U Minsku raspracujuć adzinyja pryncypy raźmiaščeńnia rekłamy ŭzdoŭž daroh
U Minsku rychtujecca kancepcyja acenki ŭpłyvu źniešniaj rekłamy na biaśpieku darožnaha ruchu. Pra heta paviedamiŭ namieśnik načalnika UDAI HUUS Minharvykankama Dzianis Livanovič padčas pasiadžeńnia kamisii pa biaśpiecy darožnaha ruchu.
Pavodle słoŭ čynoŭnika, dakumient vyznačyć ahulnyja pryncypy ŭstanoŭki rekłamnych kanstrukcyj uzdoŭž daroh jak dla kamiercyjnych, tak i dla dziaržaŭnych arhanizacyj, a taksama dla orhanaŭ, jakija ŭzhadniajuć takija prajekty.
Čakajecca, što novyja praviły dapamohuć źnizić subjektyŭnaść pry pryniaćci rašeńniaŭ i zrobiać praces uzhadnieńnia bolš prazrystym. Paśla raspracoŭki kancepcyju płanujuć vynieści na razhlad Minskaha haradskoha savieta deputataŭ.
Taksama na pasiadžeńni abmierkavali pytańni biaśpieki kala ŭstanoŭ adukacyi. Staršynia Minharvykankama Uładzimir Kucharaŭ daručyŭ poŭnaściu zabiaśpiečyć biaśpieku kala škoł i dziciačych sadkoŭ da 15 žniŭnia.
U 2026 hodzie ŭ Minsku zapłanavanaja realizacyja 271 mierapryjemstva na 209 učastkach vulična-darožnaj sietki i dvarovych terytoryj. Siarod ich:
- ustanoŭka štučnych niaroŭnaściaŭ;
- zvužeńnie prajeznaj častki ŭ niebiaśpiečnych miescach;
- uparadkavańnie nierehulavanych piešachodnych pierachodaŭ;
- stvareńnie zon vysadki i pasadki dziaciej kala škoł;
- madernizacyja vuličnaha aśviatleńnia.
Akramia taho, razhladałasia inicyjatyva pa abmiežavańni ruchu hruzavikoŭ na asobnych učastkach MKAD. Płanujecca vyznačyć ekśpierymientalny ŭčastak, dzie na praciahu hoda buduć vyvučać upłyŭ novych abmiežavańniaŭ na avaryjnaść i intensiŭnaść ruchu. Pa vynikach ekśpierymientu buduć pryniatyja dalejšyja rašeńni.
Kamientary