Što treba jeści paśla pryjomu antybijotykaŭ?

Viadoma, što antybijotyki zabivajuć nie tolki škodnyja, ale i «dobryja» bakteryi. Na ščaście, dla bolšaści ludziej hety admoŭny efiekt dla mikrabijomu kišečnika maje časovy charaktar. Tym nie mienš, jak piša The New York Times, my možam dapamahčy arhanizmu adnavicca paśla pryjomu antybijotykaŭ, źviarnuŭšy ŭvahu na svoj racyjon.

Śpiecyjalisty adznačajuć, što niekatoryja vidy ježy stymulujuć rost «dobrych» mikrobaŭ i pieraškadžajuć rostu «drennych». Tak, daśledavańnie, praviedzienaje ŭ 2021 hodzie, pakazała, što bahataja klatčatkaj ježa spryjaje adnaŭleńniu mikrabijomu.

Suśvietnaja arhanizacyja achovy zdaroŭja rekamienduje ŭžyvać 400 hramaŭ harodniny i sadaviny ŭ dzień, što adpaviadaje 25-30 hramam klatčatki. Jaje krynicami źjaŭlajucca cybula, banany, aŭsianka, babovyja.

Adnak u niekatorych ludziej klatčatka moža ŭzmacnić takija simptomy, jak dyjareja, uzdućcie žyvata i spazmy, jakija časta ŭźnikajuć padčas pryjomu antybijotykaŭ. U takim vypadku lepš ustrymacca ad sałataŭ da toj pary, pakul simptomy nie źniknuć.

Niekatoryja daśledavańni śviedčać pra karyść dla adnaŭleńnia mikrabijomu fiermientavanych praduktaŭ, takich jak kiefir, johurt, kvašanaja kapusta.

Taksama jość dokazy taho, što źmiakčyć niekatoryja admoŭnyja simptomy, źviazanyja z pryjomam antybijotykaŭ, takija jak uzdućcie žyvata i ŭtvareńnie hazaŭ, dapamoža imbir. Jaho možna nacierci abo narezać u harbatu, tušanaje miasa ci sup. Dla miakčejšaha smaku možna vykarystoŭvać imbir u vyhladzie parašku.

A voś karyść prabijatyčnych dabavak śpiecyjalisty staviać pad sumnieŭ.

Vyniki apošnich i bolš nadziejnych daśledavańniaŭ prademanstravali, što takija dabaŭki nie adyhryvajuć istotnaj roli ŭ adnaŭleńni mikrabijomu kišečnika paśla vykarystańnia antybijotykaŭ. A niekatoryja daśledavańni pakazali, što jany navat mohuć zapavolić jaho adnaŭleńnie.

Jak tłumačać śpiecyjalisty, kali abmiežavany śpiektr vidaŭ mikrobaŭ uvodzicca ŭ kišečnik praz dabaŭki, jany kankurujuć za prastoru i pažyŭnyja rečyvy i navat mohuć vypracoŭvać chimičnyja rečyvy, jakija pieraškadžajuć razrastańniu našych ułasnych karysnych kišečnych bakteryj.

Takim čynam, kab dapamahčy mikrabijomu adnavicca, dastatkova zrabić akcent na naturalnych praduktach, bahatych klatčatkaj i karysnymi bakteryjami. Zamiest dabavak lepš vybirać śviežyja harodninu, sadavinu i fiermientavanyja pradukty, jakija spryjajuć zdaroŭju kišečnika naturalnym šlacham. Taki racyjon padtrymaje vaš arhanizm u pieryjad paśla pryjomu antybijotykaŭ i paskoryć viartańnie mikrabijomu da normy.

• 5
• 0
• 0
• 1
• 0
• 0
• 0
• 0