U Rasii vyzvalili amierykanca, jakoha niadaŭna zatrymali za kanabis u bahažy
Amierykanskaha muzyku Kaleba Bajersa Uejna, niadaŭna zatrymanaha ŭ maskoŭskim aeraporcie «Unukava», vyzvalili ź SIZA. Ciapier jon znachodzicca ŭ amierykanskim pasolstvie ŭ Maskvie i čakaje vyletu ŭ ZŠA, paviedamili jahonyja blizkija.
Hramadzianina ZŠA Kaleba Bajersa Uejna zatrymali ŭ aeraporcie «Unukava» pa spravie ab nibyta kantrabandzie narkotykaŭ. 10 lutaha jon byŭ aryštavany. Jamu vystavili abvinavačańnie, jakoje praduhledžvaje pazbaŭleńnie voli na termin da 7 hadoŭ.
Maci aryštavanaha amierykanca tłumačyła, što jaje syn z 15 hadoŭ pakutuje ad ciažkaj formy epilepsii i prymaje leki ad sutarhaŭ, a niadaŭna prystupy stali adbyvacca čaściej, z-za čaho jon prymaŭ lehalnyja ŭ ZŠA «žavalnyja cukierki ź vitaminam S, miełataninam i KBD (kanabidyjołam) z zamiaščalnikam THK (tetrahidrakanabijoła) u ich». Luby, chto viedaje Uejna, paćvierdzić: jon nie narkaman i nie zajmajecca kantrabandaj narkotykaŭ, a źjaŭlajecca dobraprystojnym hramadzianinam, zajaŭlała žančyna.
17 lutaha baćki Uejna raskazali, što jon vyzvaleny, znachodzicca ŭ ambasadzie ZŠA i čakaje rejs dadomu.
Admietna, što aryšt adbyŭsia praź niekalki dzion paśla abmienu źniavolenymi pamiž ZŠA i Rasijaj, jaki Bieły dom nazvaŭ prykmietaj dypłamatyčnaj adlihi i krokam da spynieńnia vajny va Ukrainie.
Vyzvaleńnie hetaha amierykanca možna razhladać u kantekście zapłanavanych pieramoŭ Rasii i ZŠA, u ramkach jakich Maskva čakaje, što atrymajecca pahavaryć pra adnaŭleńnie ŭsiaho kompleksu rasijska-amierykanskich adnosin, zajaviŭ pres-sakratar prezidenta Rasii Dźmitryj Piaskoŭ.
Kamientary