Стала вядома, чаму кікбаксёр, які збіў АМАПаўца, не трапіў у турму
Іпаліт Служэнка ўдарна адзначыў Новы год.
Чэмпіён Беларусі па кікбоксінгу Іпаліт Служэнка атрымаў два гады «хіміі» за збіццё супрацоўніка АМАП.
3 студзеня п'яны спартовец пабіўся з незнаёмым хлопцам каля бара ў Полацку. На шум прыбеглі сілавікі, аднаго з амапаўцаў Служэнка ўдарыў кулаком. Міліцыянтам удалося скруціць кікбаксёра. Але суд строга караць спартсмена не стаў — дапамаглі сувязі яго трэнера, піша «Трыбуна».
Пакуль ішоў крымінальны разбор, Служэнка знаходзіўся дома, за яго актыўна хадайнічалі знаёмыя і калегі. У першую чаргу асабісты трэнер Анатоль Селядзеўскі. Спецыяліст у свой час выхаваў нямала топ-спартсменаў, аднак апошнім часам засяродзіўся на падрыхтоўцы Служэнкі ў клубе «Бульбаш».
Калі супраць спартсмена распачалі крымінальную справу, Селядзеўскі падключыў усе свае сувязі, каб замяць скандал і дапамагчы падапечнаму. Але інфармацыя аб інцыдэнце хутка разляцелася па Полацку, і трэнеру далі зразумець, што спусціць усё на тармазах не атрымаецца — нейкае пакаранне Служэнка ўсё ж павінен панесці.
У выніку пазбегнуць рэальнага тэрміну кікбаксёру дапамаглі сувязі трэнера. Адна з вучаніц Селядзеўскага — Кацярына Рэут, дзяржаўны трэнер зборнай Беларусі па ўсходніх відах адзінаборстваў. Яна ўваходзіць у асяроддзе Юрыя Караева — цяпер памочніка Лукашэнкі па Гродзенскай вобласці. У 2020-м Рэут была сярод тых, хто па распараджэнні Караева аказваў ціск на спартоўцаў па палітычных прычынах.
Селядзеўскі папрасіў былую вучаніцу дапамагчы Служэнку — крыніцы «Трыбуны» сцвярджаюць, што гэты факт спрыяльна адбіўся на вердыкце суда.
Яшчэ адзін вучань Селядзеўскага — сын Валянціна Мартыненкі, начальніка кіраўніка справамі Наваполацкага гарвыканкама. Мартыненка ўваходзіць у асяроддзе Наталлі Качанавай.
Таксама сярод вучняў Селядзеўскага сваяк аднаго з кіраўнікоў аддзела спорту і турызму Віцебскага гарвыканкама.
Сам клуб «Бульбаш» знаходзіцца на тэрыторыі вайсковай часці 5530 унутраных войскаў, там займаюцца не толькі вайскоўцы, але і дзеці афіцэраў.
Цяпер Селядзеўскі падключае ўсе свае сувязі, каб Служэнку замянілі і «хімію» на больш мяккае пакаранне.
Цяпер чытаюць
«Усё так ці інакш будзе вырашацца на полі бою». Чым будзе займацца новая кіраўніца Місіі дэмакратычнай Беларусі ва Украіне?13
Каментары