaŭna padklučyŭ i paźniej padkluču bekendara.

Ciapier ja pracuju z React.TS i pastajanna vyvučaju novyja biblijateki, da hetaha — z Redux, RTK, RTK Query. Nie saromiejusia łazić u dakumientacyju. Zastałosia tolki znajści dobruju kamandu i cikavy apłačvany prajekt, kab spraŭdziłasia mara ŭvajścišnika.

Vodhuki na reziume

Aktyŭna šukać pracu i rychtavacca da sumoŭjaŭ ja pačaŭ dva tydni tamu. A abjavie z partfolia ŭ mašynie krychu bolš za dva miesiacy. Za hety čas ja atrymaŭ try prapanovy, ale ŭsie na stek PHP+WordPress, tak što ja ščaśliva nie pahadziŭsia.

Vopytu sumoŭjaŭ u mianie, na žal, jašče nie było. U startap mianie brali biez sumoŭja, prosta pahladzieli GitHub. Ale hety «ofier» byŭ nieapłatnym. Jak ja razumieju, ciapier taki rebałans na rynku, što studenty prymajuć heta jak danaść.

Što da vašaj cikavaści, ja čakaŭ razmoŭ u mašynie i zaprašeńniaŭ na sumoŭje, ale takoha pavarotu dakładna nie čakaŭ.

• 1
• 0
• 0
• 2
• 1
• 2
• 1
• 0