70-hadovamu Alaksandra Łukašenku treba znajści tych, chto b padtrymlivaŭ liniju partyi, ale pry hetym nie vyhladaŭ by pryvabniejšym za jaho.
Adzinaja intryha na «vybarach» — kolki hałasoŭ sabie zachoča namalavać Łukašenka. Paŭtaryć 2020 hod i napisać 80%? Ci prademanstravać, što padtrymka vyrasła? Tym bolš Uładzimir Pucin zadaŭ novy aryjencir, atrymaŭšy na svaich vybarach 87%. Mahčyma, staršyniu Centrvybarkama Ihara Karpienku buduć aryjentavać na toje, kab namalavać trochi bolš, čym Pucinu.
Vybary buduć absalutna kantralavanyja, apazicyjnych kandydataŭ nie dapuściać. Ale kab stvaryć iluziju palityčnaha pracesu, u biuleteni kahości ŭpisać treba. Pry hetym upisać takoha kandydata, jaki b nie vyhladaŭ pryvabniejšym za Łukašenku. Blizkich da cieła čynoŭnikaŭ typu Natalli Kačanavaj naŭrad ci pastaviš — daviadziecca prypisać častku hałasoŭ, kab jany vyhladali salidna (a značyć, adarvać hetyja pracenty ad siabie). Libieralna nastrojenych — taksama nie.
Kišennuju apazicyju typu Juryja Vaskrasienskaha? Heta aznačała b zanadta vysoki davier. A Siarhieju Čeračniu, jakomu dazvolili paprysutničać u biuleteni na minułych vybarach, budzie tolki 39 hadoŭ (paśla źmien u Kanstytucyju ŭzrostavy cenz padniali da 40).
Tradycyjna spojleram moža pajści Aleh Hajdukievič. Jon užo zajaviŭ, što jaho partyja budzie ŭdzielničać u vybarach. Chutčej za ŭsio, sam i vystavić kandydaturu.
Moža być i druhi spojler ad adnaho z prafsajuzaŭ ci inšych psieŭdahramadskich arhanizacyj — ciapierašnija ci byłyja kiraŭniki, umoŭnyja Michaił Orda ci Aleh Ramanaŭ albo mienš statusnyja namieśniki. Albo adzin ź lidaraŭ kamunistaŭ, jakomu namalujuć 1%. Možna razvažać i nakont nadziejnaha šeraha piensijaniera kštałtu byłoha staršyni Pałaty pradstaŭnikoŭ Uładzimira Andrejčanki — kab na jaho fonie Łukašenka vyhladaŭ maładym i žvavym.
Trecim spojleram łahična abrać žančynu. Na hetym miescy moža apynucca i Hanna Kanapackaja ŭ roli «biełaruskamoŭnaj apazicyi» (tak, najaŭnaść u minułym niamieckaha DNŽ piarečyć zakonu, ale ž u takich detalach «časam nie da zakonaŭ»). Ci ŭłady pryhledziać kahości ź Biełaruskaha sajuza žančyn, naprykład, pradstaŭnicu rabočaj prafiesii?
Sam Łukašenka siońnia ŭ Kazani zajaviŭ, što na vybary pojdzie. Tamu možna čakać, što hałoŭnaj zadačaj kandydataŭ-spojleraŭ budzie chvalić jaho dasiahnieńni i chiba što taktoŭna namiakać na niedapracoŭki na miescach.
Vybary projduć 26 studzienia 2025 hoda.
Apytanka
Ciapier čytajuć
Pamiłavanyja 15 čałaviek, siarod jakich 13 palitviaźniaŭ4
Pamiłavanyja 15 čałaviek, siarod jakich 13 palitviaźniaŭ
Najbujniejšaj u śviecie fan-supolnaściu Łedzi Hahi kiruje chłopiec ź Minska, jaki adsiedzieŭ za pratesty. Rasijanie paśpiašalisia zapisać jaho ŭ svaje1616
Kamientary