Łukašenka padpisaŭ ukaz pra konkursy pryhažości. Pajechać na mižnarodnyja konkursy možna budzie tolki z dazvołu dziaržavy
Pryčynaj tamu, vierahodna, staŭ niadaŭni skandał vakoł «Mis Suśviet». Što źmienicca dla kulturnych, spartyŭnych i adukacyjnych konkursaŭ z 1 sakavika 2025 hoda?
Alaksandr Łukašenka siońnia padpisaŭ ukaz «Ab pradstaŭleńni Respubliki Biełaruś na mižnarodnych mierapryjemstvach».
Zhodna z dakumientam,
z 1 sakavika 2025 hoda vykarystoŭvać słovy «Respublika Biełaruś», «Biełaruś», «nacyjanalny», «biełaruski» ŭ nazvach kulturnych, spartyŭnych i adukacyjnych konkursaŭ, dzie adbirajuć pradstaŭnika ad Biełarusi na mižnarodnyja mierapryjemstvy, možna tolki ŭ tym vypadku, kali arhanizataram vystupaje dziaržaŭnaja arhanizacyja.
Nacyjanalnaj škole pryhažości nadali statusam adzinaha kaardynatara pa arhanizacyi i praviadzieńni nacyjanalnaha konkursu pryhažości «Mis Biełaruś», adboraŭ pradstaŭnikoŭ krainy dla ŭdziełu ŭ mižnarodnych konkursach pryhažości.
Ukaz taksama vyznačaje paradak udziełu pradstaŭnikoŭ Biełarusi ŭ mižnarodnych kulturnych, spartyŭnych, adukacyjnych mierapryjemstvach, dzie pradstaŭlać krainu moža tolki adna asoba ci kamanda. Taki čałaviek ci kamanda mohuć pajechać, kali prajšli nacyjanalny adbor, ich nakiravała dla ŭdziełu dziaržaŭnaja arhanizacyja abo jany paviedamili dziaržaŭnamu orhanu pra namier udzielničać u takim mierapryjemstvie.
Źmieny, vyhladaje, vyklikany niadaŭnim skandałam vakoł konkursu «Mis Suśviet». «Naša Niva» pisała, što na jaho spačatku źbirałasia jechać Karyna Kisialova, jakaja pieramahła ŭ nacyjanalnym adbory, ale ŭ vyniku adpraviłasia «Mis Biełaruś 2023» Eleanora Kačałoŭskaja. A Kisialova apynułasia ŭ SIZA. Insajdary śćviardžajuć, što konkurs «Mis Suśviet Biełaruś» sama Karyna i arhanizavała. Dziaŭčyna nibyta nabyła ŭ arhanizataraŭ suśvietnaha konkursu licenziju na ŭdzieł dla Biełarusi i praviała konkurs pryhažości, u jakim sama pieramahła. Pa słovach znajomych, madel vinavaciać u machlarstvie.
Kamientary