Łukašenka: Biełarusy ničym nie adroźnivajucca ad ludziej, jakija naradzilisia ŭ Pskovie ci Leninhradzie
U razmovie z kiraŭnikom rasijskaha Śledčaha kamiteta Alaksandram Bastrykinym Łukašenka znoŭ zajaviŭ, što biełarusy ničym nie adroźnivajucca ad rasiejcaŭ. Pierad hetym jon atrymaŭ čarhovy rasiejski miedal.
Łukašenka raspavioŭ Bastrykinu, što ich pohlady na žyćcio ničym nie adroźnivajucca. Pry hetym u razmovie jon zhadaŭ i Pucina, nazvaŭšy jaho prosta «staršym».
«Hrech by byŭ, kali b my nie sustrelisia, kali vy ŭ Biełarusi znachodziciesia. Majo staŭleńnie da vas vy viedajecie. Našy pohlady na žyćcio, ja b skazaŭ, absalutna identyčnyja. Razychodžańniaŭ praktyčna niama. Šmat pra vas čuju, baču, pa televizary, praŭda, na žal.
Staršy taksama raspaviadaje, jak vy pracavali razam, kali my dakranajemsia hetaj temy. Uvohule, z paradku dnia ŭ nas nie sychodzicie, z dobraha paradku», — zajaviŭ Łukašenka.
Jon padziakavaŭ Bastrykinu za sadziejničańnie va ŭsich pytańniach. I znoŭ pačaŭ razvažać pra toje, što biełarusy ničym nie adroźnivajucca ad žycharoŭ Pskova, dzie naradziŭsia Bastrykin, ci Pieciarburha.
«Viedajcie, što my hatovyja ŭ luby momant adkazać samym-samym dobrym čynam. Vy viedajecie, biełarusy takija ludzi — jany ničym nie adroźnivajucca ad tych, chto naradziŭsia nie tolki ŭ Pskovie, ale i ŭ Leninhradzie. My ličym, heta našy ludzi. Zusim pobač», — paŭtaryŭ svoj zvykły tezis Łukašenka.
Bastrykin pryjechaŭ u Minsk, kab padvieści vyniki pracy rasijskaha i biełaruskaha Śledčych kamitetaŭ. Taksama jon paradavaŭ Łukašenku čarhovaj rasijskaj uznaharodaj: viedamasnym miedalom «Za viernaść słužbovamu abaviazku».
Ciapier čytajuć
Łukašenka znajšoŭ niezvyčajnyja słovy dla spačuvańnia Chamieniei: «vierałomnaja ataka»16
Kamientary