Žančynu, jakaja zmahałasia z «piedafilskim łobi», adpravili na prymusovaje lačeńnie ŭ psichbalnicu
Žycharka Vałožyna Natalla Mikulič try hady sprabavała davieści, što ziać hvałtavaŭ jaje ŭnučku. Jana chvaliła Alaksandra Łukašenku i Aleha Hajdukieviča, ale heta nie dapamahło vyrašyć prablemy. U vyniku na žančynu zaviali niekalki kryminalnych spraŭ, joj pahražała da piaci hadoŭ kałonii.
Natalli Mikulič vynieśli prysud 11 vieraśnia. U abnoŭlenym śpisie «ekstremistaŭ» ad MUS, źjaviłasia i jaje imia. Tam skazana, što žančynie prysudzili «prymusovaje lačeńnie ŭ psichijatryčnym stacyjanary z uzmocnienym nazirańniem».
Prymusovaje lačeńnie z uzmocnienym nazirańniem moža adbyvacca ŭ minskich Navinkach. Tam jość asobny budynak, dzie znachodziacca zakrytyja kamiery dla chvorych. Ludzi, jakija tam znachodzilisia, kažuć, što heta padobna na režym u SIZA, ale raskład bolš žorstki.
Nie radziej, čym kožnyja paŭhoda, miedycynskaja kamisija vyznačaje, ci možna adpuścić čałavieka dadomu.
52-hadovaja Natalla Mikulič rodam ź Vilejki, ale ŭrešcie asieła ŭ Vałožynie. Vyjšła zamuž, naradziła dačku. Prynamsi raniej Natalla zajmałasia drobnym biznesam, u jaje była krama adzieńnia.
Apošnija hady Natalla pryśviaciła tamu, kab pakarać ziacia. Žančyna pierakonvała hramadstva ŭ tym, što jon hvałtavaŭ svaju dačku — adpaviedna, unučku Natalli.
Padčas zmahańnia ź ziaciem Natalla Mikulič abrała cikavuju stratehiju — jana stała zaciata padkreślivać svaju addanaść Alaksandru Łukašenku, spadziejučysia, što toj dapamoža, pisała jamu listy. Taksama jana ŭstupiła ŭ partyju ŁDPB. Alehu Hajdukieviču jana pieryjadyčna dziakavała ŭ sacsietkach za padtrymku.
Jaje śćvierdžańni nie paćvierdzilisia, a ziać vyjhraŭ niekalki pazovaŭ za paklop. Ale Natalla nie supakoiłasia i praciahvała atakavać zvarotami dziaržaŭnyja orhany, dajšła da asabistaj sustrečy z Kubrakovym.
U vyniku na jaje zaviali kryminalnuju spravu. Sudzili žančynu pa troch artykułach — «raspalvańnie varožaści abo razładu» (č. 1 art. 130 KK), «dyskredytacyja Biełarusi» (art. 369-1 KK) i «paklop» (art. 188 KK).
Joj pahražała da piaci hadoŭ sa štrafam, ale sud vyrašyŭ, što žančyna nie mahła adkazvać za svaje dziejańni.
«Naša Niva» — bastyjon biełaruščyny
PADTRYMAĆCiapier čytajuć
Byłoha supracoŭnika kontrraźviedki KDB aryštavali za zdradu dziaržavie9
Kamientary