«Cikava, što źjaviłasia raniej: adydas ci lidskija kiedy»: u tyktoku novaja chvala lubovi da ajčynnaha abutku
Ad abutku dla fizkultury da «biełaruskaha adydasa» — tak cikava składvaŭsia los lidskich kiedaŭ. Ciapier u sacyjalnych sietkach znoŭ pryznajucca ŭ lubovi da viadomaj madeli ajčynnaha abutku.
Mabyć, čarhovaja chvala papularnaści lidskich kiedaŭ źviazanaja z tym, što stylisty (i biełaruskija, i zamiežnyja) u adzin hołas kazali, što viasnoj i letam 2024 hoda siarod trendavaha abutku jość Adidas Gazelle.
A lidskija kiedy jakraz da ich vielmi padobnyja. I kali tyja samyja adydasy kaštujuć u minskich kramach 400-500 rubloŭ, to ajčynny anałah možna adšukać niedzie ŭ HUMie za 56 rubloŭ.
— Anałah «Adydasa», jakasnaje fabryčnaje vykanańnie, naturalnyja i vielmi zručnyja. Adzinaje, raju adrazu zamianić vuściłku, tamu što rodnaja spaŭzaje, — napisała ŭ instahramie minskaja stylistka, vykładčyca Nacyjanalnaj škoły pryhažości.
U tyktoku videa ź lidskimi kiedami zvyčajna vykładajuć pad huk: «Urvała!». Zdajecca, adzinaja pretenzija ad tych, chto robić raspakoŭki — niepryhožyja kardonnyja karobki, niejak kryva zmacavanyja stepleram.
Błohierka pad nikam ph_ksusha pachvaliłasia ŭ svaim tyktok-akaŭncie novymi ciomna-zialonymi lidskimi kiedami. «Znojdzieny najlepšyja kiedy pa vielmi śmiešnym košcie. Nievierahodna zručnyja i naturalnyja», — napisała błohierka.
Videa nabrała kala 360 tysiač prahladaŭ i bolš za 5 tysiač łajkaŭ. Niechta pažartavaŭ: «U maim dziacinstvie nabyćcio lidskich krasovak ličyłasia prysudam. Heta ž na ŭsio žyćcio». Ale siarod fanataŭ ajčynnaha abutku i tych, chto prosić parady, dzie ž znajści «biełaruski adydas», znajšlisia i chiejtary: «Vy surjozna śćviardžajecie, što heta lepš za «Adydas»? Tady vy nie nasili dobraha spartyŭnaha abutku».
U adkaz na apošniuju pretenziju błohierka navat zapisała videaadkaz, u jakim pakazała svaju kalekcyju spartyŭnaha abutku: GUESS, Reebok, Nike, Lacoste i dźvie pary lidskich kiedaŭ roznaha koleru.
— Tak što nie chvalujciesia za mianie, usio ŭ mianie jość — i firmovy abutak, i kałhasny, jak vy kažacie. Lidskija ničym nie horšyja — vydatna nosiacca, čyściacca.
Stali viadomyja padrabiaznaści taho, jak u Vjetnamie zatrymali Vieramiejčyka21
Kamientary