Labiedźka prapanuje ŭvieści maratoryj na svarki ŭ apazicyi napiaredadni vybaraŭ

Palityk Anatol Labiedźka prapanavaŭ demakratyčnym siłam uvieści maratoryj na publičnyja svarki pierad vybarami-2025.

Siarod prychilnikaŭ pieramien jość dźvie hrupy z roznaj pazicyjaj nakont nastupnych vybaraŭ, kaža Labiedźka. Adna abjadnoŭvaje tych, chto vystupaje kateharyčna suprać udziełu ŭ hałasavańni.

«Dla ich heta jak u biełych čaravikach iści pa dryhvie — zapeckaješsia. Heta ich pryncypovaja pazicyja i naŭrad ci bolšaść jaje źmieniać, kali prapanavać niešta inšaje», — ličyć palityk.

Da druhoj hrupy prychilnikaŭ pieramien jon adnosić tych, chto ličyć, što niedastatkova prosta kanstatavać, što ŭ Biełarusi niama vybaraŭ, i pry hetym siadzieć na kanapie. 

Taksama Labiedźka vydzialaje pramiežkavuju hrupu — ludziej, jakija, moža, i chacieli b nie pajści, ale jany pryviazany da miesca pracy, vučoby, internataŭ. Imi lohka manipuliravać, na ich efiektyŭna pracuje administracyjny resurs.

«Pa ŭžo ŭkaraniełaj tradycyi pierad pačatkam vybarčaj kampanii dźvie hrupy rasčachlajuć zbroju i raspačynajuć pamiž saboju vajnu ŭ infarmacyjnaj prastory. U jakuju režym tolki padkidvaje porach. Vajnu biessensoŭnuju i biezvynikovuju», — havoryć palityk.

Ale razam z tym, zaŭvažaje Labiedźka, usie hrupy vystupajuć za svabodnyja, sumlennyja vybary.

«Heta tyja ludzi, što ŭ 2020 hodzie vychodzili na vulicu. I, jak mnie padajecca, mienavita pytańnie svabodnych, sumlennych vybaraŭ treba aktualizavać i pastavić na pieršaje miesca. I pa hetym kiejsie pracavać i z našymi prychilnikami pieramien, i z tymi, chto jašče sumniavajecca», — ličyć palityk i prapanuje:

«Nieabchodna damovicca ŭsim palitykam, jakija vystupajuć śpikierami roznych hrup, — my nie viadziom kanfrantacyju adno z adnym.

Tamu što, kali patracim častku hetaha času na toje, kab havaryć, što niapravilnuju pazicyju zajmajuć tyja ci inšyja, to zhubim pracu z astatnim hramadstvam, z tymi, chto chistajecca, i nie zmožam patłumačyć, što svabodnyja sumlennyja vybary — nie tolki prava vybirać, ale i ekanomika, dabrabyt, zarobki i ŭsio astatniaje».

«Vielmi važna zaraz dabicca, kab byŭ maratoryj na krytyku i, mahčyma, prapanavać varyjant mieniu. Nie adnu opcyju, što možna rabić padčas hetaj «śpiecapieracyi», a niekalki.

Nie chočaš — nie chadzi na vybarčy ŭčastak, pryjšoŭ — prahałasuj suprać usich».

Takaja pazicyja, na pohlad Labiedźki, samaje racyjanalnaje, što demakratyčnyja siły mohuć zrabić u isnujučaj situacyi.

• 5
• 0
• 2
• 2
• 0
• 0
• 1
• 0