Invalidu z Kobryna pahražaje da siami hadoŭ za «sadziejničańnie ekstremisckaj dziejnaści»
U 2016 hodzie ŭ mašynie Alaksandra Kraŭčuka vybuchnuŭ hazavy bałon — mužčynu adarvała nahu. Paśla hetaha jon niaspynna zmahaŭsia ź biełaruskimi čynoŭnikami.
55-hadovy Alaksandr Kraŭčuk rodam z Kobryna. Da traŭmy zajmaŭsia pradprymalnictvam. Maje darosłaha syna i niepaŭnaletniuju dačku.
Trahičnaja historyja zdaryłasia z mužčynam u 2016 hodzie. Alaksandr za piać hadoŭ da hetaha nabyŭ sabie ŭ Hiermanii «hazavy» Volkswagen Touran 2006 hoda vypusku. U studzieni 2014-ha jamu pazvanili z pradstaŭnictva aficyjnaha dylera Volkswagen «Atłant-M» i skazali, što varta zamianić hazavyja bałony — u Jeŭropie niekalki ź ich vybuchnuli. Brak byŭ na baku vytvorcy aŭto.
Alaksandru zamianili zadniuju paru i skazali čakać na zamienu piaredniaj. Pazvanili jamu tolki ŭ žniŭni 2016 hoda, i jany z synam i dačkoj rušyli ŭ Minsk, kab zamianić bałony.
«Pa darozie ja zajechaŭ na zapraŭku. Usio jak zvyčajna — hazavy šłanh u aŭtamabil, praces pajšoŭ… Kali ja pračnuŭsia, vakoł stajaŭ lamant. Ja pryŭźniaŭsia i pabačyŭ, što aŭto raźniesła ad vybuchu. Na ščaście, žonka i dzicia nie nadta paciarpieli, a mnie askiepkami adarvała nahu nižej za kalena», — raspaviadaŭ Alaksandr vydańniu «Aŭtabiznes».
Paśla hetaha pačaŭsia boj Kraŭčuka z čynoŭnikami. Toj sprabavaŭ vyśvietlić, chto paniasie adkaznaść za vybuch bałona, ale ad jaho paŭsiul admachvalisia. Biełaruskija śledčyja tady kazali, što im składana praanalizavać, što ž nasamreč adbyłosia — takich vypadkaŭ u Biełarusi da hetaha nie było.
U vyniku jon damohsia nievialikich kampiensacyj dla siabie i syna — 4000 i 400 dalaraŭ adpaviedna.
U apošnija hady Kraŭčuk žyŭ u vioscy Dziaviatki Kobrynskaha rajona. Tam jon sprabavaŭ dobraŭparadkavać dziedavu siadzibu. Za toje, što vyčyściŭ sažałku pobač z domam, u 2019 hodzie atrymaŭ štraf u 5500 rubloŭ — sažałka była dziaržaŭnaja, tamu, maŭlaŭ, prava na hety jon nie mieŭ.
Taksama jon damahaŭsia viartańnia ilhotnaha padatku na karystańnie ziamloj dla invalidaŭ. Za hod za 13 sotak pad haražy jon musiŭ płacić dźvie svaje piensii. Pradać, pa jaho słovach, ich nie vychodziła — pakupnikoŭ nie było.
Damahaŭsia i pracy dla siabie z dastojnaj apłataj, dachodziŭ da ministraŭ. Apošnim viadomym miescam pracy mužčyny była Kobrynskaja vieterynarnaja stancyja, ale adtul jon 25 sakavika 2021 hoda pajšoŭ u stačku.
Što-ništo zrabić skarhami nasamreč udavałasia. Naprykład, da siadziby ŭ Dziaviatkach prakłali darohu.
Praz aktyŭnaść Kraŭčuka na jaho pieryjadyčna pisali paskvili praŭładnyja miedyja. U 2021 hodzie rajonka pryśviaciła Alaksandru ceły cykł ź niekalkich publikacyj.
«Miascovy amatar dziaržaŭnaj padtrymki i «zmahar» pa pierakanańniach, viadomy našym čytačam invalid Alaksandr Kraŭčuk», — tak pisała pra jaho aficyjnaje vydańnie.
Sudovyja epapiei dy pieraśled Kraŭčuka praciahvalisia. U 2023-m jaho jak minimum adzin raz štrafavali za «raspaŭsiud ekstremizmu» i adzin raz za «niapravilnaje vykarystańnie ziamielnych resursaŭ». Taksama za apošnija dva hady prajšło niekalki sudoŭ, pa jakich jon damahaŭsia kampiensacyi za vybuch mašyny, praź jaki jon staŭ invalidam. Vynik ich nieviadomy.
Nieviadoma taksama, ci zatrymany ciapier Alaksandr abo znachodzicca pad chatnim aryštam. Apošniuju skarhu razhledzieli 18 maja 2024 hoda, akurat na «prymianieńnie zatrymańnia, zaklučeńnia pad vartu ci chatniaha aryštu abo praciahu termina ŭtrymańnia».
Sud nad kobryncam pačniecca 22 kastryčnika ŭ Bresckim abłasnym sudzie. Jaho abvinavačvajuć u «sadziejničańni ekstremisckaj dziejnaści». Sudzić jaho budzie staršynia suda Lubanskaha rajona Andrej Siz.
Alaksandru Kraŭčuku pahražaje da siami hadoŭ kałonii. Sutnaść abvinavačańniaŭ nieviadomaja.
«Naša Niva» — bastyjon biełaruščyny
PADTRYMAĆU Viciebsku invalida aštrafavali za fota biuleteniaŭ — žančyna patłumačyła, što chacieła doma pačytać pra kandydataŭ
Žančynu, jakaja zmahałasia z «piedafilskim łobi», adpravili na prymusovaje lačeńnie ŭ psichbalnicu
Sudziać žychara Bresta, jaki addana naviedvaŭ palityčnyja pracesy. Jon uśmichajecca navat u sudzie
Ciapier čytajuć
«Z maskalom havary, da kamień za pazuchaju dziaržy». My daviedvajemsia ŭsio bolš novaha pra Kastusia Kalinoŭskaha — palityka, jakoha ciapier nie chapaje1616
Kamientary