Paŭnočnakarejskija vojski ŭžo na terytoryi Ukrainy — The Washington Post

Paŭnočnakarejskija sałdaty padtrymlivajuć rasijskija vojski na froncie, i niekatoryja ź ich užo byli zabityja i paranienyja, zajavili vydańniu The Washington Post paŭdniovakarejskija i ŭkrainskija aficyjnyja asoby. Heta moža śviedčyć pra pierachod vajskovaha supracoŭnictva pamiž Pchieńjanam i Maskvoj na zusim novy ŭzrovień.

Andrej Kavalenka, kiraŭnik ukrainskaha Centra pa baraćbie z dezynfarmacyjaj, jaki jość častkaj Rady nacyjanalnaj biaśpieki i abarony Ukrainy, raskazaŭ, što KNDR užo nakiravała va Ukrainu vojski, uklučajučy vajskovych inžynieraŭ, jakija kantralujuć vykarystańnie Rasijaj paŭnočnakarejskaha ŭzbrajeńnia na froncie, i što «niekatoryja sałdaty i aficery KNDR byli zabityja na linii ahniu».

Vysokapastaŭleny pradstaŭnik HUR Ukrainy na ŭmovach ananimnaści zajaviŭ vydańniu, što ŭkrainskaja raźviedka zafiksavała «niekalki tysiač» paŭnočnakarejskich piechacincaŭ na terytoryi Rasii, jakija ciapier prachodziać padrychtoŭku i mohuć być razhornutyja na pieradavoj va Ukrainie da kanca hetaha hoda.

Pry hetym paŭnočnakarejskija sałdaty i aficery jašče nie ŭdzielničali ŭ bajach napramuju, a tolki nazirali za vykarystańniem svajoj zbroi, adznačaje pradstaŭnik HUR.

Pa jaho słovach, pakul nieviadoma, na jakich mienavita ŭčastkach frontu buduć razhornutyja bajavyja padraździaleńni KNDR, jakija prachodziać padrychtoŭku ŭ Rasii. Maskva, kaža čynoŭnik HUR, moža taksama vykarystać ich u pamiežnych rehijonach Rasii, vyzvalajučy ŭłasnyja vojski dla viadzieńnia bajavych dziejańniaŭ va Ukrainie.

U svaju čarhu ministr abarony Paŭdniovaj Karei Kim Jon Chion nazvaŭ paviedamleńni ab tym, što paŭnočnakarejskija vojski dapamahajuć rasijskim, «vielmi imaviernymi», dadaŭšy, što Pchieńjan nakiruje jašče bolš piersanału dla padtrymki vajskovych namahańniaŭ Rasii va Ukrainie, pieradaje The Washington Post

«U Rasii i Paŭnočnaj Karei jość pahadnieńnie, jakoje faktyčna źjaŭlajecca vajennym sajuzam, tamu vielmi imavierna, što Paŭnočnaja Kareja nakiruje va Ukrainu dadatkovyja vojski. My nazirajem za situacyjaj i rychtujemsia da mahčymych scenaroŭ raźvićcia padziej», — prakamientavaŭ ministr abarony Paŭdniovaj Karei Kim Jon Chion.

Nahadajem, što pieršyja paviedamleńni pra płany KNDR nakiravać ułasnyja vojski va Ukrainu na dapamohu Rasii źjavilisia jašče ŭ lipieni hetaha hoda. Tady paviedamlałasia, što lidar KNDR Kim Čen Yn płanuje pierakinuć u akupavanyja vobłaści Ukrainy budaŭničyja i inžyniernyja vojski.

Tym časam krynicy ŭ zachodnich raźviedkach raskryli, što Paŭnočnaja Kareja pieradała Rasii kala 3 miljonaŭ snaradaŭ za hod, što składaje pałovu ad usich vykarystanych Rasijaj bojeprypasaŭ va Ukrainie ŭ hetym hodzie.

• 1
• 1
• 4
• 2
• 3
• 0
• 11
• 0