Biełarusku ŭ Polščy nie puścili na bort Ryanair z prajaznym dakumientam. Ale jana zmahła damahčysia kampiensacyi

— Ja źbirałasia palacieć u červieni na Kipr da svajoj siastry, jakaja pracuje jurystam. U mianie prajazny dakumient, bo ŭ majho biełaruskaha pašparta skončyŭsia termin. My pieršapačatkova viedali, što mohuć uźniknuć prablemy, adnak vyrašyli ryzyknuć. 

Papiarednie ja ŭsio ž nabrała kiprskuju ambasadu ŭ Varšavie, kab spytać: ci možna mnie pierasiakać miažu z prajaznym dakumientam? Mnie adkazali: «Na žal, hetaje pytańnie vielmi časta pastupaje da nas ad hramadzian Biełarusi, ale my praŭda nie viedajem, ci puściać vas, bo my nieadnarazova pisali kipryjotam, kab jany nam heta patłumačyli».

«Chiech, kipryjoty», — padumała ja i ŭsio roŭna kupiła bilet. Z bahažom jon abyšoŭsia mnie ŭ 70 jeŭra. Zvarotny bilet na ŭsialaki vypadak nie brała. 

I voś dzień vyletu. Ja pajšła da stojki rehistracyi, papiarednie ŭdakładniŭšy ŭ rabotnikaŭ Ryanair, ci ŭsio ok z maimi dakumientami. Jany adkazali, što prablem być nie pavinna. Ja vydychnuła i pajšła dalej.

Paśpiachova prajšła security check, mytniu i sieła čakać samalot la hiejta.

Bližej da pasadki ja pačuła, što supracoŭniki Ryanair pa hučnahavarycieli zaprašajuć mianie da stojki.

Jany skazali, što ja nie mahu pierasiakać miažu z prajaznym dakumientam i DNŽ, ale jość dva varyjanty: 

• prajazny dakumient i ŭ im viza;
• pašpart Biełarusi i DNŽ.

My sprabavali spračacca, ale jany byli niepachisnyja i nie puścili mianie ŭ samalot. 

Paśla hetaha maja siastra skłała im vialiki list, u jakim my padrabiazna apisali, što adbyłosia. 

Čytačka pakazała vytrymki z hetaha lista. U im spasyłajucca na infarmacyju ab pajezdkach dla zamiežnych naviedvalnikaŭ na sajcie kiprskaj ambasady. A mienavita, što «asoby, jakija majuć dazvoł na žycharstva, vydadzieny adnoj ź dziaržaŭ — členaŭ Šenhienskaha pahadnieńnia, nie majuć patreby ŭ karotkaterminovaj vizie dla ŭjezdu na Kipr na termin znachodžańnia, jaki nie pieravyšaje 90 dzion na praciahu luboha 180-dzionnaha pieryjadu» (u biełaruski jość polski DNŽ). A taksama na tłumačeńnie polskaha MUS, što prajazny dakumient zamiežnika paćviardžaje asobu i dazvalaje pierasiakać miažu.

Akramia taho, adznačajecca ŭ liście, u dyrektyvie ES ab standartach kvalifikacyi hramadzian trecich krain abo asob biez hramadzianstva ŭ jakaści bienieficyjaraŭ mižnarodnaj abarony prosta havorycca, što prajazny dakumient zamiežnika pryznačany dla pajezdak za miežy krainy.

U kancy aŭtar paprasiła dać piśmovaje tłumačeńnie pryčyn, pa jakich biełarusu z prajaznym dakumientam zamiežnika nie dazvolili ŭjechać u Respubliku Kipr, uklučajučy spasyłki na adpaviednyja pravavyja akty. A taksama pravieści poŭnaje pakryćcio srodkaŭ.

Što było dalej?

— Mnie daviałosia doŭha čakać adkazu, tamu ja raju pieryjadyčna ich pinhavać, — praciahvaje čytačka. — Ale ŭ vyniku jany mnie adkazali, što vypłaciać kampiensacyju 400 jeŭra i košt kvitka ŭ poŭnym pamiery. Hrošy abiacali pieravieści ciaham 5-7 dzion. 

Ja paŭtorna spytała, ci mahu ja ŭ budučyni lotać na Kipr. Mnie padałosia, jany nie chočuć heta kazać, bo heta parušeńnie maich pravoŭ i pryznańnie pamyłki.

Ale voś što mnie adkazali: «Pakolki my atrymali infarmacyju ad našaha imihracyjnaha adździeła, vy mahli padarožničać z hetymi dakumientami. Akramia taho, rekamiendujem vam źviazacca z pasolstvam i spytać ich».

«Źbirajusia znoŭ palacieć na Kipr u vieraśni. Dumaju jašče damahčysia aficyjnaha lista z dazvołam na prachodžańnie z prajaznym dakumientam», — padsumavała čytačka.

• 41
• 1
• 2
• 2
• 0
• 2
• 0
• 0