Stała viadoma, čamu kikbaksior, jaki źbiŭ AMAPaŭca, nie trapiŭ u turmu
Ipalit Słuženka ŭdarna adznačyŭ Novy hod.
Čempijon Biełarusi pa kikboksinhu Ipalit Słuženka atrymaŭ dva hady «chimii» za źbićcio supracoŭnika AMAP.
3 studzienia pjany spartoviec pabiŭsia ź nieznajomym chłopcam kala bara ŭ Połacku. Na šum prybiehli siłaviki, adnaho z amapaŭcaŭ Słuženka ŭdaryŭ kułakom. Milicyjantam udałosia skrucić kikbaksiora. Ale sud stroha karać spartsmiena nie staŭ — dapamahli suviazi jaho treniera, piša «Trybuna».
Pakul išoŭ kryminalny razbor, Słuženka znachodziŭsia doma, za jaho aktyŭna chadajničali znajomyja i kalehi. U pieršuju čarhu asabisty trenier Anatol Sieladzieŭski. Śpiecyjalist u svoj čas vychavaŭ niamała top-spartsmienaŭ, adnak apošnim časam zasiarodziŭsia na padrychtoŭcy Słuženki ŭ kłubie «Bulbaš».
Kali suprać spartsmiena raspačali kryminalnuju spravu, Sieladzieŭski padklučyŭ usie svaje suviazi, kab zamiać skandał i dapamahčy padapiečnamu. Ale infarmacyja ab incydencie chutka raźlaciełasia pa Połacku, i trenieru dali zrazumieć, što spuścić usio na tarmazach nie atrymajecca — niejkaje pakarańnie Słuženka ŭsio ž pavinien panieści.
U vyniku paźbiehnuć realnaha terminu kikbaksioru dapamahli suviazi treniera. Adna z vučanic Sieladzieŭskaha — Kaciaryna Reut, dziaržaŭny trenier zbornaj Biełarusi pa ŭschodnich vidach adzinaborstvaŭ. Jana ŭvachodzić u asiarodździe Juryja Karajeva — ciapier pamočnika Łukašenki pa Hrodzienskaj vobłaści. U 2020-m Reut była siarod tych, chto pa rasparadžeńni Karajeva akazvaŭ cisk na spartoŭcaŭ pa palityčnych pryčynach.
Sieladzieŭski paprasiŭ byłuju vučanicu dapamahčy Słuženku — krynicy «Trybuny» śćviardžajuć, što hety fakt spryjalna adbiŭsia na vierdykcie suda.
Jašče adzin vučań Sieladzieŭskaha — syn Valancina Martynienki, načalnika kiraŭnika spravami Navapołackaha harvykankama. Martynienka ŭvachodzić u asiarodździe Natalli Kačanavaj.
Taksama siarod vučniaŭ Sieladzieŭskaha svajak adnaho z kiraŭnikoŭ adździeła sportu i turyzmu Viciebskaha harvykankama.
Sam kłub «Bulbaš» znachodzicca na terytoryi vajskovaj čaści 5530 unutranych vojskaŭ, tam zajmajucca nie tolki vajskoŭcy, ale i dzieci aficeraŭ.
Ciapier Sieladzieŭski padklučaje ŭsie svaje suviazi, kab Słuženku zamianili i «chimiju» na bolš miakkaje pakarańnie.
Ciapier čytajuć
Vyjšaŭ na svabodu były top-žurnalist ANT Dźmitryj Siemčanka7
Kamientary